سێنتكوم: مە ژ بۆ پاراستنا خوە ئێریشی ھێزێن ئیرانێ کر
فەرمانداریا ناڤەندییا ئامەریکایێ (سێنتكوم) راگھاند، وان ل باشوورێ ئیرانێ ئێریشی چەند بەلەم و بنکەیێن مووشەکی یێن ئیرانێ کریە. مەدیایا ئیرانی ژی دبێژە، د ئێریشان دە 4 کەس ھاتنە کوشتن.
بەردەڤکێ فەرمانداریا ناڤەندییا ئامەریکایێ (سێنتكوم) كاپتن تیم ھاوکنێس ئیرۆ 26ێ گولانا 2026ان ژ تۆرا فۆكس نەیۆزێ رە راگھاند، ھێزێن وان ل باشوورێ ئیرانێ ئۆپەراسیۆنەکە سەربازی پێک ئانیە.
ھاوکێنس دەستنیشان کر، ئەڤ ئێریش د چارچۆڤەیا “مافێ بەرەڤانیا ل خوە” دە ھاتنە کرن دا کو ھێزێن ئامەریکی ژ گەفێن ئیرانێ بێنە پاراستن. ل گۆری داخویانیا وی، فرۆکەیێن ئامەریکایێ بنکەیێن مووشەکی و چەند بەلەمێن ئیرانی کرنە ئارمانج کو ھەول ددان د دەریایێ دە مینان بچینن.
ژ ئالیێ دن ڤە، ئاژانسا “دانەشژو”یا ئیرانی ل سەر زارێ ژێدەرێن ھەرێمی بەلاڤ کر، فرۆکەیێن شەرێن ئامەریکا و ئیسرایلێ ل باشوورێ گراڤا لارکێ ھن پەرچەیێن دەریایی کرنە ئارمانج و د ڤان ئێریشان دە 4 کەس ھاتنە کوشتن.
ھەروھا ئاژانسا “تاسنم” یا ئیرانی راگھاند، دەنگێ سێ تەقینێن مەزن ل باژارێن بەندەر عهباس، سیریک و ژاسک ھاتنە بهیستن.
بەرپرسەکی پلەبلندێ ئامەریکایێ ئەشکەرە کر، دو بەلەمێن سوپایا پاسداران د دەما چاندنا مینان دە ل تەنگاڤا ھورمزێ ھاتنە دیتن و ژ ئالیێ ھێزێن وان ڤە ھاتنە ژناڤبرن. ھەروھا ئامەریکایێ بەرسڤا بنکەیەکە مووشەکی یا ل بەندەر عهباسێ دایە کو فرۆکەیێن وان کربوو ئارمانج.
گراڤا لارکێ کو دکەڤە نێزیکی تەنگاڤا ھورمزێ، ھەرێمەکە ستراتەژیکا ناڤنەتەوەیی یە. د ھەفتیێن داوی دە، واشنگتۆن و تەھرانێ ھەڤدو ب گەفخوارنا ل ترافیکا دەریایی و چاندنا مینان ل ڤێ تەنگاڤێ تاوانبار دکن.
ئەڤ ئێریش د دەمەکێ دە نە کو تەڤی ھەولدانێن دیپلۆماتیک ژ بۆ کێمکرنا راگەشیێ، ئالۆزیێن سەربازییێن ل ناڤچەیێ ھەر کو دچە زێدەتر دبن.
