بریتانیا ل دژی دۆرپێچا تەنگاڤا ھورمزێ دەرکەت

سەرۆکوەزیرێ بریتانیایێ کییەر ستارمەر، ب داخویانیەکە توند نەرازیبوونا وەلاتێ خوە ل دژی بریارا ئامەریکایێ یا ژ بۆ دۆرپێچکرنا تەنگاڤا ھورمزێ نیشان دا. ستارمەر راگھاند کو لەندەن ب ت ئاوایی پشتگریێ نادە ڤێ گاڤا واشنگتۆنێ و ھشیاری دا کو گرتن یان ئاستەنگکرنا چوونوھاتنا دەریایی ل ڤێ ناڤچەیێ، دێ ببە سەدەما کریزەکە مەزن د ئابۆریا جیھانێ دە.

سەرۆکوەزیر ستارمەر د ھەڤپەیڤینەکە رادیۆیی دە دەستنیشان کر کو پاراستنا ئارامیا تەنگاڤا ھورمزێ ژ بۆ داخستنا نرخێ ئەنەرژیێ و باشترکرنا ئاستا ژیانا خەلکێ مفتەیا سەرەکییە. ستارمەر گۆت: “ئەڤ دۆرپێچ ل دژی بەرژەوەندیێن مەیە. دڤێت جڤاکا ناڤدەولەتی ژ بۆ کێمکرنا گرژیێ و ڤەکرنا ب تەمامییا تەنگاڤێ بکەڤە ناڤ لڤ و تەڤگەرێ.”

ھەڤدەم لگەل داخویانیێن لۆندۆنێ، بریارا سەرۆکێ ئامەریکایێ دۆنالد ترامپ یا ژ بۆ دۆرپێچکرنا دەریایی یا بەندەرێن ئیرانێ، باندۆرەکە یەکسەر ل بازارێن ئەنەرژیێ کر. پشتی راگھاندنا کو دۆرپێچ ئیرۆ دەمژمێر 17:00ێ (ب دەما ھەولێرێ) دکەڤە واری جیبجیکرنێ دە، نرخێ پەترۆلا خام یا برێنت ب رێژەیەکە بەربچاڤ (%7.05) زێدە بوو و ژ سینۆرێ پسیکۆلۆژیک دەرباس بوو، گھیشت 101.91 دۆلاری.

ل سەر پرسێن کو گەلۆ ئەڤ بریارا ترامپ تۆلھلدانەکە ل دژی ئەورۆپایێ ژ بەر نەبوونا پشتگریا وان، ستارمەر راستەراست بەرسڤ نەدا، لێ بال کشاند سەر گرنگیا دیپلۆماسیێ. شرۆڤەکارێن سیاسی دیار دکن کو ئەڤ ناکۆکیا کوور یا د ناڤبەرا لەندەن و واشنگتۆنێ دە، دبە کو ببە سەدەما شکەستنەکە نوو د ناڤبەرا ھەڤپەیمانێن رۆژئاڤایی دە ل سەر چارەسەرکرنا کریزا ئیرانێ.

تێ چاڤەرێکرن کو لگەل دەستپێکرنا فەرمی یا دۆرپێچێ ژ ئالیێ سێنتکۆمێ ڤە، ئالۆزیێن لەشکەری و ئابۆری ل ھەرێمێ بگھیژن لووتکەیێ.