ھەولێر و ئەسینا تێکلیێن خوەیێن ئابۆری و بازرگانی خورت دکن
سەرۆکێ حکوومەتا ھەرێما کوردستانێ مەسروور بارزانی، ئیرۆ پێشوازیا جیگرێ وەزیرێ دەرڤەیێ یەونانێ ھاڕی زییۆھارس کر. د ھەڤدیتنێ دە، ھەر دو ئالیان ل سەر بەرفرەھکرنا پەیوەندیێن دوئالی یێن د وارێن ئابۆری، بازرگانی و گەشتیاریێ دە لھەڤکرنەکە بەرفرەھ نیشان دان.
ل گۆری داخویانیا فەرمی یا حکوومەتا ھەرێما کوردستانێ، ئیرۆ (یەکشەم، 7ێ خزیرانا 2026ێ) سەرۆکوەزیر مەسروور بارزانی و جیگرێ وەزیرێ دەرڤەیێ یەونانێ ھاڕی زییۆھارس جڤیان. د ھەڤدیتنێ دە تەکەزی هات کرن ل سەر پێشخستنا ھەڤکاریێن دوئالی و ھاتە راگھاندن کو ھەر دو ئالی خوازیارێن گەشەپێدانا تێکلیێن ئابۆری نە.
د داخویانیێ دە ھاتە دەستنیشانکرن: “ھەر دو ئالی ل سەر گرنگیا خورتکرنا پەیوەندیێن ناڤبەرا ھەرێما کوردستانێ و یەونانێ د وارێن جودا جودا دە ھەڤنەرین بوون؛ ب تایبەتی تەکەزی ل سەر خورتکرنا پەیوەندیێن دوئالی د وارێن وەکی پەڤگوھارتنا بازرگانی، گەشتیاری، چاند، پاراستنا شوونوار و کەرتا تەندورستیێ ھاتە کرن.”
د پشکا داوییا جڤینێ دە، ھەر دو ئالیان ل سەر گوھارتن و پێشھاتێن ھەری داوی یێن ل ئیراقێ و رۆژھلاتا ناڤین دیتن و نەرینێن خوە ل ھەڤ گوھەرتن. د ڤێ چارچۆڤەیێ دە، مەسروور بارزانی و ھاڕی زییۆھارس بال کشاندن سەر پێویستیا ئارامیێ و تەکەز ل سەر گرنگیا پاراستنا ئەولەھی و تەناھیا دەڤەرێ کرن.
