ژ ده‌ستپێكا خوه‌پێشاندانێن ئیراقێ 437 خوه‌پێشانده‌ر هاتنه كوشتن و 19 هزارێن دن بریندار كه‌تنه، ژ سه‌رجه‌ما ڤان كه‌سان، پرانیا هه‌ری زێده خه‌لكێ سڤیله.
چاڤكانیێن ساخله‌مییا ئیراقێ ئیرۆ رۆژا دوشه‌می 2/12/2019ێ ئه‌شكه‌ره كر، ژ ده‌ستپێكا خوه‌پێشاندانان كو ل 25 جۆتمه‌تا ئیسالێ بوون و هه‌یا نها، 437 خوه‌پێشانده‌ر هاتنه كوشتن، 19458 خوه‌پێشانده‌رێن دن بریندار كه‌تنه.
هه‌ر وها ده‌ست نیشان كر، پرانیا هه‌ری زێده یا كه‌سێن خوه‌پێشانده‌ر كو جانێ خوه ژ ده‌ستدانه، خه‌لكێ سڤیله و هه‌ر هه‌موو ب ته‌قه‌یا راسته راست یا هێزێن ئه‌وله‌هیێ و بۆمبێن غازا رۆندكرێژ هاتنه كوشتن و بریندار كرن.
هه‌ر د ڤێ ده‌ربارێ ده، كۆمسیۆنا مافێن مرۆڤان یا ئیراقێ ئامارا زرارێن جانی یێن خوه‌پێشاندانان وه‌شاند و ل گۆر وێ 400 خوه‌پێشانده‌ر هاتنه كوشتن و پێتر ژ 16 هزار كه‌سێن دن بریندار كه‌تنه.
خوه‌پێشاندانێن ئیراقێ ل 25 جۆتمه‌ها ئیسالێ ل دژی گه‌نده‌لی، هه‌ژاری و خرابیا ره‌وشێ ده‌ست پێ كرنه، پشتره ئالۆزی و خوینرێشتن كه‌تن تێده و خوه‌پێشانده‌ران ئێدی ژ ناڤچوونا هكوومه‌تێ داخواز كر.
سه‌رۆك وه‌زیرێ ئیراقێ عادل عه‌بدولمه‌هدی ل ئینیا ده‌رباسبوویی 28/11/2019ێ ل سه‌ر بانگا لێڤه‌گه‌ریا بلند و خوه‌پێشانده‌ران ده‌ست ژ كار كێشا، پشتی كو پێتر ژ 400 كه‌سان د بزاڤا بێده‌نگ كرنا خوه‌نیشاندانان دا هاتنه كوشتن.
