رێڤه‌به‌رییا خوه‌سه‌ر پشتی مالوێرانیێ‌ ده‌ریێ لهه‌ڤهاتنێ ڤه‌كر

رێڤه‌به‌رییا خوه‌سه‌ر پشتی مالوێرانیێ‌ ده‌ریێ لهه‌ڤهاتنێ ڤه‌كر

رێڤه‌به‌رییا خوه‌سه‌ر یا باكور و رۆژهلاتا سووریێ، بریار دایه‌ كو ئه‌نجوومه‌نا نشتیمانیا كوردی «ئه‌نه‌كه‌سه‌» ئۆفیسێن خوه‌ ل رۆژئاڤا ڤه‌كه‌ت و ده‌ست ب كارێ سیاسی بكه‌ت، ئه‌ڤ یه‌ك هه‌ر چه‌نده‌ پشتی مالوێرانیه‌كه‌ مه‌زن تێ، لێ ب ده‌ستپێكه‌كه‌ گه‌ش ژ بۆ یه‌ك گۆتاری یا سیاسی یا كوردێن رۆژئاڤا تێ حه‌ساب كرن.

رێڤه‌به‌رییا خوه‌سه‌ر ل سێشه‌می یا رابووری 17/12/2019ان و ل سه‌ر ده‌ستپێشخه‌ریا فه‌رماندارییا هێزێن سووریایا ده‌مۆكراتیك هه‌سه‌دێ، بریار دا‌ كو رێ ب ئه‌نجوومه‌نا نشتیمانیا كوردی ل سووریێ ئه‌نه‌كه‌سێ بهێت دایین ئۆفیسێن خوه‌ ل رۆژئاڤا كوردستانێ ڤه‌كه‌ت و بێی ده‌ستوورا ئه‌وله‌كاریێ یا چ ئالییه‌كی وه‌ربگره‌ چالاكیێن خوه‌ یێن سیاسی، جڤاكی و مه‌دیایی بده‌ مه‌شاندن.

هه‌ر وها دیار كر، ئه‌نه‌كه‌سێ ئێدی پێویستی ب چ ده‌ستووری و مۆله‌تێن پێشوه‌خت نینه‌ ژ بۆ كو چالاكیێن خوه‌ ل رۆژئاڤا كوردستانێ بكه‌.

رێڤه‌به‌ریا خوه‌سه‌ر هه‌موه‌خت د به‌یانه‌كه‌ نڤیسكی ده‌ ده‌ست نیشان كریه‌، هه‌موو دۆزێن ل ده‌رهه‌قا كه‌ساتی و سه‌ركرده‌یێن ئه‌نه‌كه‌سێ یێن ل ده‌رڤه‌ی ولات بهێن هلوه‌شاندن، پشت راست كریه‌ كو ئێدی ت پرسگرێك ل همبه‌ر وان نینه‌ و ئه‌و د كارن ڤه‌گه‌رن رۆژئاڤا و سه‌ربه‌ست ده‌ست ب خه‌باتا خوه‌ بكن.

رێڤه‌به‌ریا خوه‌سه‌ر دبێژه‌: «ل ده‌ربارا مه‌له‌فا گرتییان، ئه‌نه‌كه‌سێ لیسته‌كا 10 كه‌سی دایه‌ هه‌سه‌دێ و وان ژی كۆمیته‌ك راسپاردیه‌ و دێ ئه‌نجامێن له‌كۆلینێ دگه‌ل ئه‌نه‌كه‌سێ و هه‌سه‌دێ ل وه‌خته‌كا نێزیك بهێن شۆپاندن».

پشتی مالوێرانیه‌ك پر مه‌زن گاڤه‌ك پر باش لێ

بریارا ئاشتیێ یا رێڤه‌به‌ریا خوه‌سه‌ر ل گه‌ل ئه‌نه‌كه‌سێ هه‌ر چه‌ند كو بریاره‌ك‌ باشه‌ و هه‌گه‌ر نیاز پاكی تێده‌ هه‌به‌ و چ تاكتیك ل پشت نه‌به‌، ب ده‌ستپێكه‌كه‌ هه‌ری باش ژ بۆ یه‌كخستنا گۆتارا سیاسی یا كوردی تێ حه‌ساب كرن، لێ گاڤه‌كه‌ دره‌نگ وه‌خت بوو و پشتی مالوێرانیه‌كه‌ مه‌زن هاتییه‌ ئاڤێتن.

ده‌ستهلاتا رۆژئاڤا هه‌ر ل ده‌ستپێكا ئاڤابوونا وێ سیاسه‌ته‌كه‌ تاكره‌و و دوژمنكارانه‌ ل دژی هێزێن كوردی ل رۆژئاڤا بكارئانی، ل همبه‌ر وێ ده‌ستهلاتێ سیاسه‌تا خوه‌شرینكرنێ ل به‌رانبه‌ر هێزێن ئه‌ره‌ب بكارئانی، میناك‌ وه‌ختا كو پارتیا یه‌كیتیا ده‌مۆكراتیك په‌یه‌دێ هه‌ردو لهه‌ڤهاتنێن هه‌ولێر و دهۆكێ بنپێكرین، دوژمناتیا ل گه‌ل هێزێن كوردی دژوارتر كر، ل هه‌مان ده‌مێ وێ سیاسته‌‌كه‌ نه‌رم ل به‌رانبه‌ر هێزێن ئه‌ره‌ب بكارئانی، هه‌یا كو د سازیا سه‌ربازی ژی ده‌، ناڤێ كورد تێده‌ بكارنه‌ئانی، ژ بۆ كو ره‌وشا ئالیێن ئه‌ره‌ب ل به‌رچاڤ وه‌ره‌ وه‌رگرتن.

