ئیران سه‌ركێشیا كامپینا «بایكۆتا تركیێ» ل كوردستانێ دكه‌

ئیران سه‌ركێشیا كامپینا «بایكۆتا تركیێ» ل كوردستانێ دكه‌

نێزی 10 رۆژانه‌ بایكۆت و ره‌فزا كه‌لوپه‌لێن تركیێ ل هه‌رێما باشوورێ كوردستانێ هنه‌كی گه‌رم و گور بوویه‌، گه‌لێ باشوور ل سه‌ر ئه‌ساسا هه‌ڤسۆزی و عاتیفێ ژ بۆ گه‌لێ رۆژئاڤا كامپین ده‌ستپێكرنه‌، ل سۆشیال مه‌دیایێ ب سلۆگانا «هه‌ر دیناره‌كه‌ تشتێ تركیێ پێ بكڕی دبه‌ گوللـه‌یه‌ك كو ترك ل ولاتیێن مه‌ یێن رۆژئاڤا دخن»‌، كامپین پێ تێ مه‌شاندن، ته‌ڤی كو بیرۆكا بایكۆتێ ل دژی داگیركاریا تركیێ یه‌، لێ به‌لێ گه‌ره‌كه‌ بزانین، چ ئالیه‌ك ل پشت بایكۆتێ یه‌، كی ژ بایكۆتێ مفای دگره‌، به‌رسڤا ئه‌ڤێ پرسێ ل جه‌م دوستێن مه‌ یێن «ویلایه‌تا ئه‌ل فه‌قیهـ»ه‌.

كۆمارا ئیسلامیا ئیرانێ و تركیێ كو ئه‌ڤ هه‌ردو ولات ژ ئه‌زه‌ل ده‌ دژمنێن گه‌لێ كوردن، ته‌نێ ژبۆ گارانتیكرنا به‌رژه‌وه‌ندا خوه‌ ته‌ڤلی ناڤچه‌یێ دبن، ژ بۆ كو ئه‌م دووری بابه‌ت نه‌چن، ترك و فارس هه‌ر ل ده‌ستپێكا ئاڤابوونا ستاتۆیێ ل هه‌رێما باشوور، ئه‌وان هه‌ڤركی ل سه‌ر بازارێن كوردستانێ كرنه‌، ژ بۆ كو هه‌ر یه‌ك پارا بێهتر یا بازار ژبۆ خوه‌ كۆنترۆل بكه‌، یا موعلووم «تركیێ ل بازارێن دهۆك و هه‌ولێرێ یه‌كه‌مه‌ و پشكا شێر هه‌یه‌ و ئیران ل بازارا سلێمانیێ یه‌كه‌مه»‌.

ب گۆتنه‌كه‌ دن، تركی ب 7 ملیار دۆلاران كالایان دشینه‌ بازارێن باشوورێ كوردستانێ، ئیران ب نێزی 4 ملیار دۆلاران، ئه‌نقه‌ره‌ و ته‌هران بلندكرنا ئاستا وێ تجاره‌تێ دخوازن، له‌وما هه‌ر ره‌وشا كو ده‌ردكه‌ڤه‌ هۆلێ ژ ئالیێ رایه‌دارێن تركیێ و ئیرانێ ڤه‌ ب باشی تێ دیراسه‌ كرن، ژ بۆ كو وه‌ره‌ زانین ب تو ئاوایی ئه‌و ره‌وش وێ بكه‌ڤه‌ د به‌رژوه‌ندیا وان ده‌ و پارا وان د بازاران ده‌ زێده‌تر بكه‌. ب كورتی «چه‌وا هه‌ر ولاته‌ك وێ بكاره‌ پێتر تشتێ خوه‌ ل بازارێن هه‌رێما باشوورێ سه‌رف بكه»‌، له‌وما ب بایكۆتكرنا كالایێن هه‌ر یه‌ك ژ ڤان ولاتان، ب خزمه‌ته‌كه‌ هه‌ری مه‌زن ژ بۆ ولاتێ دن تێ حه‌ساب كرن.

