مەدیایا ئیرانێ: قۆناغا یەکەما دانوستاندنان بداوی بوو

قۆناغا یەکەما دانوستاندنێن دیپلۆماتیک یێن د ناڤبەرا ئیران و ئامەریکایێ دە ل پاکستانێ بداوی بوو. ھات راگھاندن، ھەر دو ئالیان ل سەر مژارێن سەرەکە نڤیسارێن فەرمی ب ھەڤ گوھەرتن.

ئاژانسا فارس یا ئیرانێ راگھاند، شاندەیێن ئامەریکا و ئیرانێ ل ئیسلامابادا پایتەختا پاکستانێ، د داویا قۆناغا یەکەما گۆتووبێژان دە، چەند تەکستێن نڤیسکی پێشکێشی ھەڤ کرنە. د ڤان نڤیساران دە، ھێلێن گشتی یێن وان مژارێن کو جھێ ناکۆکیێ نە، ھاتنە دیارکرن. ئەڤ گاڤ وەکی نیشانا دەرباسبوونا بەر ب قۆناغەکە جدی و فەرمی یا بەلگەکری تێ دیتن.

ل گۆری زانیاریێن کو ژێدەرەکی پاکستانی ژ کانالا CNN رە راگھاندنە، دانوستاندن پر ب گەرمی و چری برێڤە دچن. پاکستان د ڤێ پرۆسەیێ دە وەکی ناڤبەینکارەکە سەرەکە رۆلەکە گرینگ دلیزە. ھات زانین کو سەرۆکوەزیرێ پاکستانێ شەھباز شەریف و فەرماندارێ ئارتێشا پاکستانێ گەنەرال عاسم مونیر، ب خوە د ھوندرێ ژوورەیا دانووستاندنان دە ئامادە نە و راستەراست سەرپەرەشتیا پرۆسەیێ دکن.

ھەمان ژێدەری دیار کر کو تێ چاڤەرێکرن گۆتووبێژ ھەتا دەرەنگیا شەڤێ بەردەوام بکن و شانسەکی مەزن ھەیە کو ژ بەر گرنگیا مژاران، ھەتا رۆژا یەکشەمێ ژی بێن درێژکرن.

ھەروھا مەدیا فەرمی یا ئیرانێ ژ سەر زارێ ژێدەرەکی ژ تیما دانوستاندنکار راگھاند، نھا تیمێن پسپۆر و تەکنیکی یێن ھەر دو ئالیان مژوولی ب ھەڤ گوھەرتنا رەشنڤیسانن. ئاژانسا فارس ژی دەستنیشان کر، ئەڤ یەک نیشان ددە کو پەیوەندی ژ قۆناغا “ئاخافتنێن دەڤکی” دەرباسی قۆناغا “بەلگەکرنا ل سەر رووپەلان” بوونە.

ئەڤ پێشھات د دەمەکێ دە نە کو بەرێ گۆتووبێژ ل سەر مژارێن گشتی بوون، لێ نھا ھەر دو ئالی دەرباسی ھوورگلیێن تەکنیکی بوونە. تێ چاڤەرێکرن کو پشتی پەڤگوھەرتنا نڤیساران، قۆناغەکە دن یا دانوستاندنێن راستەراست د ناڤبەرا شاندەیێن ئاستا بلند دە پێک بێ، دا کو خالێن لھەڤکرنێ زەلالتر ببن.