کریزا سەرۆکاتیێ د ناڤبەرا کلچدارۆغلو و ئۆزەل دە کوورتر دبە
سەرۆکێ گشتی یێ پارتیا کۆماری یا گەل (جەهەپێ) کەمال کلچدارۆغلو، پشتی بریارا دادگەھێ یا بەتالکرنا رێڤەبەریا ئۆزگور ئۆزەل، ئیرۆ ب فەرمی ڤەگەریا ناڤەندا گشتی یا پارتیێ یا ل ئەنقەرەیێ و دەست ب کارێ خوە کر. کلچدارۆغلو، پشتی کو دادگەھێ بریارا ھلوەشاندنا رێڤەبەریا ب سەرۆکاتیا ئۆزگور ئۆزەل دا، جارەکە دن وەکی سەرۆکێ گشتی یێ پارتیێ چوو سەر کارێ خوە. تێ پایین کو کلچدارۆغلو ب فەرسەندا جەژنا قوربانێ، ل ناڤەندا گشتی یا پارتیێ پێشوازیا ئەندام و ئالیگرێن جەهەپێ بکە.
ل گۆری ئاگاھیێن کو ژ چاڤکانیێن ھەرێمی یێن ل ئەنقەرەیێ ھاتنە ب دەست خستن، ل دەردۆرا ئاڤاھیا ناڤەندا گشتی یا جەهەپێ تەدبیرێن توندێن ئەولەھیێ ھاتنە گرتن. ھەروھا تێ پایین کو کەمال کلچدارۆغلو د دەمژمێرێن پێش دە ژ بۆ رایا گشتی و ئالیگرێن پارتیێ گۆتارەکێ پێشکێش بکە و پێنگاڤێن خوەیێن بهێت راگھینە.
ئەڤ گەشەدانا نوو پشتی بریارا دادگەھا تێھلچوونێ یا ئەنقەرەیێ ھات، کو رۆژا 21ێ گولانا 2026ێ بریارەک دەرخست و تێ دە کۆنگرەیا 38ێ یا جەهەپێ ھلوەشاند. ل گۆری ڤێ بریارێ، ئۆزگور ئۆزەل ژ پۆستا سەرۆکاتیێ تێ دوورخستن و کەمال کلچدارۆغلو جارەکە دن سەرۆکاتیا فەرمی یا وێ پارتیێ وەردگرە.
ل ئالیێ دن، کریزا سەرۆکاتیێ د ناڤا پارتیێ دە بەردەوام دکە. ئۆزگور ئۆزەلێ کو ژ ئالیێ دادگەھێ ڤە ژ سەرۆکاتیێ ھاتیە دوورخستن ڤێ بریارێ قەبوول ناکە و راگھاند، ئەو ھینا ژی خوە وەکی سەرۆکێ رەوایێ پارتیێ دبینە.
ئۆزەل دیار کر کو ئەو دێ رۆژا سێشەمبێ یا ڤێ ھەفتەیێ ب ئەندامێن کۆمیتەیا رێڤەبەرا ناڤەندی یا جەهەپێ بجڤە. تێ پایین کو د ڤێ جڤینێ دە ئۆزەل و تیما وی ھەلوەستا خوەیا داوی ل ھەمبەری بریارا دادگەھێ و نەخشەرێیا خوەیا یاسایی ژ بۆ رایا گشتی ئاشکەرە بکن.
