یه‌كیتیا نشتیمانی یا كوردستانێ ژ سازكرنا كۆنگره‌یا خوه یا 4مین نێزیك دبه و پلان هه‌یه ل 7 دیسامبه‌را ئیسالێ برێڤه بچه، لێ به‌لێ فره‌جه‌مسه‌ری ل گه‌ل نێزیبوونا وه‌ختا كۆنگره‌ی دژوار دبه، ئه‌ڤ یه‌ك ژ داخوه‌یانی یێن ئه‌ندامێن پۆلیتبیرۆ و ئه‌نجوومه‌نا سه‌ركرداتیا ب زه‌لالی تێ دیتن.
مه‌حموود سەنگاوی، ئەندامێ پۆلیتبیرۆ یا یەکێتیا نشتیمانی هنه‌ك مژار ل ده‌ربارا كۆنگره‌ی زه‌لال كرن و گۆت: «من بریار دابوو کو جارەکە دن خوە ژ بۆ سەرکرداتیا یەنەکێ کاندید نەکم و رێیێ ل هەمبەر گه‌نجێن یەکیتیێ خوەش بکم کو بگه‌هن سەرکرداتیێ، لێ بەلێ نها نە ئەڤ سەردەمە کو ئەز خوە کاندید نەکم ژبۆ سەرکرداتیێ»، ب گۆتنه‌كه دن، سه‌نگاوی ل ڤر ب ئەشکەرە دبێژە کو د ڤێ سەردەمێ دە گه‌نجێن د ناڤا یەکیتیێ دە ب كار سەرکرداتیا یەنەکێ ناهێن کو بێ گومان مەبەستا سەرەکە یا ئاخافتنا سەنگاوی «باڤل تالەبانی و لاهۆرێ شێخ جەنگی» نە.
هەر وها د بەشەکە دن یا ئاخافتنێن خوە دە سەنگاوی دبێژە کو ئامادەکاریێن ساز کرنا کۆنگرەیا 4مین یا ڤێ پارتیێ ب باشی برێڤە دچن، و ب تەنێ هلبژاردنێن د ناڤا مەلبەندان دا مانە کو كاندید بهێن دەست نیشان کرن ژ بۆ کۆنگرەیێ.
پاشخستنا كۆنگره‌ی خه‌ته‌ره و بالێن یه‌نكێ ته‌نازولێ ژ بۆ هه‌ڤ ناكن
سەنگاوی دیسان ئاخافتنا خوە بەردەوام دکە و دبێژە: «ئەم هێڤی دکین کۆنگرە د وەختا خوە دە بێ گرێدان، گەر چەند رۆژان پێش یان پاش بکەڤە، دبە ئەڤ یەک نەبە سەدەما درست بوونا چ پرسگرێکان»، ئانکو ل ڤر ئەڤ ئەندامێ پۆلیتبیرۆ یا یەنەکێ هوشداریێ د دە پارتیا خوە و ژێرە دبێژە گەر کۆنگرە پاشبکەڤە دبە پرسگرێک دەرکەڤن هۆلێ ژ بۆ پارتیێ.
هەرکو دچە و یەنەکە پێتر نێزی رۆژا گرێدانا کۆنگرەیا خوە دبە، لێ به‌لێ ناکۆکیێن د ناڤبەرا بالو جه‌مسه‌رێن جودا یێن یەنەکێ زەلال تر دەردکەڤن، ئەڤ ناکۆکی یە نها گهانە ئاستەکە پر خه‌ته‌ر کو دبە ببن سەدەما کۆشتن و ئالۆزکرنا رەوشا باشووری کوردستانێ ژبەرکو هەموو بالێن د ناڤا ڤێ پارتیێ دە ل سەر ئاخافتنا خوە مۆکرن و تەنازولێ ژ بۆ بالێ دن ناکن.
تێ زانین کو پاش مرنا جەلال تالەبانی سەکرەتەرێ گشتی ئێ یەنەکێ ئەڤ پارتی یە پێتر ژ هەر دەمەکە دن کەتیە د ناڤا ئالۆزیێن ناڤخوە دە، ئەڤ ئالۆزی گهان ئاستەکە وها کو بالەکە دیارکری د ناڤا ڤێ پارتیێ دە بێ زڤرین ل سەرکرداتیا یەنەکێ ل سالا 2017ان دە پیتر ژ نیڤا خاکا باشوورێ کوردستانێ د ئیخانەتەکە نشتیمانی دا ب قاسم سولەیمانی یێ بەرپرسێ سپایێ قودسێ ئیرانێ فرۆت، ئەڤ بوو سەدەما وێ یەکێ کو جێگرێ سەکرەتەرێ یەنەکێ کۆسرەت رەسوول عەلی پاش ڤێ ئیخانەتێ بەیانەکە نڤیسکی دەرکەت و تێدا ڤێ گرۆپا یەنەکێ ب «کالفام» ناڤ بکە.
