1500 مالباتێن عەرەب ژ عەفرینێ بەر ب دێرەزۆرێ ڤە ڤەدگەرن
پشتی رووخاندنا دەستھلاتا بەشار ئەسەد و گوھەرتنێن لەزگین یێن ل سووریەیێ، پرۆسەیا ڤالاکرنا مالێن کوردان ل عەفرینێ دەست پێ کر. ل گۆری زانیاریێن ھەری داوی، بریار ھاتیە دایین کو 1500 مالباتێن عەرەبێن ھاوردە، یێن کو ژ دێرەزۆرێ ئانیبوون عەفرینێ، ژ ھەرێما عەفرینێ ڤەگەرن جھ و وارێن خوەیێن رەسەن.
پارێزگارێ دێرەزۆرێ و بەرپرسێ ھەرێما عەفرینێ، خێرۆ داووود، لگەل نوونەرێن مالباتێن عەرەبێن ل عەفرینێ جڤیان داکو ھوورگلیێن ڤێ پلانا ڤەگەرێ گۆتووبێژ بکن. ھات راگھاندن کو ئەڤ مالبات دێ د ناڤا مەھەکێ دە، ب رێیا کاروانێن برێکووپێک، ژ ھەرێما عەفرینێ دەرکەڤن و بەر ب پارێزگەھا دێرەزۆرێ ڤە ب رێ بکەڤن.
ژ بۆ ھێسانکرنا ڤێ پرۆسەیێ، حکوومەتێ پلانەکە دارایی ئامادە کریە. ل گۆری ڤێ پلانێ، دێ ئالیکاریا دراڤی بدن وان مالباتان داکو کاربن لێچوونێن ڤەگەرێ پەیدا بکن و ل دێرەزۆرێ ژ نوو ڤە ژیانا خوە برێخستن بکن. ئەڤ پێنگاڤ وەکی ھەولدانەکێ ژ بۆ کێمکرنا گرژیێن دەمۆگرافیک ل عەفرینێ تێ نرخاندن.
ھەرێما عەفرینێ یا رۆژئاڤایێ کوردستانێ، د سالا 2018ێ دە ژ ئالیێ ئارتێشا ترکیەیێ و کۆمێن چەکدار ڤە ھاتبوو کۆنترۆلکرن. د وێ دەمێ دە ب سەد ھەزاران کوردێن رەسەن نەچار مابوون کۆچبەر ببن و ل شوونا وان مالباتێن عەرەب ژ پارێزگەھێن وەکی دێرەزۆر، خووتە، حمس و حەلەبێ ھاتبوون بجھکرن.
ب روودانا گوھەرتنێن داوی یێن ل سووریەیێ، ل ئالیەکی پێلەکە نوویا ڤەگەرا کوردان یا بۆ عەفرینێ دەست پێ کریە و ل ئالیێ دن ژی، عەرەبێن ھاوردە دەست ب ڤالاکرنا خانی و ملکێن کوردان کرنە. چاڤدێر دیار دکن کو ڤەگەرا ڤان 1500 مالباتان، دێ ببە دەستپێکا پرۆسەیەکە بەرفرەھتر داکو ناسنامەیا رەسەنا ھەرێما عەفرینێ جارەکە دن وەرە پاراستن.
