نیۆیۆرك تایمز: ل ده‌مه‌كێ نێزیک دوبەرەکیێن ناڤبەرا ئامەریکا و ئیرانێ نامینن

پشتی بریارا ئامەریکایێ یا درێژکرنا ئاگربەستێ، پاکستانێ ئەشکەرە کر کو ناڤبەینکارێن وان نیشانێن ئەرێنی ژ تەھرانێ وەرگرتنە و پێشبینی تێ کرن کو د چەند رۆژێن بێ دە گەرەکە نوویا دانوستاندنان بێ دەستپێکرن.

رۆژنامەیا “نیۆیۆرك تایمز” یا ئامەریکایی دوهـ چارشەمێ، 22ێ نیسانا 2026ێ ژ زارێ بەرپرسەکی پاکستانی بەلاڤ کر کو: “ئیحتیمال ھەیە کو د چەند رۆژێن بێ دە گەرا دویێ یا دانوستاندنان ب رێ ڤە بچە.”

وی بەرپرسێ پاکستانی ئاماژە ب وێ یەکێ کر کو پشتی بریارا درێژکرنا ئاگربەستێ، ناڤبەینکارێن پاکستانی نیشانێن ئەرێنی ژ تەھرانێ وەرگرتنە، ھەروەسا د چەند رۆژێن بێ دە دوبەرەکیێن د ناڤبەرا ئامەریکا و ئیرانێ دە نەمینن.

سەرۆکێ ئامەریکایێ دۆنالد ترامپ سێشەمیێ 21ێ نیسانا 2026ێ بریارا درێژکرنا ئاگربەستا ب ئیرانێ رە راگھاندبوو.

ئەڤ ژی د دەمەکێ دە یە کو د 28ێ سباتا ئیسال دە، ئامەریکا و ئیسرایلێ دەست ب بۆمبەبارانکرنا چەند ئارمانجان د ناڤ کووراھیا ئاخا ئیرانێ دە کربوو، کو د ئەنجامێ دە زێدەتر ژ سێ ھەزار کەس ھاتبوون کوشتن. پشترە د 8ێ نیسانا ئیسال دە، واشنتۆن و تەھرانێ ئاگربەستەک ژ بۆ دەما دو ھەفتەیان راگھاند.

تەڤی کو دانوستاندنێن پێشتر ل ئیسلامئابادێ بێی ئەنجام ب داوی ھاتبوون، لێ ھەتا نھا چ راپۆرتەک ل سەر دەستپێکرنا شەر و پەڤچوونان نەھاتیە بەلاڤکرن. تەڤی وێ یەکێ ژی، ئامەریکایێ دۆرپێچ خستیە سەر بەندەرێن دەریایی یێن ئیرانێ.