پەکەکە هەواڵی گیانلەدەستدانی “دەلال” و “زیلان”ی بۆ زیاتر لە 2 مانگ شاردبۆوە.
پەکەکە ناسنامەی دوو کچە گەریلای دیکەی بڵاو کردەوە کە دوو مانگ لەوەپێش گیانیان لەدەستداوە و تازە هەواڵەکەی بڵاو دەکاتەوە. پەکەکە لە وەسفی ئەو دوو کچە کوردەدا نووسیویەتی: “ئەوان تەمسیلی ڕۆحی فیدایی ژنانی کوردیان دەکرد”!.
پەکەکە وێنەی ئەو دوو کچە کوردەی بە ناوەکانی “دەلال و زیلان” لە میدیاکانی خۆیدا بڵاوکردۆتەوە و ڕایگەیاندووە کە “لە ڕێکەوتی 24ی ژانیڤەری 2025دا دەلال و زیلان لە ناوچەی حەفتەنینی باشووری کوردستان بۆ ئەوەی کە نەکەونە دەستی دوژمن، نارنجۆکیان بەخۆیاندا تەقاندۆتەوە شەهید بوون”.
پەکەکە ئەو دوو کچە کوردەشی وەکوو هەزاران هەڤاڵی دیکەیان، بە ناوی نیشتیمانی شیرین هەڵخەڵەتاند و ڕەوانەی چیاکانی باشووری کوردستانی کردبوون، دواتر لە پێناو پرۆژەکانی ئاپۆدا وەک نەتەوەی دیموکراتیک و برایەتی گەلان کە هیچ پەیوەندییەکیان بە کورد و کوردستانەوە نیە، بە کوشتنی دان.
پەکەکە هەواڵی گیانلەدەستدانی “دەلال” و “زیلان”ی بۆ ماوەی زیاتر لە 2 مانگ لە خانەوادەکانیان و ڕای گشتی شاردەوە و ئێستاس هاتووە لە وەسفی ئەو دوو کچە گەریلایەدا دەڵێت: “ئەوان تەمسیلی ڕۆحی فیدایی ژنانی کوردیان دەکرد!”.
پەکەکە ڕۆژانە وێنەی پۆلێک لە کچان و کوڕانی لاوی کورد لە میدیاکانی خۆیدا بڵاودەکاتەوە، کە لە ساڵان و مانگەکانی ڕابردوودا گیانیان لەدەستداوە و هەواڵی گیانلەدەستدانەکەیانی لە بنەماڵەکانیان و ڕای گشتی شاردۆتەوە. بەپێی ئەو هەواڵانەی کە بڵاو دەکرێنەوە، وادەردەکەوێت کە هیچکام لە دەولەتە داگیرکەرەکانی کوردستان و دوژمنانی کورد، بە ئەندازەی پەکەکە کچانی کوردیان بە کوشتن نەداوە و ماف و کەرامەتیان لێ زەوت نەکردوون.
