باکرھان بانگی ئەردۆگان کر: ئاشتی ل بەندا مۆھرا وەیە
ھەڤسەرۆکێ گشتییێ دەم پارتیێ تونجەر باکرھان بانگی سەرۆککۆمارێ ترکیەیێ رەجەپ تاییپ ئەردۆگان کر و گۆت، “برێز سەرۆککۆمار، ئاشتی نھا ل بەندا وێ مۆھرێ یە کو ل سەر وەرە خستن.”
ئیرۆ ل پارلامەنتۆیا ترکیەیێ ب ھەلکەفتا سالڤەگەرا 106ەمین یا دامەزراندنا پارلامەنتۆیێ و 23ێ نیسانێ جەژنا سەروەرییا نەتەوەیی و زارۆکان، روونشتنەکە تایبەت ھات کرن.
ھەڤسەرۆکێ گشتییێ دەم پارتیێ تونجەر باکرھان، ل سەر کورسیا پارلامەنتۆیێ گۆتارەک پێشکێش کر و ل سەر پێڤاژۆیا چارەسەریێ ئاخڤی.
تونجەر باکرھان دەستنیشان کر کو د سەدسالا نوو دە پێویستیا ترکیەیێ ب “کۆمارەکە دەمۆکراتیک” ھەیە دا کو ھەموو گەل و ناسنامە بکاربن ب ئازادی تێ دە بژین.
تونجەر باکرھان بال کشاند سەر بانگا چەکدانینێ یا پهكهكێ و گۆت: بریارا چەکدانینێ یا پهكهكێ، روودانا ھەری مەزن یا دیرۆکا ترکیەیێ یە.
د ڤان ئاخێن کو ب سەرھلدان و تەپەسەرکرنێ تێن ناسکرن دە، ب ئیرادەیا خوە دانینا چەکان نیشانەیا ئاقلمەندیەکە مەزنە.
لێ دڤێ وەرە زانین کو ئاشتی ب تەنێ نایێ مەشاندن. ئاشتی پێپەلووکەکە کو ب گاڤێن دوئالی تێ ھووناندن.”
ھەڤسەرۆکێ دەم پارتیێ بال کشاند سەر شەر و ئالۆزیێن ل رۆژھلاتا ناڤین.
وی ھشیاری دا کو د سەردەمەکە وھا دە ئاشتیا ناڤخوەیی نە بژاردەیەک، نەچاریەکە دیرۆکی یە و وھا دۆماند: ئیرۆ ھێزا ھەری مەزنا ترکیەیێ، چارەنڤیسا ھەڤبەشا کورد و ترکانە. دیرۆکێ ئەم مەحکوومی ژیانا ب ھەڤ رە کرنە.
ئەگەر ئەڤ ھەڤکاری خورت ببە، دێ 86 ملیۆن مرۆڤ قەزەنج بکن.
دڤێ ئەم ڤێ پەیمانا کو سالا 1920ان د بن بانێ ڤێ پارلامەنتۆیێ دە ھاتبوو ئاڤاکرن لێ سالا 1925ان بریندار بووبوو، نھا نوو بکن.”
تونجەر باکرھان ژ بەر ئیرادەیا وی یا چارەسەریێ سپاسیا سەرۆککۆمارێ ترکیەیێ رەجەپ تاییپ ئەردۆگان کر.
باکرھان ھەروھا ژ بەر وێرەکیا وی سپاسیا سەرۆکێ مهههپێ دەڤلەت باھچەلی و ژ بەر ھەلوەستێن وان یێن ئەرێنی سپاسیا سەرۆکێن پارتیێن مخالەفەتێ ئۆزگور ئۆزەل، عهلی باباجان و ئهحمهد داودئۆگلو کر.
باکرھان تەکەز کر کو ئابدوڵاھ ئۆجالان ب بانگا خوەیا 27ێ سباتێ دەریێ چارەسەریێ ھەتا داویێ ڤەکریە و گۆت: برێز سەرۆککۆمار، ئاشتی نھا ل بەندا مۆھرێ یە. بەرپرسیاری ل سەر مللێ وە یە.
گەل ئامادەیە، ترکیە ئامادەیە و دیرۆک ئامادەیە. نھا تام وەختێ ئاشتیێ یە.
بلا ئەڤ پارلامەنتۆ ببە ئەو پارلامەنتۆیا کو ئاشتیێ ئاڤا دکە دا کو ئەم ژ بۆ زارۆکێن خوە نە شەر لێ ئاشتیێ وەکی میرات بھێلن.
باکرھان د داویا ئاخافتنا خوە دە سەرساخی ژ بۆ مالباتێن وان زارۆک و مامۆستەیان خوەست کو د ئێرشێن ل سەر دبستانان دە جانێ خوە ژ دەست دابوو.
وی داخواز کر کو پارلامەنتۆ ژ بۆ پاراستنا ژیانا مرۆڤان زێدەتر بەرپرسیاریێ ھلدە سەر ملێ خوە.
