خوه‌نیشاندان ژبۆ هلوه‌شانا حكوومه‌تا فه‌ده‌رال دهێنه كرن
پێلا خوه‌نیشاندان و نه‌رازیبوونێ ل به‌غدایا پایته‌ختا ئیراقێ به‌رده‌وامن، ئیرۆ ئه‌ڤ نه‌رازیبوون ده‌ربازی چه‌ندان پارێزگه‌هێن دی دبن، وه‌كه زیقار، نه‌جه‌ف، كه‌ربلا و هه‌روها كه‌ركووكێ، هكوومه‌تێ مه‌ترسی هه‌یه كو ئه‌ڤ ده‌ستپێكا كۆده‌تایه‌كێ بیت.
چاڤكانیێن وه‌زاره‌تا ساخله‌میێ ئاشكه‌را كرینه ل ڤان دو رۆژان 11 كه‌س د خوه‌نیشاندانێن به‌غدایێ و ناڤچه‌یێن دن یێن ئیراقێ دا هاتنه كوشتن، پتری 200 كه‌سان بریندار بوونه، خوه‌نیشاندان ب سلۆگانێن دژی ده‌ستهلاتێ ده‌ستپێكرن، لێ هه‌ر د زوو دا ئاراسته‌یا وێ هات گوهه‌رین، مه‌ترسی هه‌یه، ئه‌ڤ نه‌رازیبوون زێده‌تر مه‌زن ببن و بگه‌هه ئاستا كۆده‌تایێ.
ل رۆژا دویه‌مین یا خوه‌نیشاندانێن به‌غدایێ، ئاستا توندوتیژیێ و په‌ڤچوونا ل ناڤبه‌را هێزێن ئاساییش و ئێمناهیێ و خوه‌نیشانده‌ران دا به‌رفره‌هـ بوون، پشتی كو ل رۆژا یه‌كه‌مین ته‌نێ كه‌سه‌ك هاتیه كوشتن، ئیرۆ هه‌ژمارا كوشتیان زێده بوو و گها 11 كه‌سان، خوه‌نیشانده‌ران ل پارێزگه‌هێن باشوور ب سه‌ر باره‌گه‌هێن پارتێن شیعه دا گرتن، وه‌ك پارتا ده‌عوه یا ب سه‌رۆكایه‌تیا نووری مالیكی، موقته‌دا سه‌در كو ب دینامۆیا چێكرنا و لڤاندنا جاده‌یا ئیراقێ تێ زانین، چ ده‌نگێ وی نه‌بوو، ته‌نێ تویته‌ك ژبۆ خوه‌نیشانده‌ران وه‌شاند و توندوتیژیا پۆلیسان ل دژی وان شه‌رمه‌زار كر.
هه‌رسێ سه‌رۆكایه‌تیێن ئیراقێ هه‌موه‌ختا دژواربوونا خوه‌نیشاندانان، كۆمبوون ژبۆ كو چاره‌سه‌ریه‌كێ ببینن و هنه‌ك ژ ئاستا دژواریا خوه‌نیشاندانان ئارام بكه‌ن.
ئالیێن سیاسی جودا ل سه‌ر زارێ په‌رله‌مانتارێن خوه خوه‌نیشاندانان ب ئاراسته‌كری دبینن، ئه‌وان خوه‌یاكر، هنه‌ك پارتێن سیاسی ل پشت خوه‌نیشاندانان هه‌نه و ئامانجا وان ژناڤبرنا حكوومه‌تا فه‌ده‌راله.
به‌شه‌كا خوه‌نیشانده‌ران سلۆگانێن دژی گه‌نده‌لیێ، به‌شه‌كا دن یێن داخوازیا مووچه‌یان و خزمه‌تگوزایێ و ده‌لیڤێن كاری بلند كرنه، لێ به‌شه‌كا دن سلۆگانێن پێشتیڤانیێ ژبۆ عه‌بدولوه‌هاب ساعدی سه‌رۆكێ سازیا دژه ته‌رۆرا ئیراقێ كو ب فه‌رمانا عه‌بدولمه‌هدی هاتیه لادان بلندكرنه، لێ به‌شا هه‌ری زۆر داخوازا هه‌لوه‌شاندنا حكوومه‌تێ دكه‌ن.
به‌شه‌كا خوه‌نیشانده‌ران وه‌كه نه‌رازیبوون ل سه‌ر باندۆرا ئیرانێ و ده‌ستوه‌ردانا وێ یا د ئیراقێ دا، ئالایێ ئیرانێ شه‌وتاندن.
ده‌ما حه‌فتییه‌كێ یه، ل سۆشیال مه‌دیایێ ئاماده‌كاری ژبۆ خوه‌نیشاندانێ دهێن كرن ل بن سلۆگانا (من مافێ خوه دڤێت)، دگه‌ل ده‌ستپێكرنا وان، هه‌ر د زوو دا ئاراسته هات گوهه‌رین، پشبینی هه‌یه سوپا مایتێكرنێ بكه‌ت، هه‌ر ده‌ما خه‌ته‌را سه‌ر حكوومه‌تێ گها ئاستا ئاوارته.
