پێڤاژۆیا نوو یا ئاشتیێ ل ترکیەیێ د خەتەرێ دە یە
جیگرێ ھەڤسەرۆکێ گشتییێ کۆمەلەیا مافێن مرۆڤان ل سەر خەتەرا تێکچوونا پێڤاژۆیا نوو یا ئاشتیێ ل ترکیەیێ ھشیاری دا، ھەروەسا راگھاند کو ھەتا نھا پێنگاڤێن قانوونی نەھاتنە ئاڤێتن. ھەڤسەرۆکا دەم پارتیێ ژی حکوومەت ب پاشخستنا پێڤاژۆیێ و گرێدانا وێ ب گوھەرتنێن ھەرێمی و ئالۆزییێن ئیرانێ ڤە تۆمەتبار کر.
جیگرێ ھەڤسەرۆکێ گشتییێ کۆمەلەیا مافێن مرۆڤان ئەرجان یلماز راگھاند: نابە ئەڤ پێڤاژۆ تەنێ وەکی مژارەکە ئەولەھیێ بێ دیتن. داخویانیێن دەولەتێ ژ بۆ چاکسازیێ ل سەر وێ پێڤاژۆیێ تەنێ د ئاستا گۆتنان دە مانە و نە بوونە گاڤێن کریارکی، کو ئەڤ یەک ژی خەتەرا ڤەگەرا ژ بۆ رەوشا بەرێ و تێکچوونا پێڤاژۆیێ چێ دکە.
ئەرجان یلماز ھەروەسا گۆت: تەڤی کو راپۆرتا کۆمیسیۆنا پارلامەنتۆیێ ئامادەیە، لێ تو پێنگاڤەکە قانوونی نەھاتیە ئاڤێتن کو ئەڤ ژی جھێ نیگەرانیێیە. د دەمەکێ دە کو چەکدانین ب رەنگەکی کریارکی ھاتیە دەستپێکرن، ئەرکێ دەولەتێ یە کو بێیی وەخت وندا بکە قانوونەکە چارچۆڤەیی یا گشتگر و زەلال ژ بۆ پشتگریکرنا بریارا چەکدانینا پهكهكێ دەرخە، کو ھەمی کۆمان ڤەبگرە.”
ناڤبری دیار ژی کر: ئەم وەکی کۆمەلەیا مافێن مرۆڤان، ژ بۆ ئاڤاکرنا ئاشتیەکە بەردەوام، داخواز دکن کۆ گرتیێن سیاسی و نەخوەش بێن ئازادکرن، پەرگالا قەیوومان ب داوی ببە و بریارێن دادگەھا مافێن مرۆڤانا ئەورۆپایێ بێن بجھانین. ھەروەسا دڤێ زەختێن قانوونی یێن ل سەر سیاسەتمەدار و رۆژنامەڤانان بێن راوەستاندن و قانوونا تێکۆشینا دژی تەرۆرێ بێ ھلوەشاندن، داکو ئەڤ دەرفەتا دیرۆکی یا ب بێدەنگبوونا چەکان رە دەرکەتیە ھۆلێ ببە ئاشتیەکە ھەردەمی.
حاتمۆگولار: حکوومەت پێڤاژۆیێ ب زانەبوون ب پاش دخە
ھەڤسەرۆکا پارتیا وەکھەڤی و دەمۆکراسیا گەلان (دەم پارتی) تولای حاتمۆگولار ژی ژ ئالیێ دن ڤە رۆژا (یەکشەم، 26ێ نیسانا 2026ێ) د داخویانیەکێ دە ژ بۆ رۆژنامەیەکێ راگھاند: پێڤاژۆیا ئاشتیێ نێزیکی ئاستەنگبوونێ دبە و حکوومەت ب مەرەم وێ پێڤاژۆیێ درێژ دکە و ب پاش دخە.
حاتمۆگولار ھەروەسا گۆت: بەریا نھا رایەدارێن ترکیەیێ ل بەندا پێشڤەچوونێن رۆژئاڤایێ کوردستانێ بوون، لێ نھا چاڤێ وان ل ئەنجامێن شەر و ئالۆزییێن ناڤخوەیی یێن ئیرانێ یە.
ھەڤسەرۆکا دەم پارتیێ ھێڤی کر کو پێڤاژۆیا ئاشتیێ بەر ب پێش ڤە بچە و تووشی تێکچوونا ب تەمامی نەبە، لێ تەکەز کر کو دیارە ترکیەیێ ستراتەژیا خوە ب گوھەرتنێن ھەرێمێ و ئیرانێ ڤە گرێ دایە.
