ترامپ: نیازا من بۆ درێژکرنا ئاگربەستێ نینە

سەرۆکێ ئامەریکایێ ئامادەبوونا ئارتێشا وەلاتێ خوە یا ژ بۆ ئێریشکرنا سەر ئیرانێ د ئەگەرا لھەڤنەکرنێ دە ئاشکەرا دکە. ھەروھا پێشبینی دکە، تەھران نەچار ببە شاندەیەکێ ژ بۆ دانوستاندنان بشینە و د ئەنجامێ دە بگھن پەیمانەکە مەزن.

سەرۆکێ ئامەریکایێ دۆنالد ترامپ ئیرۆ 21ێ نیسانێ د داخویانیەکێ دە ژ بۆ تۆرا “CNBC” راگھاند، واشنگتۆن د پێگەھەکە بھێزا دانوستاندنان دەیە و کێشەیێن ب ئیرانێ رە دێ ب پەیمانەکە مەزن ب داوی ببن.

ترامپ دیار کر، ژ بلی شاندنا شاندەیەکێ ژ بۆ دانوستاندنان، ت بژاردەیەکە دن ل بەر دەستێ تەھرانێ نینە. ھەروھا رۆناھی خستە سەر وێ یەکێ کو دەما بەریا دو رۆژان ئیرانیان گۆتن “ئەم شاندەیێ ناشینن”، بەرسڤا ئامەریکایێ ئەو بوو کو “ھوونێ بێ گومان شاندەیێ بشینن.”

سەرۆکێ ئامەریکایێ تەکەز کر، دۆرپێچێن وان پر سەرکەفتی بوون. ھەروھا ئانی زمان کو: “ئەم ب کەسێن باش رە دانوستاندنێ ناکن، لێ ئەم ب ئاوایەکی پر سەرکەفتی ب وان رە مژوول دبن. ئەم ل ھەمبەری رەژیما ئیرانێ یا ھەری توندن و دانوستاندنا ب مە رە پر زەحمەتە.”

دەربارێ ئاگربەستێ دە، ترامپ راگھاند کو ژ بۆ بداویکرنا ئاگربەستێ دەمەکە زێدە د دەستێ وان دە نینە و مەبەستا وی نینە کو ئاگربەستێ درێژ بکە. ھەروھا گۆت: “چەکێن مە ئامادە نە و ئەم ب تەمامی ئامادە نە؛ ئەز ئامادە مە و ئارتێش ژی ژ بۆ تەڤگەرا ل دژی ئیرانێ ئامادەیە.”

د بەردەوامیا ئاخافتنا خوە دە، سەرۆکێ ئامەریکایێ دیار کر، ژ بەر ئارتێشا ئامەریکایێ پرانیا پێگەھێن وان تێکشکاندیە، ئیران ھەول ددە مووشەکێن خوە ڤەگوھێزە و جھێ پێگەھێن خوە بگوھەرە.

ھەروھا ئاشکەرە کر، وان ئەڤ دەم ژ بۆ تژیکرنا دەپۆیێن چەکان بکار ئانیە و پێکانە کو تەھرانێ ژی ھەمان تشت کربە. د داویێ دە ژی پەسنێ ھێزێن وەلاتێ خوە دا و ئەنجامێن ئۆپەراسیۆنێن وان یێن ل ئیرانێ وەکی “تشتەکی باوەرنەکری” ب ناڤ کر.

ئەڤ د دەمەکێ دەیە، بریارە ئیرۆ سبە 22ێ نیسانا 2026ان، گەرەکە نوویا دانوستاندنێن ناڤبەرا ئامەریکا و ئیرانێ ب ناڤبەینکاریا پاکستانێ وەرە لدارخستن.