پێنگاڤا ئابۆری یا بەغدا و ھەولێرێ: کۆمپانیێن پەترۆلێ یێن بیانی ڤەدگەرن سەر کارێ خوە
پشتی جڤینەکە لووتکە یا ل بەغدایێ، سەرۆکوەزیرێ ئیراقێ لگەل شاندەیا حکوومەتا ھەرێما کوردستانێ و نوونەرێن کۆمپانیێن ناڤدەولەتی ل سەر پلانسازیەکە نوو لھەڤ کرن. ژ بۆ قەرەبووکرنا کریزا ئابۆری یا کو ژ بەر شەرێن ناڤچەیێ و داخستنا تەنگاڤا ھورمزێ روو دایە، بریار ھات دایین کو ژ سبە ڤە تەڤاھیا کۆمپانیێن پەترۆلێ یێن بیانی ل کوردستانێ دەست ب کارێ خوە بکن.
ئەڤ بریارا گرینگ ئیرۆ چارشەمێ (3یی خزیرانا 2026ێ) د ھەڤدیتنا سەرۆکوەزیرێ ئیراقێ عەلی فالح زەیدی و شاندەیا کوردستانێ یا ب سەرۆکاتیا وەزیرێ چاڤکانیێن خوەزایی کەمال محەمەد سالح دە کەت وارێ جیبجیکرنێ. د ڤێ روونشتنا ستراتەژیک دە نوونەرێن کۆمپانیێن جیھانی، وەزیرێ دەرڤە، وەزیرێ پەترۆلێ و سەردارێ ئارتێشا ئیراقێ ژی ئامادە بوون.
نڤیسگەھا سەرۆکوەزیرێ ئیراقێ راگھاند کو د جڤینێ دە باندۆرا روودانێن داوی یێن ھەرێمێ ل سەر سەکتۆرا ئەنەرژیێ ب ھوورگولی ھاتنە نرخاندن. سەرۆکوەزیر زەیدی، نەخشەرێیەکە گشتگیر پێشکێش کر دا کو ئەڤ کۆمپانیێن ناڤدەولەتی د دەما ھەری نێز دە و بێیی ئاستەنگی دەست ب کارێن خوە بکن.
ژ بۆ سەرکەفتنا ڤێ قۆناغێ، سەرۆکوەزیر زەیدی فەرمان دا سازیێن پەیوەندیدار کو ھەموو پێدڤیێن ئەولەھیێ ژ بۆ پاراستنا زەڤیێن پەترۆلێ و ژینگەھا کاری یا کۆمپانیێن ل ھەرێما کوردستانێ دابین بکن.
زەیدی بال کشاند سەر ئاستا گرانا زرارێن ئابۆری یێن کو ژ بەر سەکناندنا ھناردەکرنا پەترۆلێ یا ب رێیا تەنگاڤا ھورمزێ گھیشتنە ئیراقێ. وی دەستنیشان کر کو رێیا یەکانەیا قەرەبووکرنا ڤان زرارێن مەزن، راکرنا ئاستەنگیێن ل پێشبەری بەرھەمھێنانێ و زێدەکرنا ئاستا ھناردەکرنێیە.
د ئەنجامێ دە، ب بریارا راستەراست یا سەرۆکوەزیرێ ئیراقێ، رێ ژ بۆ دەستپێکرنا کارێ تەڤاھیا کۆمپانیێن پەترۆلێ ھات ڤەکرن. د داویا جڤینێ دە ھەر دو ئالیان تەکەز ل سەر گرینگیا ھەڤکاریا ھەڤپار و ئاڤاکرنا ژینگەھەکە گونجاو یا ئابۆری ژ بۆ وەبەرھێنانێ کرن.
