مه‌زلووم كۆبانی یان مه‌زلووم عه‌بدی، فه‌رماندارێ گشتی یی هێزێن سووریایا ده‌مۆكراتیك هه‌سه‌ده كو ل گه‌ل ئێریشا داگیركاریا تركیێ ل سه‌ر رۆژئاڤا كوردستانێ وه‌كه كه‌سه‌كی هه‌ری ناسیار ده‌ركه‌ت هۆلێ، ب ئاوایه‌كی كو داخوه‌یانی و وێنه‌یێن وی ل مه‌دیا كوردستانی و جیهانی گرینگی پێ هات دایین، ب تایبه‌ت پشتی لهه‌ڤهاتنا شكه‌ستی یا ل گه‌ل رژه‌یما سووریێ كو ل گۆر وێ رۆژئاڤا كوردستانێ بێ ده‌ستهلات و رومه‌ت هشتی.
مه‌زلووم كۆبانی كی یه و چ ژ بۆ رۆژئاڤا كر؟
«مه‌زلووم عه‌بدی شاهین، مه‌زلووم كۆبانی، فه‌رهات عه‌بدی یان شاهین جیلۆ» ناڤێن مه‌زلووم عه‌بدی نه، ل سالا 1967ان ل گونده‌كێ كۆبانێ ژ دایكبوویه، ل سالا 1990ان ته‌ڤلی په‌كه‌كێ بوو و ل باره‌گه‌ها تایبه‌ت یا عه‌بدوللا ئۆجالان ل سووریێ كارێن ئیداری برێ دكرن، ب یه‌ك ژ خۆرتێن جهێ باوه‌ریا ئاپۆ تێ هه‌ژمارتن، پشتره ده‌ست ب خه‌باتا چه‌كداری كر و بوویه فه‌رمانداره‌كی هێزێن پاراستنا گه‌ل هه‌په‌گێ، پشتره و ل سالا 1997ان به‌ر ب ئه‌وروپا دچه و ل ور ده‌ست ب ته‌كۆشینا سیاسی دكه، ل سالا 2000ان ڤه‌دگه‌ره هه‌رێما باشوور و ل كه‌مپا مه‌خموورێ بجی دبه، ل گه‌ل ده‌ستپێكرنا شۆرشا سووریێ دچه رۆژئاڤا و رۆلێ گرینگ د پێكانینا یه‌كینه‌یێن پاراستنا گه‌ل یه‌په‌گێ ده دبینه، ل سالا 2014ان به‌رپرسێ مه‌له‌فا نیقاشا یه‌په‌گێ و هه‌ڤپه‌یمانیا ناڤنه‌ته‌وه‌یی یا ل دژی دائیشێ بوو، پشتره بوویه فه‌رماندارێ هێزێن سووریایا ده‌مۆكراتیك هه‌سه‌ده.
مه‌زلووم كۆبانی ب تو ئاوایی دۆزا كورد ژ ووندا كر؟
مه‌زلووم كۆبانی، جه‌نگه‌كه مه‌زن ل رۆژئاڤا ل دژی رێخستنا ته‌رۆریستیا دائیشێ كر ل ور به‌رنیاسبوونا وی زه‌حف بوو، لێ به‌لی وه‌كه ستێر و قه‌هره‌مانه‌كی ده‌ركه‌ت هۆلێ ب تایبه‌ت پشتی لهڤه‌هاتنا ل 13 جۆته‌مه‌ها ئیسال ل گه‌ل ره‌ژیما سووریێ ئیمزه كری، ل په‌ی وێ لهه‌ڤهاتنێ خوه‌ینا 11 هزار شه‌هیدێن كورد و رۆژئاڤا كوردستانێ ووندا بوو، مه‌زلووم كۆبانی نه ته‌نێ ستاتۆ یا رۆژئاڤا به‌لكو دۆزا گه‌ل ژی ب وێ لهه‌ڤهاتنێ ژ ده‌ست دا.
مه‌زلووم كۆبانی پشتی لهه‌ڤهاتنا 13 جۆتمه‌هێ ژ بۆ كۆڤارا فۆرن پۆلیسی ئاخڤی و گۆ كو «ل ناڤبه‌را جینۆسایدا گه‌ل و لهه‌ڤهاتنا ب ره‌ژیمێ، من لهه‌ڤهاتن هلبژارت»، لهه‌ڤهاتن ب ره‌ژیمێ ره كر، لێ به‌لێ هه‌ر تشت ژ بۆ به‌رژه‌وه‌ندیا ره‌ژیما به‌شار ئه‌سه‌د، رووسیا فه‌ده‌رال، ئه‌مه‌ریكا و تركیێ، ئه‌نجام دا، تنێ شكه‌ستن ژبۆ دۆزا گه‌ل هشت.
