ناڤەرۆکا جڤینا مەسروور بارزانی و ئەردۆگان هات ئەشكەرە کرن
سەرۆکوەزیرێ ھەرێما کوردستانێ مەسروور بارزانی، د چارچۆڤەیا سەردانەکە فەرمی دە ل ستەنبۆلێ ب سەرۆککۆمارێ ترکیەیێ رەجەب ترییب ئەردۆگان رە جڤیا. د ھەڤدیتنا کو ل کۆشکا دۆلماباخچەیێ برێڤە چوو دە، گەشەدانێن ھەرێمی، پەیوەندیێن دوئالی و ب تایبەتی “پێڤاژۆیا چەکبەردانا پەکەکێ” بوون مژارێن سەرەکەیێن رۆژەڤێ.
جڤین ب ئامادەبوونا شاندەکە بلندا حکوومەتا ترکیەیێ برێڤە چوو کو تێ دە وەزیرێ دەرڤە، وەزیرێ ئەنەرژیێ، وەزیرێ بەرەڤانیێ و سەرۆکێ دەزگەھا ھەوالگریێ (میت)ێ ئامادە بوون. ھەر دو ئالیان ل سەر کوورکرنا ھەڤاھەنگیا د وارێن ئابۆری، ئەولەھی و سیاسی دە ل ھەڤ کرن و تەکەزی ل سەر گرنگیا خورتکرنا پەیوەندیێن ناڤبەرا ھەولێر و ئەنقەرەیێ کرن.
یەک ژ خالێن ھەری گرینگێن جڤینێ، نیقاشێن ل سەر “پێڤاژۆیا ئاشتیێ و چەکبەردانا پەکەکێ” بوون. سەرۆکوەزیر مەسروور بارزانی ب ئاوایەکی فەرمی پشتگریا ھەرێما کوردستانێ ژ بۆ ڤێ پێڤاژۆیێ نیشان دا. سەرۆککۆمار ئەردۆگان ژی بال کشاند سەر وێ یەکێ کو سەرکەفتنا ڤێ پێڤاژۆیێ ژ بۆ ئارامیا ھەرێمی مەرجێ سەرەکەیە و ھەر دو ئالی ل سەر بداویکرنا ناکۆکیان ب رێیا دیالۆگێ ھەڤنێرین بوون.
سەرۆککۆمارێ ترکیەیێ رەجەب تەییب ئەردۆگان د جڤینێ دە پەسنێ رۆلا ھەرێما کوردستانێ و سەرۆک بارزانی دا و وەکی “فاکتۆرەکی گرنگێ ئاشتی و ئارامیا ناڤچەیێ” ب ناڤ کر. ژ ئالیێ خوە ڤە، سەرۆکوەزیر مەسروور بارزانی ژی بال کشاند سەر رۆلا ترکیەیێ یا د پاراستنا ئارامیا ھەرێمی دە و داخوازا ھەولێرێ یا ژ بۆ گەشەپێدانا پەیوەندیێن ئابۆری و بازرگانی نوو کر.
د بەشا داوی یا ھەڤدیتنێ دە، ھەر دو لیدەران ل سەر پێڤاژۆیا سیاسی یا ئیراقێ و ھەولدانێن ژ بۆ پێکانینا کابینەیا نوویا حکوومەتا فەدەرال ل بەغدایێ راوەستیان. ھات دەستنیشانکرن کو چارەسەرکرنا پرسگرێکێن ناڤبەرا ھەولێر و بەغدایێ ل سەر بنگەھا دەستوورێ، دێ ببە بنگەھا ئیستیقرارا ئیراقێ و خزمەتا ھەموو پێکھاتەیان بکە.
