دەم پارتی: بەبێ چاکسازی لە دۆخی ئۆجەلان، پرۆسەی ئاشتی بە هیچ ئەنجامێک ناگات
بەشتاش: پێویستە تورکیا یاساکانی خۆی بگۆڕێت و دان بە “مافی هیوا”دا بنێت.
مەرال دانش بەشتاش، پەرلەمانتاری دەم پارتی ڕایگەیاند، هەتا “مافی هیوا” جێبەجێ نەکرێت و پێگەیەکی یاسایی بۆ عەبدوڵا ئۆجەلان پەسند نەکرێت، هیچ پرۆسەیەکی ئاشتی بە ئەنجام ناگات.
مەرال دانش بەشتاش ڕەخنەی توندی لە لیژنەی وەزیرانی ئەنجومەنی ئەوروپا گرت کە بۆ ماوەی 12 ساڵە بەدواداچونن بۆ بڕیارەکەی دادگای مافی مرۆڤی ئەوروپا لەسەر عەبدوڵا ئۆجەلان ناکات و جێبەجێ نەکردووە. بەشتاش دەستنیشانی کرد کە تورکیا بە پێچەوانەی یاسا نێودەوڵەتییەکان مامەڵە دەکات و دامەزراوەکانی ئەورووپاش لەبەر بەرژەوەندییە سیاسییەکانی خۆیان چاویان لەم دۆخە نووقاندووە.
بەشتاش سەرنجی خستە سەر “مافی هیوا” (مافی ئازادکردنی مەرجدار) و وتی کە سزای هەتاهەتایی قورستر کە لە تورکیادا دەسەپێندرێت، لە بنەڕەتدا “سزای لەسێدارەدانی بێ ناوە”. بەشتاش گوتی: “لە یاسادا مافی هیوا شتێک نییە کە بسەپێندرێت، بەڵکو فەرمانێکی ڕێکوپێکە، پێویستە تورکیا یاساکانی خۆی بگۆڕێت و دان بەو مافەدا بنێت”.
مەرال دانش بەشتاش سەبارەت بە مشتومڕە نوێیەکان سەبارەت بە چارەسەرکردنی پرسی کورد گوتی: “بەڕێز ئۆجەلان ئەکتەرێکی بنەڕەتییە بۆ ئاشتی و بۆ ئەوەی کە پرۆسەکە بە سەلامەتی بەڕێوە بچێت، زەروورییە کە پێگەیەکی یاسایی بۆ ئەو بە فەرمی بناسرێت و زەمینەیەک بۆ ئەمەش ئامادە بکرێت”.
بەشتاش هەروەها ڕەخنەی لە پێکناکۆکیی لە زمانی دەسەڵاتداران و میدیاکاندا گرت و گوتی: “لەلایەک دەڵێن با ئەو ڕێکخەری سیاسی بێت، بەڵام لەلایەکی دیکەوە زمانێکی کریمینالیزە و دوژمنکارانە بەکاردەهێنن، ئەمە جدییەتی پرۆسەکە لەناو دەبات. هەتا ئەو کاتەی کە پێگەی ئۆجەلان بە فەرمی نەناسرێت، هیچ هەنگاوێکی بنیاتنەر ناگیرێتەبەر”.
