ئەم هەنگاوە دوای ڕێککەوتنەکەی نێوان مەزڵووم عەبدی و ئەحمەد شەرع دێت.
هێزەکانی سووریای دیموکراتیک (هەسەدە) و ئیدارەی نوێی وڵاتەکە، لەبارەی گەڕەکە کوردنشینەکانی پارێزگای حەلەب، ڕێککەوتن. هەر دوو گەڕەکی شێخ مەقسوود و ئەشرەفیە لە شاری حەلەب کە بە گەڕەکە کوردییەکان دەناسرێن و لەژێر کۆنترۆڵی هەسەدەدا بوون، ماوەیەکی زۆربوو کە لەلایەن چەکدارەکانی سووریاوە گەمارۆ درابوون.
ڕۆژی سێشەممە 1/4/2025، وەزارەتی ناوخۆی سووریا لە ڕاگەیەندراوێکدا، ڕێککەوتنی نێوان هێزەکانی سووریای دیموکرات “هەسەدە” و ئیدارەی نوێی وڵاتەکە، لەبارەی گەڕەکە کوردنشینەکانی ئەشڕەفییە و شیخ مەقسوود لە پارێزگای حەلەب ڕاگەیاند.
وەزارەتەکە ئاماژەی بەوە دا، بە پێی ڕێکەوتنەکە هێزە کوردییەکان لە هەردوو گەڕەکی ئەشڕەفییە و شیخ مەقسوود دەکشێنەوە.
ئەم هەنگاوەش دوای نزیکەی مانگێک دێت لە ئیمزاکردنی ڕێککەوتنێک لە نێوان مەزڵوم عەبدی، فەرماندەی گشتیی هێزەکانی سووریای دیموکرات و ئەحمەد شەرع، سەرۆکی قۆناغی ڕاگوزەری وڵاتەکە بۆ تێکەڵکردنی هێزە کوردییەکان لە سوپای نوێی سوریادا.
