جەهەپە: بە ژیریی دەستکرد پەیامێکی ئیمامئۆغڵو دەخوێنرێتەوە
ئەمڕۆ خۆپیشاندانێكی فراوانی جەهەپە دژی دەستگیرکردنی ئیمامئۆغڵو لە ئیستانبوڵ بەڕێوە دەچێت. پارتەکە دەڵێت: بە ژیریی دەستکرد پەیامێکی ئیمامئۆغڵو دەخوێنرێتەوە.
پارتی گەلی کۆماری (جەهەپە) ڕایگەیاندووە، دوای خۆپیشاندانەکانی بەردەم باڵەخانەی گەورەشارەوانی ئیستانبوڵ (سەرەچخانە) ئەمڕۆ شەممە، 29-03-2025، خۆپیشاندانێکی گەورە لە ناوچی ماڵتەپەی ئیستانبوڵ دەکەن.
جەهەپە داوا لە گشت لایەنەکان دەکات بەشداریی خۆپیشاندانەکە بکەن و باسی لەوە کردووە، لە ڕێگەی ژیریی دەستکردەوە، پەیامی ئەکرەم ئیمامئۆغڵو، سەرۆکی گەورەشارەوانی ئیستانبوڵ دەخوێندرێتەوە.
ئیمامئۆغڵو لە تۆڕی کۆمەڵەیەتیی ئێکس بڵاوی کردووەتەوە، لە گەورەترین کۆبوونەوەی ئیستانبوڵ بۆ ئازادی و دیموکراسی و دادپەروەری، بەیەکەوە رێپێوان دەکەن.
لەگەڵ بەردەوامی خۆپیشاندان و ناڕەزایەتییەکان، بەپێی دوایین لێدوانی وەزیری ناوخۆی ئەو وڵاتە، زیاتر لە هەزار و 400 خۆپیشاندەر دەستگیر کراون.
ئێوارەی ڕۆژی یەکشەممە، 23-03-2025، دەیەمین دادگەی تاوانەکانی ئیستانبوڵ لە چاغڵایان، بە تۆمەتەکانی بەڕێوەبردنی رێکخراوی تاوان، بەرتیلدان و وەرگرتن، دەستوەردان لە تەندەرەکانی دامەزراوە گشتییەکان و گەندەڵی دارایی، بڕیاری بەندکردنی بۆ ئەکرەم ئیمامئۆغڵو، سەرۆکی گەورەشارەوانیی ئیستانبوڵ دەرکرد.
