سوپا دێ ده‌ربازی رۆژهلاتێ فراتێ بن

سوپا دێ ده‌ربازی رۆژهلاتێ فراتێ بن

ئه‌و مۆله‌تا توركیا ژ بۆ ناڤچه‌یا ئارام ب ئه‌مه‌ریكایێ دای، ب داوی هات و سه‌رۆككۆمارێ توركیا دبێژیت: “ئه‌نقه‌ره‌ دێ ته‌كئالی ده‌ربازی رۆژهلاتێ فراتێ بیت”.

سه‌رۆككۆمارێ توركیا ره‌جه‌ب ته‌یب ئه‌ردۆگان، ئه‌ڤرۆ جاره‌كه‌ دن د ده‌ربارا ناڤچه‌یا ئارام دا ئه‌وا دێ ل رۆژهلاتێ فراتێ ل باكوورێ سووریێ هێته‌ ئاڤاكرن، هوشداری دانه‌ ئه‌مه‌ریكایێ و گۆت: “مۆله‌تا كو ژبۆ هه‌ماهه‌نگی و كارێ هه‌ڤبه‌ش ب واشنتۆنێ هاتیه‌ دان ب داوی بوو، له‌و ئه‌نقه‌ره‌ دێ ته‌كئالی ده‌ربازی رۆژهلاتێ فراتێ بیت”.

توركيا ل حه‌فتیا بووری مۆله‌ت بۆ 7 رۆژان بۆ ئه‌مه‌ریكایێ ده‌ستنیشانكرن كو گه‌ر ب كریار گاڤان بۆ ئاڤاكرنا ناڤچه‌یا ئارام نه‌هاڤێژیت، توركیا دێ ته‌كئالی له‌شكه‌ران شینیته‌ باكوورێ سووریێ، ئه‌ڤ مۆله‌ته‌ دگه‌ل ب داویبوونا مه‌ها سێپتامبه‌رێ ب داوی هاتیه‌.

ئه‌ردۆگان ل جڤینا نه‌ته‌وێن یه‌كبوویی یا حه‌فتیا بووری گۆتبوو: “ولاتێ وی دخوازیت ناڤچه‌یا ئارام ب رووبه‌رێ 480 كم ل باكوورێ سووریێ ئاڤا بكه‌ت، ب كووراتیا 30 كم، پلانا ئه‌نقه‌ره‌ بجهكرنا 2 ملیۆن په‌نابه‌رێن سووری یه‌ ل وێ ناڤچه‌یێ”.

وه‌ك ئه‌ردۆگان دبێژیت، گه‌ر ناڤچه‌یا ئارام هاته‌ ئاڤاكرن، هژمارا په‌نابه‌رێن سووری ل توركیا دێ كێم بیت، هه‌موه‌خت دێ یه‌كینێن پاراستنا گه‌ل یه‌په‌گه‌ ژ سنۆرێ توركیا دوورببن.

ب ئاڤا كرنا ناڤچه‌یا ئارام گۆتنا وه‌زیرێ ده‌رڤه‌ یێ توركیا مه‌ولود چاویشئۆغلۆ دێ بجهـ هێت وه‌ختێ گۆت: “توركیا دڤێت ل سه‌ر مێزا دیالۆگێ و مه‌یدانێ بهێز بیت”.

ئه‌مه‌ریكا و توركیا رێككه‌تن ل سه‌ر ئاڤاكرنا ناڤچه‌یا ئارام كرنه‌، هه‌یا نها هژماره‌كا گه‌رێن هه‌ڤبه‌ش یێن چاڤدێریێ ل رۆژهلاتێ فراتێ ئه‌نجام داینه‌، لێ توركیا داخوازا بله‌زكرنا گاڤێن ئاڤاكرنا وێ ناڤچێ دكه‌ت.