لە کۆبوونەوەکەدا بڕیارەکەی پەکەکە بۆ هەڵوەشاندنەوەی خۆی و هەنگاوەکانی دوای ئەم قۆناغەش تاوتوێ دەکرێت.
تونجەر باکرهان، هاوسەرۆکی پارتی یەکسانی و دیموکراسی گەلان (دەم پارتی) ڕایگەیاند، لە ڕێکەوتی 22ی ئەم مانگەدا کۆدەبنەوە بۆ ئەوەی نەخشەڕێگای پارتەکەیان بۆ پرۆسەی چارەسەری و ئاشتی دەستنیشان بکەن. باکرهان جەختی لەوەش کردەوە کە نابێت پڕۆسەی ئاشتی زیاتر دوابخرێت و پێویستە بە زووترین کات بگاتە ئەنجام.
تونجەر باکرهان لە بەیاننامەکەیدا ڕایگەیاند کە کۆبوونەوەی بەڕێوەبەرایەتیی دەم پارتیدا لە ڕێکەوتی 22ی مانگدا بە وردی تیشک دەخرێتە سەر نەخشەڕێگای پرۆسەی ئاشتی و تاوتوێ دەکرێت.
هەروەها ڕاگەیەندرا کە لە هەمان کۆبوونەوەدا بڕیارەکەی پارتی کرێکارانی کوردستان (پەکەکە) بۆ هەڵوەشاندنەوەی خۆی و هەنگاوەکانی دوای ئەم قۆناغەش تاوتوێ دەکرێت.
لە لایەکی دیکەوە باس لەوە کرا کە بەرپرسانی پەکەکە ڕایانگەیاندووە کە بۆ دەستپێکردنی پڕۆسەی چەکدانانەکە، دەبێ دەوڵەتی تورک هەنگاوی یاسایی پێویست هەڵبگرێت.
