سێنتکۆمێ ل سەر بەندەرێن ئیرانێ دۆرپێچا دەریایی راگھاند
فەرمانداریا ناڤەندی یا ھێزێن ئامەریکایێ (سێنتکۆم)، ب ئاوایەکی فەرمی راگھاند کو ژ ئیرۆ دوشەمێ، 13ێ نیسانا 2026ێ، ژ دەمژمێر 5:00ێ پێ ڤە، دۆرپێچەکە دەریایی یا بەرفرەھ ل سەر ھەموو بەندەرێن ئیرانێ دێ ھێتیە سەپاندن. ئەڤ بریار پشتی تێکچوونا ھەولدانێن دیپلۆماتیکێن ل لووتکەیا پاکستانێ وەکی گاڤا یەکەما لەشکەری یا واشنگتۆنێ تێ نرخاندن.
ل گۆری داخویانیا فەرمی یا سێنتکۆمێ، ئەڤ دۆرپێچ ھەموو کەشتیێن بازرگانی و بارگران ل خوە دگرە کو بەر ب بەندەرێن ئیرانێ ڤە دچن یان ژی ژ وان بەندەران دەردکەڤن. ھات دەستنیشانکرن کو ئەڤ بریار بێیی جوداھیا ئالایێن وەلاتان، ل سەر ھەموو کەشتیێن ناڤدەولەتی یێن کو لگەل ئیرانێ بازرگانیێ دکن، دێ وەرە سەپاندن. قادا ئۆپەراسیۆنێ ھەموو سینۆرێن دەریایی یێن ل کەنداڤێ و کەنداڤا عۆمانێ ل خوە دگرە.
سێنتکۆمێ د داخویانیا خوە دە تەکەز کر کو ئەڤ دۆرپێچ تەنێ بەندەرێن ئیرانێ دکە ئارمانج و ئارمانجا وان نە ئاستەنگکرنا بازرگانیا گەلەری یا ناڤچەیێیە. ھێزێن ئامەریکایێ دیار کرن کو ئازادیا چوونوھاتنا کەشتیێن کو بەر ب بەندەرێن وەلاتێن دن یێن ھەرێمێ ڤە دچن پاراستییە. ب ڤێ یەکێ، واشنگتۆن پەیامەکێ ددە کو رێیێن ئەنەرژیێ یێن ناڤدەولەتی ژ بۆ ھەڤکارێن وان ئەولەنە و تەنێ ئابۆریا دەریایی یا ئیرانێ ھاتیە ئارمانجکرن.
ھێزێن دەریایییێن ئامەریکایێ بانگ ل ھەموو کەشتیێن بازرگانی یێن ل ھەرێمێ کر کو د دەما دەرباسبوونا ژ تەنگاڤا ھورمزێ و کەنداڤا عۆمانێ دە، ھشیار بن. ھات راگھاندن کو دڤێت ھەموو کەشتی ب رێیا کانالا ناڤدەولەتی یا “چانال 16” لگەل ھێزێن دەریایی د تێکلیێ دە بن و داخویانیێن نوو ب ھووری بشۆپینن دا کو رووبروویی چ پرسگرێکان نەبن.
ئەڤ بریارا توند پشتی داخویانیێن دۆنالد ترامپ ھات کو گەفا دۆرپێچەکا گران کربوو، پشتی کو ئیرانێ مەرجێن واشنگتۆنێ د لووتکەیا ئیسلامابادێ دە رەد کرن. پسپۆرێن سیاسی ھشیاریێ ددن کو ئەڤ پێنگاڤا لەشکەری یا ئامەریکایێ دبە کو ببە سەدەما رووبرووبوونەکا راستەراست د ناڤبەرا ھەر دو وەلاتان دە و ئالۆزیێن ل ئاڤێن ھەرێمێ ببە ئاستەکی مەترسیدار.