وه‌كه كادره‌كێ دێرینێ پارتییا كاركه‌رێن كوردستانێ و كه‌سه‌كێ نێزی ئۆجالان، مه‌زلووم كۆبانی وه‌ختا كو ل ڤێ داویێ به‌رنیاسبوونا وی مه‌زن بووی و هنه‌كی ب ته‌له‌فوونێ ل گه‌ل سه‌رۆكێ ئه‌مه‌ریكایێ نیقاش كری، ناڤێ قه‌هره‌مان و ئه‌ندازیارێ تێكلیێن ئه‌مه‌ریكا و رۆژئاڤا لێ هات كرن، لێ د راستی ده، ئه‌و نیقاشێن وی و دۆنالد ترامپ نه یێن ئه‌مه‌ریكا و رۆژئاڤا بوون، لێ به‌لێ نیقاشا سه‌راستكرنا ڤالاكرنا ناڤچه‌یا رۆژهلاتا فراتێ بوو ژ هێزێن مه‌زلووم، له‌و سه‌رۆك ترامپ ئه‌و ب جه‌نه‌رالێ گوهدارێ خوه‌شتڤی ب ناڤ كر.
په‌كه‌كه وێ مه‌زلووم كۆبانی ب ده‌ردێ فه‌رماندار عه‌گید ببه
ئه‌گه‌ر چ بازارا مه‌زلووم كۆبانی نها گه‌رم و گوره، لێ د راستی عورف و خوه‌زایا پارتییا كاركه‌رێن كوردستانێ په‌كه‌كێ ده، نه‌بوویه كو كه‌سه‌ك ل ناڤا گه‌ل و قادا ناڤنه‌ته‌وه‌ئی به‌رنیاس ببه و ئه‌ڤ یه‌ك ژ بۆی نه‌ببه پرۆبه‌لم، میناكێن ئه‌ڤێ یه‌ك زۆرن، وه‌كه فه‌رماندارێ ئه‌فسانه‌یی یێ په‌كه‌كێ «مه‌عسووم قۆرقماز» ناسیار ب «عه‌گید» وه‌ختا كو ل سالا 1984ان بۆ جارا یه‌كه‌مین هێزا رزگارییا كوردستانێ «HRK» دامه‌زراند و ب وێ یه‌كێ په‌كه‌كێ ده‌ست ب ته‌كۆشینا چه‌كداری كر، ئه‌و ب یه‌ك ژ مه‌زنترین و ب باندۆرترین شۆرشگێرێن باكوورێ كوردستانێ یێن د ناڤا په‌كه‌كێ ده د مێژوویا سه‌ده‌یا رابووری ده تێ ناسكرن، هه‌ر ژ به‌ر ڤێ ئه‌گه‌رێ ب سه‌دان زارۆیێن كورد پێ هاتن ناڤكرن، لێ به‌لێ ئه‌ڤ فه‌رماندارێ ئه‌فسانه‌یی ل 28 ئادارا سالا 1986ان واته پشتی دو سالان ژ به‌رنیاسبوونا وی، ل هه‌رێما بۆتان یا باكوورێ كوردستانێ د بوویه‌ره‌كه مژه‌وی ده تێ شه‌هید كرن هه‌ر چه‌ند په‌كه‌كه دبێژه شه‌هید عه‌گید ب ده‌ستێ دژمن هاتیه كوشتن، لێ به‌لێ د راستی ده گۆمانا هه‌ری مه‌زن یا كوشتنا عه‌گید ژ په‌كه‌كێ تێ كرن.
گه‌ر ل ڤێ دیرۆكا نوو بفكرین مه‌زلووم كۆبانی ل سه‌ر هه‌مان رێیا شه‌هید عه‌گید دچه، هه‌ری كێم سه‌ركرداتیا په‌كه‌كێ وه‌ها لێ د نیره، لێ گه‌لۆ دبه كو په‌كه‌كه ب بریارا ئیمرالیێ سیناریۆیه‌كه وه‌كه سیناریۆیا ب گرتن دانا سه‌لاهه‌تین ده‌میرتاش هه‌ڤسه‌رۆكێ پارتیا ده‌مۆكراتیك یا گه‌لان هه‌ده‌پێ و سیناریۆیا كوشتنا فه‌رماندار عه‌گید و كوشتنا چه‌تین گۆنگۆر یێ یه‌ك دامه‌زرێنه‌رێ په‌كه‌كێ، ژ بۆ مه‌زلووم كۆبانی ژی درست نه‌كه؟.
