ل مێرسینێ چەکدارەکی 6 کەس کوشتن و 8 کەس بریندار کرن
ل ناڤچەیا تارسوسێ یا مێرسینێ، کەسەکی 37 سالی ب دەمانچەیێ ئێریشی دەردۆرا خوە کر. د ئەنجامێ دە 6 کەس ھاتن کوشتن و 8 کەسێن دن ژی بریندار بوون.
ل باشوورێ ترکیەیێ، باژارێ مێرسینێ ب بوویەرەکە گران یا توندیێ ھەژیا. ل گۆری زانیاریێن کو ژ مەدیایا ترکیەیێ ھاتنە گرتن، ئێریشکارێ 37 سالی پێشی ھەڤژینا خوە یا بەرێ کوشتیە و پشترە ب چەکێ ئێریشی خەلکێ سڤیل کریە.
ئێریشکار پشتی کوشتنا ھەڤژینا خوە، بەرێ خوە دایە خوارنگەھەکێ ل ناڤچەیا تارسوسێ. ل ور خوەدیێ خوارنگەھێ و خەباتکارەکی دکانێ کوشتیە. کوژەر د دەما رەڤیانێ دە ژی، ل سەر رییا خوە شڤانەک و شۆفێرێ کامیۆنەکێ ژی ب گولەیان کوشتنە.
محەمەد ھان تۆپال، خەباتکارێ خوارنگەھێ یێ کو ژ لنگێ خوە بریندار بوویە، کێلیا ئێریشێ وھا تینە زمان: “ئێریشکەر بێیی کو ت پەیڤێ ببێژە کەتە ھوندر. مە زانبوو دێ تەلەفۆنا خوە دەرخە، لێ وی دەمانچە دەرخست و دەست ب گولەبارانا مە کر.”
سەرۆککۆمارێ ترکیەیێ رەجەپ تاییپ ئەردۆگان د داخویانیەکە تەلەفزیۆنی دە ئامارێن ڤێ بوویەرێ پشتراست کرن و دیار کر کو 6 وەلاتیان ژیانا خوە ژ دەست دانە. ئەردۆگان دەربارێ ناسنامەیا ئێریشکار و ھوورگولیێن لێپرسینێ دە زانیاریێن زێدەتر نەدا، لێ ھات راگھاندن کو ھێزێن پۆلیس و جەندرمەیان ب ئالیکاریا ھەلیکۆپتەران ل پەی کوژەرن.
ئەڤ کۆمکوژییا ل مێرسینێ جارەکە دن بالا رایا گشتی کشاند سەر بەلاڤبوونا چەکێن بێسەرووبەر ل ترکیەیێ. تەنێ د مەھا بۆری دە دو ئێریشێن ب ڤی رەنگی ژ ئالیێ جوانان ڤە ھاتبوون کرن و د ئەنجامێ دە 10 کەس ھاتبوون کوشتن. سازیێن مافێن مرۆڤان ھشیاریێ ددن کو ھەبوونا ب میلیۆنان چەکێن نەیاسایی د دەستێ وەلاتیان دە، ئەولەھیا جڤاکی دخە مەترسیەکە مەزن.
