دگه‌ل ده‌ستپێكرنا پێلا نه‌رازیبوونێ ل به‌غدا یا پایته‌ختا ئیراقێ و پشتره ئاگرێ وان خوه‌نیشاندانان گهایه پارێزگه‌هێن باشوور و ناڤه‌راست، هات ئه‌شكه‌ره كرن كو عه‌ره‌بستانا سعوودیێ پشتگریه‌كا هه‌ری زێده دكه كو ره‌وشا ئیراقێ ئارام نه‌مینه.
ب هه‌یاما حه‌فتیه‌كێ ژبه‌را ده‌ستپێكرنا خوه‌نیشاندانا به‌غدا، ل تۆرێن كۆمه‌لاتیێ بانگا گه‌ل ژبۆ ته‌ڤلیبوونا وێ دهاته كرن، هاشتاگ هاتن ئه‌كتیڤ كرن یه‌ك ژ وان هاشتاگان ب ناڤێ “هاتم مافێ خوه بستینم” بوو، ئه‌نجام ئه‌و بوو گه‌ل ل دویڤ وێ گازیێ هات و ب هزاران ولاتیێن به‌غدایێ ل مه‌یدانا ته‌حریر كۆم ڤه‌بوون و سلۆگانێن دژی حكوومه‌تا فه‌ده‌رال بلند كرن.
د وێ ده‌ربارێ ده، ئاژانسا میهه‌ر یا كۆمارا ئیسلامی یا ئیرانێ، ب به‌لگه ئه‌شكه‌ر كر كو عه‌ره‌بستانا سعوودیێ پشته‌ڤانا سه‌ره‌كه یا وان هاشتگانه كو ل تۆرا تویته‌رێ و تۆرێن دن یێن كۆمه‌لاتیێ هاتنه دانان.
هه‌ر وها دایه خوه‌یا كرن، سعوودی ل تۆرا تویته‌رێ ب ئه‌شكه‌ره و زه‌لالی پشتگریێ ل هاشتاگێن خوه‌نیشاندانێن ئیراقێ دكه، ب ئاوایه‌كی كو 58 هزار حه‌سابێن تویته‌رێ هاشتاگێن خوه‌نیشاندانێن ئیراقێ ریتویت كرنه، 79% یا وان ریتویتان عه‌ره‌بستانا سعوودیێ كرنه.
ئاژانسا میهه‌رێ هه‌ر وها ئه‌شكه‌ر كر، ته‌نێ 6% ژ سه‌رجه‌ما 58 هزار حه‌سابێن تویته‌رێ یێن كو بانگا خوه‌نیشاندانان كرنه ژ ئیراقێ نه، لێ به‌لێ پرانیا رها یێن سعوودیێ نه.
ئه‌ره‌بستانا سعوودیێ ژبۆ كو ئه‌ڤ ئامانجا وێ وه‌ره بجیكرن و ره‌وش ل ئیراقێ ئالۆز و خه‌ته‌ر ببه، 200 كۆمپیته‌رێن رۆبۆت خستنه كار ژ بۆ كو هاشتاگێن خوه‌نیشاندانێن ئیراقێ شێر و ریتویت بكه‌ن.
