پەکەکە ناسنامەی فەرماندەیەکی عەرەبی یەپەگە ئاشکرا دەکات؛ “وەک عومەر موختار بەرخۆدانی کرد”!!

“عەلا حەسەکە”، لە ژانیڤەری ئەمساڵدا لەلایەن چەکدارانی سووریاوە کرابووە ئامانج و گیانی لەدەستدابوو.

پەکەکە ناسنامەی فەرماندەیەکی دیکەی ئاشکرا کرد کە لە بەرخۆدانی ژانیڤەری ئەمساڵ (2026)ی ڕۆژئاڤادا لەلایەن چەکدارەکانی سووریاوە کرابووە ئامانج.

ڕۆژی دووشەممە 22/6/2026، پەکەکە ناسنامەی شەڕڤان و فەرماندەیەکی یەپەگەی بە ناوی “عەلا حەسەکە” بە کۆدناوی “خدر حسێن” ئاشکرا کرد، کە لە مانگی ژانیڤەری ئەمساڵدا لەلایەن چەکدارانی حکوومەتی دیمەشقەوە کرابووە ئامانج و گیانی لەدەستدابوو.

خدر حسێن عەرەب بووە و پەکەکە دەڵێت، “ئەو ئاپۆ و هزری ئاپۆی ناسی و پەیوەندیی بە تەڤگەرەکەیەوە کرد. ئەو دەیهەویست هزری ئاپۆ پێش بخات”.

پەکەکە دەشڵێت: “ئەو وەک عومەر موختار بەرخۆدانی کرد، تەسلیمییەتی قبووڵ نەکرد و بەرگریی لە ڕۆژئاڤا کرد”.

هەروەها ئاماژە بەوەش کراوە کە ئەو شەهیدی نەتەوەی دیموکراتیکە، ئەو نەتەوەی دیموکراتیکەی کەوا بەهۆیەوە ڕۆژئاڤا لە مەیدان وەدەرنرا و دوای 20 هەزار شەهید، بە بڕیاری ئیمرالی شەڕڤانانی کورد تێکەڵ بە سوپای عەرەبیی سووریا بە سەرۆکایەتی محەممەد جۆلانیی تیرۆریست کران.