ھەولێر و ئەنقەرە ل سەر دۆسیەیا ئەنەرژیێ ل ھەڤ جڤیان
سەرۆکوەزیرێ ھەرێما کوردستانێ مەسروور بارزانی، د چارچۆڤەیا سەردانا خوەیا فەرمی یا ژ بۆ ترکیەیێ دە، ل باژارێ ستەنبۆلێ لگەل وەزیرێ ئەنەرژی و چاڤکانیێن سروشتی یێ ترکیەیێ ئالپارسلان بایراکتار جڤیا. د ھەڤدیتنێ دە مژارێن ئەنەرژی، ھناردەکرنا پەترۆلێ و ھەڤکاریا د وارێ ئەلەکتریکێ دە ھاتن نرخاندن.
ل گۆری داخویانیا فەرمی یا حکوومەتا ھەرێما کوردستانێ، د جڤینا کو ئیرۆ شەمیێ (9ێ گولانا 2026ێ) برێڤە چوو دە، ھەر دو ئالیان ب بەرفرەھی دەربارێ گەشەپێدانا پەیوەندیێن دوئالی یێن د وارێ ئەنەرژی و چاڤکانیێن سروشتی دە گۆتووبێژ کرن. ھات دەستنیشانکرن کو ھەر دو ئالی دخوازن پەیوەندیێن خوەیێن ئابۆری بگهینن ئاستەکە بلندتر.
د بەشەکە دن یا جڤینێ دە، تەکەزی ل سەر گرنگیا خورتکرنا ھەڤاھەنگیا ناڤبەرا ھەولێر و ئەنقەرەیێ یا د وارێن بازرگانی، پەترۆل، ئەنەرژی و ئەلەکتریکێ دە ھات کرن. ھەر دو ئالی ل سەر وێ یەکێ ھەڤنێرین بوون کو ھەڤکاری و پرۆژەیێن ھەڤبەشێن د ڤان واران دە نە تەنێ ژ بۆ ھەر دو ئالیان، لێ ژ بۆ ئارامیا ئابۆرییا ھەرێمێ ژی خوەدی گرنگیەکە ستراتەژیکن.
سەرۆکوەزیر مەسروور بارزانی و وەزیر ئالپارسلان بایراکتار داخوازا خوە نوو کرن کو ئاستەنگیێن ل پێشیا ھەڤکاریێن ئەنەرژیێ وەرن راکرن و ب رێیا دیالۆگێ و ھەڤاھەنگیێ، قەبارەیا بازرگانی و وەبەرھێنانێن د وارێ ئەنەرژیێ دە وەرە زێدەکرن.