چاڤدێرێن كو ره‌وشا رۆژئاڤا كوردستانێ د شۆپینن ب باوه‌رن كو، هه‌گه‌ر ل ده‌ستپێكێ په‌یه‌ده‌ پابه‌ندی ب لهه‌ڤهاتنێن هه‌ولێرێ و دهۆكێ كربا  و سیاسه‌ته‌كه فره‌ئالی مه‌شاندبا، رێ دابا پێشمه‌رگه‌هێ رۆژئاڤا ته‌ڤلی هێزێن دن ببا، هه‌ر وها دورشمێن په‌كه‌كێ بكارنه‌ئانیبان و بریارا خوه‌ نه‌دابان ده‌ست قه‌ندیلێ، وێ چاخێ دبوو ره‌وش نه‌گه‌هشتبا وێ ئاستا كو ترك فكر ل هێرشا داگیركاریێ بكن، بلا په‌كه‌كێ ئه‌و یه‌ك فێهم كربا كو ده‌وله‌تا تركیێ ت جاره‌كێ رازی نابه‌، ستاتۆیه‌ك ل سینۆرێ وێ دروست ببه و‌ ده‌ستهلاتداریا وێ ستاتۆیێ دارده‌ستێن په‌كه‌كێ بن.

په‌كه‌كێ ل هه‌ر جهه‌كێ حزبه‌كه‌ پاشكۆ چێكربه‌ زیان گه‌هاندیه‌ گه‌لێ كورد

چاڤدێر دبینن، پێویسته‌ كو په‌كه‌كه‌ وێ راستیێ باش بزانه‌ كو مه‌یدانا خه‌باتا وێ ته‌نێ باكورا كوردستانێ یه‌ و ب ئاڤاكرنا پارتیێن پاشكۆ ل په‌رچه‌یێن دن یێن كوردستانێ تو مفایه‌ك ژبلی ئالۆزكرنا ره‌وشێ و مالوێرانیێ ژ بۆ گه‌لێ كورد تێده‌ نینه‌.

نه‌رینا چاڤدێران وهایه‌: «وه‌ختا یه‌ك حزبیێ ل چ ده‌رێن جیهانێ نه‌مایه‌، ته‌نێ هه‌گه‌ر سیسته‌م دیكتاتۆری نه‌به‌، هه‌موه‌خت تاك ئایدۆلۆژی و تاكره‌ویێ ل هه‌موو جیهانێ تووشی شكه‌ستنێ بوویه‌، ژ به‌ر كو د دیرۆكێ ده‌ نه‌بوویه‌ كو حزبه‌كێ ب ته‌ك ئایدۆلۆژیێ هه‌ر چ ئایدۆلۆژیا به‌، كاری به‌ ماف و ئازادییان بۆ جڤاكا خوه‌ دابین بكه‌. ب عه‌كس فره‌ئالی، فره‌ ئایدۆلۆژی و فره‌حزبی نها بوونه‌ سیسته‌م و ئالاڤا پێشكه‌تنا ولات و هه‌رێمان، میناكا هه‌ری زه‌لال باشوورێ كوردستانێ یه‌ كو بوویه روویێ راستینێ ده‌مۆكراسیێ».

میناكا دن ژی ل جیهانێ ئه‌وه‌ كو ژناڤبرنا بلۆكا كۆمۆنیستیێ نه‌ پیلانه‌كه‌ سه‌رمایه‌داری بوو، به‌لكو ب سه‌ده‌ما نه‌بوونا ماف و ئازادییان بوو، هه‌ر وه‌ك وان لڤینێن د ولاتێن ئه‌ره‌ب ده‌ ده‌ركه‌تن هۆلێ كو ب سه‌ده‌ما وێ یه‌كێ بوو ده‌ستهلاتدارێن وان ب درێژاهیا گه‌له‌ك سالان بزاڤا چێكرنا وه‌هما عرۆبه‌تێ و ژناڤبرنا ئیسرائیلێ د دان مه‌شاندن، لێ ل داویێ ژ بۆ گه‌ل ئه‌شكه‌ره‌ بوو كو ئه‌ڤ یه‌ك ته‌نێ وه‌همه‌كه‌ و چ تشتێ دن ژ بۆی نینه‌.

له‌ورا پێویست ناكه‌ت گه‌لێ كورد ب ده‌هان سالێن دن ژی ل به‌رخوه‌ بدن هه‌یا كو بزانن كو تاك ئایدۆلۆژی نه‌ تنێ چ مفایه‌كێ خوه‌ نینه‌، به‌لكو دێ بته‌ ژێده‌رێ شكه‌ستنێن مه‌زن، ئه‌وا په‌كه‌كه‌ ژی دگه‌ل جڤاكا كوردی دكه‌، ته‌نێ دوباره‌كرنا ئه‌زموونا ئایدۆلۆژینێن شكه‌ستی یێن جیهانێ یه‌.

پوستێن ھەمان بەش