ئه‌سه‌د دبێژه‌ وێ به‌رسڤا ئه‌ردۆگان بدم

ئه‌سه‌د دبێژه‌ وێ به‌رسڤا ئه‌ردۆگان بدم

سه‌رۆكێ سووریێ د داخویانیا خوه‌ ئا یه‌كه‌مین ده‌ پشتی ده‌ستپێكرنا ئێریشا سه‌ر باكوورا سووریێ ئاخڤی و گۆت: ئه‌مێ ب دژواری به‌رسڤا داگیركاریێ بدن.

سه‌رۆكێ سووریێ به‌شار ئه‌سه‌د، ئیرۆ رۆژا پێنجشه‌می 17/10/2019ان، د هه‌ڤدیتنه‌كه‌ مه‌دیایی ده‌ كو كه‌نالا ئێن تی ڤی ئا رووسیا فه‌ده‌رال وه‌شاندیه‌، بۆ یه‌كه‌مین جار هه‌لوه‌ستا خوه‌ ل ده‌ربارا ئێریشا تركیێ ل سه‌ر ناڤچه‌یێن باكوورا رۆژهلاتا سووریێ ئانی زمان.

ئه‌سه‌د وها ئاخڤی:  ئه‌مێ ب دژواری به‌رسڤا داگیركاریا تركیێ بدن، ئه‌و داگیركاری ئه‌گه‌ر ل چ ناڤچه‌یه‌كه‌ سووریێ به‌، به‌رسڤا مه‌ وێ ب هه‌موو رێكێن به‌رده‌ست به‌.

ئه‌ڤ گۆتنێن به‌شار ئه‌سه‌د یه‌كه‌مین هه‌لوه‌سته‌ پشتی لهه‌ڤهاتنا هێزێن سووریایا ده‌مۆكراتیك و هكوومه‌تا دیمه‌شقێ ئا 13 ئۆكتۆبه‌را ئیسلا كو ل گور وێ، ئارته‌شا سووریێ هه‌ره‌كه‌ت بۆ باكوورا سووریێ و باژارێن رۆژئاڤا كوردستانێ كرنه‌.

به‌را ڤی هه‌لوه‌ستێ سه‌رۆكێ سووریێ، شێوه‌رمه‌نده‌كه‌ سه‌رۆكتیا تركیێ راگهاندبوو، ئه‌گه‌ر ئارته‌شا سووریێ بكاربه‌ شه‌رێ ئارته‌شا تركیێ بكه‌، بلا كه‌ره‌م بكه‌.

ل ئاستا مه‌یدان، دوهـ رۆژا چارشه‌مێ 16/10/2019ان، یه‌كه‌مین په‌ڤچوونا ل ناڤبه‌را ئارته‌شا سووریێ و ئارته‌شا تركیێ ل سینۆرێ منبجێ چێبوو، د ئه‌نجامێ ده‌، 4 له‌شكرێن تركیێ بریندار كه‌تن.