هشتنا كالایێن تركیێ د به‌رژه‌وه‌نديا ره‌ژیما ویلایه‌ت ئه‌ل فه‌قیهـ ده‌ یه‌

ژ ده‌ستپێكا ئێریشا داگیركاریا تركیێ ل سه‌ر رۆژئاڤا كوردستانێ، بزاڤێن گه‌لێ باشوور ژ بۆ ره‌فزا كالا و كه‌لوپه‌لێن تركیێ ده‌ركه‌تن هولێ، گه‌هشته‌ ئاسته‌كێ كو كامپین ژ بۆ وێ ئارمانجێ هاتن ئیلان كرن، ئارمانجا گه‌ل هه‌ڤسۆزی یه‌، لێ به‌لێ ئالیێ كو ژ ڤێ بایكۆتێ قازانجێ دكه‌، نه‌ گه‌لێ رۆژئاڤایه‌ به‌لكو دژمنه‌كێ سه‌رسه‌ختێ گه‌لێ كورده‌، ئه‌و ژی ره‌ژیما «ئایه‌توللا و ویللایه‌ت ئه‌ل فه‌قیهـ»ه‌.

ته‌كۆشینا ئیرانێ هه‌موه‌ختا هه‌ڤسۆزیا گه‌لێ باشۆر ژ بۆ رۆژئاڤا ل بازارێن هه‌رێما باشوور خورت بوویه‌، گه‌لو ئه‌مێ ل ڤر ب پرسن بۆچی یه‌كه‌مین بانگا ره‌فز و بایكۆتا كه‌لوپه‌لێن تركیێ ژ زۆنا كه‌سك «سلێمانیێ» ده‌ركه‌ت، به‌رسڤ پر ئاسانه‌، ل سلێمانیێ ئیران زاله‌ نه‌ تركیێ، له‌وما كێم فرۆتنا كالایێن تركیێ وێ ببه‌ سه‌ده‌م كالایێن ئیرانێ پر بێن فرۆتن، ل ڤر گه‌لێ باشوور خزمه‌ته‌كه‌ زێده‌ بێ به‌رانبه‌ر ژ بۆ ئیرانێ دكه‌، نه‌مازه‌ كو د دۆرپچه‌كه‌ هه‌ری دژوار و جه‌زایێن ئیكۆنۆمیك یێن ئه‌مه‌ریكایێ ل سه‌ر ئیرانێ هه‌نه‌.

دڤێ باش بفكرین ئه‌مێن به‌له‌نگاز تنێ عاتیفه‌ ب مه‌ره‌یه‌، «ئه‌مێ ره‌فزا تركیێ دكن و بازارا ئیرانێ گه‌رم و گور دكن»

ئا راست ئه‌ڤه‌، گه‌ر ئه‌م بخوازن بایكۆتا تركیێ بكن، د ڤێ د ئه‌ساس ده‌ ئه‌م بایكۆتا كالایێن ئیرانێ بكن، گه‌لو چ قاس خوه‌ش مه‌ فكارێن خوه‌ ووندا كرن، وه‌ختا ره‌ژیما ئیرانێ «قاسم سوله‌یمانی، حزبوللا یا لبنانی و چه‌ته‌یێن حه‌شدا شه‌عبی» ل 16 ئۆكتۆبه‌رێ ژ بۆ داگیركاریا باشوورێ كوردستانێ شاندین، ل وێ ده‌مێ 51% یا خاكا كوردستانێ ل سایا گرۆپا «كالفامان» ژ ده‌ست چوو، گه‌لو چما ل وی وه‌ختی بایكۆتا كالایێن ئیرانێ نه‌هات كرن؟

له‌وما دڤێ ئه‌م باش بفكرین ئه‌مێن به‌له‌نگاز تنێ عاتیفه‌ ب مه‌ره‌یه‌، واته‌ «ئه‌مێ ره‌فزا تركیێ دكن و بازارا ئیرانێ گه‌رم و گور دكن»، ژ خوه‌ ئیران ژی ئه‌ڤێ دخوازه‌، ئه‌ڤ ره‌فتارا مه‌ یا بایكۆتكرنێ ژی میناكه‌كه‌ زه‌لاله‌ ژ بۆ وێ گۆتنا‌ گه‌لێ باشوور وه‌ختا دبێژن: «حه‌سه‌ن كه‌چه‌ل، كه‌چه‌ل حه‌سه‌ن»، تركیێ بایكۆت بكن ئیرانێ وێ بهێز ببه‌، یان ئیرانێ بایكۆت بكن و تركیێ وێ بهێز به‌، د هه‌ردو رێیان ده‌ ئه‌مێ خزمه‌تا دژمن دكن.