«فتۆحی» و ده‌رده‌سه‌ریا كۆچبه‌رێن رۆژئاڤا كوردستانێ
پرۆژه‌یا «فتۆحی» ژ بۆ كۆچبه‌رێن رۆژئاڤا كوردستانێ ده‌رده و ژ بۆ ده‌ستهلاتا وێ مفا و قازانجه
ژ ده‌ستپێكا ئێریشا داگیركاریا تركیێ، ب هه‌زاران ولاتیێن رۆژئاڤا كوردستانێ ئاواره و كۆچبه‌ر بوونه، پرانیا هه‌ری زێده به‌رێ خوه دانه هه‌رێما باشوورێ كوردستانێ، ئه‌ڤ كۆچبه‌ربوون ژ بۆ گه‌ل ب ده‌رده‌سه‌ره‌یه‌كه مه‌زن تێ زانین، لێ به‌لێ ژ بۆ هنه‌ك ئالیێن نێزی ده‌ستهلاتا رۆژئاڤا ب بازرگانیه‌كه پر ب مفا، گهشتیه ئاسته‌كه وها كو ئه‌ڤ بازرگانی وه‌كه پرۆژه‌یه‌كه ب ناڤێ «فتوحی» ده‌ركه‌تیه هۆلێ.
ژ ده‌ستپێكا شۆرشا گه‌لێ سووریێ ل دژی رژیما به‌شار ئه‌سه‌دی ل سالا 2011ان و هه‌ر وه‌ختا ره‌وش خه‌ته‌ر كه‌تی، گه‌لێ رۆژئاڤا كوردستانێ په‌نا و هاوارێن خوه ژ بۆ باشوورێ كوردستانێ برنه، ژ به‌ر كو ئه‌و باشوور ب مالا خوه دزانن.
هكوومه‌تا هه‌رێما باشوورێ كوردستانێ و گه‌لێ باشوور ب خوه، ژ ده‌ستپێكا پێلا كۆچبه‌ربوونا گه‌لێ رۆژئاڤا، هه‌ر تشتێ ژ ده‌ست هاتی ژ بۆ برایێن خوه یێن رۆژئاڤا كریه، له‌وما هینا نها د هه‌ر ره‌وشه‌كێ ده، گه‌لێ رۆژئاڤا په‌نایێ ژ بۆ باشوور دبه، هه‌ر وه‌كه باشوور مالا مه‌زنه ژ بۆ وان.
ل ڤێ داویێ و ل گه‌ل ده‌ستپێكرنا ئێریشا داگیركاریا تركیێ ل سه‌ر رۆژئاڤا كوردستانێ ب هه‌زاران ولاتیێن رۆژئاڤا ئاواره و كۆچبه‌ر بوون، هه‌ر ل رۆژێن ده‌ستپێكێ وان رێیا خوه ژ بۆ باشوورا كوردستانێ گرت، لێ به‌لێ ده‌ستهلاتا رۆژئاڤا ب تایبه‌ت یه‌كه‌یێن گرێدای پاراستنا ژنان YPJ ێ و ئاساییشا PYD ێ رێگری كرن و نه‌هشتن ئاواره ب رێیا ده‌ریێ سێمالكا ده‌رباسی باشوور ببن.
هنه‌ك وه‌خت پێ نه‌چوو هه‌یا كو پرۆژه‌یێ «فتۆحی» ده‌ركه‌تیه هۆلێ و بازارا وێ گه‌رم و گور بووی، «فتوحی» كلیلا ده‌رباسبوونا ئاواره و كۆچبه‌ران بوو، ژ بۆ باشوورا كوردستانێ.
ل گۆر چاڤكانیێن تایبه‌ت ئێن داركا مازی ژ 9 جۆتمه‌ها ئیسال و ده‌ستپێكرنا ئێریشا داگیركاریا تركیێ، ب هه‌ژمار 13.125 ولاتیێن رۆژئاڤا كۆچبه‌ر بوونه باشوورێ كوردستانێ.
هه‌ر یه‌ك ژ وان ولاتیێن رۆژئاڤا ب قاسی 300 هه‌یا 1000 دۆلارێن ئه‌مه‌ریكی پێش رێدان و ده‌رباسبوونا به‌ر ب باشوور داینه هنه‌ك ئالیێن ل بن سه‌یوانا ده‌ستهلاتا رۆژئاڤا، ب تایبه‌ت یه‌كه‌یێن ئه‌وله‌كاریێ یێن سه‌ر ب ئاساییشا PYD ێ ڤه.
چاڤكانیان ته‌كه‌ز كر كو ژ بۆ ده‌رباسبوونا هه‌ر كۆچبه‌ره‌كێ رۆژئاڤا بۆ باشوور ئه‌و قاس په‌ره دهات سته‌ندن، لێ به‌لێ ژ بۆ وان كۆچبه‌رێن په‌ره پێره نه، ئه‌و نه‌چار مان هنه‌ك رێیێن خه‌ته‌ر بكاربینن، وه‌كه په‌نا برن ژ بۆ رێیا شه‌نگالێ.
چاڤكانیێن داركا مازی ئه‌شكه‌ره كرن كو هه‌ژماره‌كه هه‌ری زێده ئا كۆچبه‌رێن رۆژئاڤا یێن ب سه‌ده‌ما نه‌بوونا په‌ره‌ی قه‌ستا رێیا شه‌نگالێ و هنه‌ك رێیێن قاچاخ یێن پر خه‌ته‌ر كرن، هه‌ر چه‌ند كو هنه‌ك ژ وان ب سه‌لامه‌ت خوه گهاندن باشوور، لێ رێژه‌یه‌كه به‌رچاڤ ژ ئالیێ PKK ێ و هێزێن گرێدای وێ نه‌چار مان ل ور بمینن، هه‌موه‌خت چاره‌نڤیسا هنه‌كێن دن كو ده‌رباسی شه‌نگالێ بوونه، ووندایه.
رێگری كرنا ده‌ستهلاتا رۆژئاڤا، ژ ئالیێ هكوومه‌تا باشوور ژی ڤه ئاماژه پێ هاتیه كرن، وه‌ختا كو وه‌زیرێ كارێن ناڤخوه رێبه‌ر ئه‌همه‌د دبێژه: ل ئالیێ رۆژئاڤا پسگرێک ژ كۆچبه‌ران رە دەردکەڤن و نەچار دبن کو ب قاچاخی بێن ھەرێما کوردستانێ و پەرەیان ددن ھەیا کو خوە بگهینن ڤر.
