لاڤرۆڤ پشتگری و دۆستاتیا رووسیایێ ب رایه‌دارێن كوردستانێ ره‌ پشتراستدكه‌

وه‌زیرێ كارێن ده‌رڤه‌ ئێ رووسیا فه‌ده‌رال، ئێڤارا ئیرۆ گهیشت هه‌ولێرا پایته‌ختا هه‌رێما باشوورێ كوردستانێ و هه‌ر راست دگه‌ل سه‌رۆك وه‌زیرێ هه‌رێما كوردستانێ جڤیا، پشتره‌ جڤین ل گه‌ل سه‌رۆكێ پارتا ده‌مۆكراتا كوردستانی و سه‌رۆكێ هه‌رێما كوردستانێ پێكئانین، تێكله‌یێن هه‌ولێر و مۆسكۆ به‌هسا سه‌ره‌كه‌ ئا وان جڤینان بوو، سه‌رگی لاڤرۆڤ پشتگرینا رووسیایێ ژ بۆ هه‌رێما كوردستانێ ته‌كه‌ز كر.

سه‌رگی لاڤرۆڤ د یه‌كه‌مین سه‌ردانا خوه‌ دا ژ بۆ هه‌رێما كوردستانێ، ئێڤارا ئیرۆ ل باله‌فرخانه‌یا ناڤده‌وله‌تی ئا هه‌ولێرێ ژ ئالێ مه‌سروور بارزانی سه‌رۆكێ هكوومه‌تێ هات پێشوازی كرن.

پشتره‌ و د هه‌ڤدیتنه‌كێ ده‌ كو هه‌ژماره‌كا وه‌زیرێن و به‌رپرسیارێن هكوومه‌تێ تێده‌ حازر بوونه‌، مه‌سروور بارزانی و سه‌رگی لاڤرۆڤ مژارێن تێكلیێن هه‌رێما كوردستانێ و رووسیا فه‌ده‌رال، پێشخستنا تێكلیان، ره‌وشا ناڤچه‌یێ و ئیراقێ، هه‌ر وها تێكلیێن هه‌ولێر و به‌خدایێ نیقاش كرن.

پشتره‌ سه‌رگی لاڤرۆڤ و شاندا پێره‌، سه‌ردانا مه‌سعوود بارزانی سه‌رۆكێ پارتا ده‌مۆكراتا كوردستانێ كر، لاڤرۆڤ و بارزانی مه‌له‌فێن ئه‌وله‌هیێ، ره‌وشا ناڤچه‌یێ و ئیراقێ د جڤینێ به‌هس كرنه‌، پشتره‌ بارزانی ئالبوومه‌كه‌ دیمه‌نێن پێشمه‌رگه‌یێن كوردستانێ ب لاڤرۆڤ ره‌ به‌خشی.

وه‌زیرێ كارێن ده‌رڤه‌ ئێ رووسیا فه‌ده‌رال ژ ئالێ نێچیرڤان بارزانی سه‌رۆكێ هه‌رێما كوردستانێ هات پێشوازی كرن، تێكلیێن هه‌ولێر و مۆسكۆیێ، هه‌موه‌خت ئێن هه‌ولێر و به‌خدایێ گۆتوبێژ كرن، هه‌ردو ئالیان ته‌كه‌زی ل پێشدابرنا وان تێكلیان كر.

چاڤكانی ئاماژه‌ دكه‌ن، لاڤرۆڤ سێكته‌را ئابووری ب گرینگی ل گه‌ل رایه‌دارێن هه‌رێما باشوورێ كوردستانێ ره‌ موزاكه‌ره‌ كریه‌ كو هه‌رێما كوردستانێ و شركه‌تا رۆس نه‌فتێ لهه‌ڤهاتنه‌كه‌ مه‌زن هه‌یه‌.

وەزیرێ كارێن دەرڤە ئێ رووسیایێ، ئیرۆ رۆژا دوشه‌می سه‌ردانا به‌خدایێ كربوو ل گه‌ل هه‌ڤتایێ خوه‌ محه‌مه‌د حه‌كیم جڤیا، تێكلیێن مۆسكۆ و بخدایێ، رۆژه‌ڤا ئیراقێ و ناڤچه‌یێ نیقاش كرن.

پشتره‌ لاڤرۆڤ ل گه‌ل ئادل ئه‌بدولمه‌هدی سه‌رۆكێ وه‌زیران و به‌رهه‌م سالهـ سه‌رۆك كۆمارێ ئیراقا فه‌ده‌رال و هه‌ژماره‌كه‌ به‌رپرسیارێن دن جڤیا.

ئەڤ یه‌كه‌مین جاره‌ سه‌رگی لاڤرۆڤ تێ هه‌رێما كوردستانێ، وه‌ختا كو نێچیرڤان بارزانی وه‌كه‌ سه‌رۆكێ هه‌رێما كوردستانێ ده‌ست ب كار بووی، لاڤرۆڤ ب رێیا بالیۆزێ رووسیا ئێ بەخدایێ، ماکسیم ماکسمۆڤ پیرۆزباھی ل وی کربوو.

هه‌رێما كوردستانێ و رووسیا فه‌ده‌رال د سالێن بووری ده‌، تێكلیێن خوه‌ هه‌ری خورت كرنه‌ تایبه‌ت د وارێ ئه‌نه‌رژیێ ده‌، كو لهەڤهاتنه‌كه‌ مه‌زن ل گه‌ل شركه‌تا رۆسنه‌فت ئا هكوومه‌تا رووسیایێ ئیمزا كریه‌ و ل گۆری وێ، رووسیا وێ نه‌فتێ ل هه‌رێما كوردستانێ ده‌رخه‌.

سه‌رۆكێ هه‌رێما كوردستانێ نێچیرڤان بارزانی و سێرگی لاڤرۆڤ د وه‌ختا کۆربەندا ئابووری ئا جیھانی دە، ل سانت پەتەرسبۆرگا رووسیایێ، ب ھەڤرە جڤیابوون و تەکەزی ل سەر پێشخستنا تێكلیێن دوئالی کربوون.