هەپەگە: هێرشەکان بە فڕۆکەی جەنگی و فڕۆکەی بێفڕۆکەوان و هەلیکۆپتەر ئەنجامدراون.
سەرەڕای ئاگربەست و پرۆسەی ئاشی، دەوڵەتی تورکیا لە مانگی ئاداردا 287 هێرشی دژی گەریلاکانی پەکەکە لە باشوور و باکوری کوردستان ئەنجامداوە، هاوکات هەپەگەش ڕایگەیاندووە کە 13 جار وەڵامی هێرشەکانی تورکیایان داوەتەوە.
ئەمڕۆ چوارشەممە 2ی نیسانی 2025، هەپەگە باڵی سەربازیی پارتی کرێکارانی کوردستان (پەکەکە) ڕایگەیاند، لە مانگی ئازاردا دەوڵەتی تورک دەیان هێرشی لە دژی گەریلاکانی ئەو حیزبە لە باکوور و باشووری کوردستاندا ئەنجامداوە.
هەروەها دەستنیشانیشی کردووە کە هێرشەکان بە فڕۆکەی جەنگی و فڕۆکەی بێفڕۆکەوان و هەلیکۆپتەر ئەنجامدراون و چەندی ناوچە بۆردومان کراون.
بەگوێرەی زانیارییەکانی هەپەگە، دەوڵەتی تورکیا لە مانگی ئاداردا 287 جار ناوچەکانی گەریلای لە خواکورک، گارە و مەتینا بۆردومانکردووە و گەریلاکانیش 13 جار وەڵامیان داوەتەوە.
سەرەڕای دەستپێکردنی پرۆسەی ئاشتی لە تورکیا و باکووری کوردستان و بانگەوازی ئۆجەلان بۆ چەکدانانی پەکەکە، هێرشەکانی دەولەتی تورک هێشتا هەر بەردەوامن. پەکەکە پاش بانگەوازەکەی 27ی شوباتی 2025ی ئۆجەلان بۆ چەکدانان و هەڵوەشاندنەوەی پەکەکە، ئاگربەستی تاکلایەنەی ڕاگەیاندووە.
