بلۆمبێرگ: دۆرپێچا دەریایی یا ل سەر ئیرانێ ئابۆریا جیهانێ بەر ب شەرەکی فرەهتر دبە

ئاژانسا بلۆمبێرگ راگهاند، بریارا سەرۆکێ ئامەریکایێ دۆنالد ترامپ یا ژ بۆ دۆرپێچکرنا بەندەرێن ئیرانێ، جیهانێ بەر ب قۆناغەکە مەترسیدار ڤە دبە و نرخێ پەترۆلێ د دەمەکێ کورت دە گهشتیە ئاستا هەری بلند.

ئاژانسا بلۆمبێرگ، د راپۆرەکە خوە یا ئیرۆ 13ێ نیسانێ دە هشیاری دا کو دۆرپێچا دەریایی یا ئامەریکایێ ل دژی ئیرانێ، دێ ببە سەدەما کارەساتەکە ئابۆری ل سەرانسەری جیهانێ. بلۆمبێرگ دەستنیشان کر کو ئەڤ رووبرووبوونا نوو یا ل تەنگاڤا هورمزێ مەترسیەکە راستەراست ل سەر ئارامیا بازارێن ناڤدەولەتی ئاڤا کریە.

یەکسەر پشتی راگهاندنا بریارا دۆرپێچێ ژ ئالیێ واشنگتۆنێ ڤە، بازارێن ئەنەرژیێ ب ئاوایەکی بەرچاڤ هەژیان:

– نرخێ پەترۆلا خاما برێنت ب رێژەیا %9 بلند بوو و گهیشت نێزیکی 104 دۆلاران.

– ل ئەورۆپایێ نرخێ گازا خوەزایی ب رێژەیا %18 زێدە بوو.

پسپۆرێن ئابۆریێ دبێژن، هەر جورە ئاستەنگکرنا چوونوهاتنێ ل تەنگاڤا هورمزێ، کو پێنجەکا (%20) پەترۆلا جیهانێ د ور رە دەرباس دبە، دێ ببە سەدەما ئەنفلاسیۆنەکە بێمیناک و کێمکرنا گەشەپێدانا ئابۆریا جیهانێ.

ل گۆری راپۆرا بلۆمبێرگێ، ئەڤ گرژیا نوو پشتی وێ یەکێ دەرکەت کو دانوستاندنێن راستەراست یێن ل ئیسلامئابادێ بێیی ئەنجام بداوی بوون. هەڤدیتنێن د ناڤبەرا جیگرێ سەرۆکێ ئامەریکایێ جه‌ی دی ڤانس و سەرۆکێ پارلامەنتۆیا ئیرانێ محەمەد باقر قالیباف دە، ژ بەر ناکۆکیێن کوور یێن ل سەر بەرنامەیا ئاتۆمی یا ئیرانێ شکەستن. ئەڤ یەک ژی بوو سەدەم کو ئاگربەستا دوسالی یا کو نوو هاتبوو راگهاندن، بکەڤە بن مەترسیێ.

ژ ئالیەکی دن ڤە، فەرمانداریا ناڤەندی یا ئامەریکایێ (سێنتكۆمێ) راگهاند، دۆرپێچا وان هەموو کەشتیێن کو بەر ب ئیرانێ ڤە دچن ئان ژی ژێ دەردکەڤن دگرە ناڤ خوە. ئارمانجا سەرەکە یا ڤێ پێنگاڤێ، خەنقاندنا هناردەکرنا پەترۆلا ئیرانێ و برینا چاڤکانیێن دارایی یێن تەهرانێ یە.

رایەدارێن ئیرانێ ژی ب توندی بەرسڤا ڤان پێنگاڤان دان. شێورمەندێ لەشکەری یێ رێبەرێ ئیرانێ موحسین رەزایی راگهاند، وەلاتێ وی رێ نادە جیبجیکرنا ڤێ دۆرپێچێ و هێزا وان ا مەزنا بەرسڤدایینێ هەیە. هەروها سوپایا پاسداران هشیاری دا، کو هەر نێزکبوونەکە لەشکەری یا ئامەریکایێ ل تەنگاڤا هورمزێ، دێ وەکی “بنپێکرنا ئاگربەستێ و راگهاندنا شەرێ راستەراست” وەرە دیتن و بەرسڤا وان دێ پر توند بە.