لە هەورامان، کۆڵبەرێک بەهۆی ڕووداوی هاتووچۆوە گیانی لەدەستدا

لە ماوەی یەکساڵی ڕابردوودا، 52 کۆڵبەر لە ئەنجامی هێرشی چەکدارەکانی ڕێژیمی ئێراندا گیانیان لەدەستداوە.

بەپێی ڕاپۆرتی کۆڵبەرنیوز، ڕۆژی دووشەمە 31/3/2025، لە ڕێگەی پاوە بۆ جوانڕۆ لە پارێزگای کرماشانی ڕۆژهەڵاتی کوردستان، ئۆتۆمبێلێکی کۆڵبەران تووشی ڕووداو بووە و بەهۆیەوە، کۆڵبەرێک گیانی لەدەستداوە و چەندین کۆڵبەری دیکەش برینداربوون.

ماڵپەری “کۆڵبەر نیوز” لە زمانی سەرچاوە ئاگادارەکانەوە ڕایگەیاندووە، ئەم ڕووداوە لە نزیکی نەوسوود ڕوویداوە و بەداخەوە بووە هۆی گیان لەدەستدانی شەهاب کەریمی، کۆڵبەری گەنجی خەڵکی سەلاسی باوەجانی.

بەپێی ڕاپۆرتەکەی کۆڵبەرنیوز، لە ماوەی یەکساڵی ڕابردوودا، 52 کۆڵبەر لە ئەنجامی هێرشی چەکدارەکانی ڕێژیمی ئێراندا گیانیان لەدەستداوە و131 کۆڵبەریش بریندار بوون.