ب ڤیدیۆ.. بۆردۆمانكرنا په‌كه‌كێ ل ناڤچه‌یا نه‌هلێ

باله‌فرێن جه‌نگی یێن تركیێ ئیرۆ جاره‌كه‌ دن لڤینێن پارتا كاركه‌رێن كوردستانێ ل سینۆرێ ناحیا چه‌مانکێ یا گرێدای پارێزگه‌ها دهۆكێ بۆردۆمان كرن و زرارێن جانی گهانه‌ په‌كه‌كێ.

چاڤكانیێن تایبه‌ت ب داركا مازیێ ڤه‌ ئه‌شكه‌ره‌ كرن كو ئیرۆ سه‌رێ سبێ رۆژا یه‌كشه‌مێ، باله‌فرێن جه‌نگی یێن تركیێ، لڤینێن چه‌كدارێن په‌كه‌كێ ل ئاقارێ گوندێ هیزانكێ ل سنۆرێ ناحیا چه‌مانكی ل ده‌ڤه‌را نه‌هلێ ئامانج كرنه‌.

چاڤكانی خوه‌یا دكه‌ن، باله‌فرێن تركیێ ئیرۆ ل سات 7:30 سبێ ئه‌ڤ ئێریشا ئاسیمانی ل سنۆرێ ناحیا چه‌مانكێ كرنه‌، وه‌زاره‌تا پاراستنا نه‌ته‌وه‌یی یا تركیێ ژی هه‌یا نها زرارێن بۆردۆمانێ ئه‌شكه‌ر نه‌كرنه‌.

باله‌فرێن تركیێ د ده‌ما 7 رۆژێن بووری ده‌، جارا سێیه‌مینه‌ لڤینا په‌كه‌كێ ل سینۆرێ ناحیا چه‌مانكی بۆردۆمان دكه‌، داوی ئێریش ل چارشه‌مبا بووری ل سینۆرێ گوندێ بیریكات بوو كو ب نێزی كۆمپانیێن به‌رهه‌مئانینا په‌ترۆلێ تێ هه‌ژمارتن.

خه‌لكێ ناڤچه‌یێ نه‌رازیبوونه‌كه‌ مه‌زن ژ نێزیكیا چه‌كدارێن په‌كه‌كێ ژبۆ گوند و ناڤچه‌یێن سڤیلان هه‌نه‌ و ئه‌و دخوازن په‌كه‌كه‌ ژ وان ناڤچه‌یان دوور به‌ و ناڤچه‌یێن وان نه‌بنه‌ مه‌یدانا شه‌ر.