خوه‌راده‌ستكرنا ئۆجالان بۆ تركیێ و ده‌ركرنا بریاران د ئیمرالیێ دە

ئەمێ د نڤیسینێن بهێت دە شرۆڤەیا وێ یەکێ بکین کو ب ت ئاوا ئۆجالان بوویە داردەستێ ترکیێ ل دژی کوردان و ب ت ئاوا ئۆجالان بوویە شیرەتکار و مامۆستەیی دەولەتا ترکیێ، میناکا هەری بەرچاڤ ژی هەلوه‌ست و داخویانیێن ئۆجالانن ل دژی ئاڤاکرنا دەولەتا کوردی کو ب ت ئاوا ناخوازه‌ ئەڤ دەولەتە ژ کوردان رە وەرە ئاڤا کرن و ئەڤ یەک ب پەکەکێ رە ژی دایە قەبوول کرن.

په‌كه‌كه‌ ل وێ باوه‌رێ یه‌ كو ئۆجالان د پیلانه‌كه‌ ناڤده‌وله‌تی ده‌ هاتیه‌ گرتن

ل 15ێ شوباتا سالا 1999ان دە، عه‌بدوللا ئۆجالان رێبەرێ پارتا کارکەرێن کوردستانێ پەکەکێ ل ولاتێ کینیایێ تێ دەستەسەر کرن، پەکەکە دەستەسەرکرنا ئۆجالان ب پیلانەکە ناڤدەولەتی د دە زانین، لێ ئایا ب راستی ژی ئەڤ یەک وهایە؟ یان ژی ئۆجالان ڤەگەری مالا خوە تاکو بریارێن دەولەتێ ب گوهێ کوردان دە بانگ بکە؟

د ئه‌ڤی بابه‌تێ ده‌ به‌رسڤا ئه‌ڤان پرسان هه‌یه‌:

  • ئۆجالان د پیلانه‌كه‌ ناڤده‌و‌له‌تی ده‌ هات گرتن یان ئه‌و ب حه‌زا خوه‌ ڤه‌گری تركیێ؟

  • ئه‌و كیژان گۆتنا رێبه‌ر ئاپۆ بوو كو په‌كه‌كێ د خوه‌ست ب گه‌ل ره‌ بده‌ ژبیر كرن؟

  • ئه‌خلاقێ رێبه‌ر ئاپۆ د راستا هه‌ڤالرێیێن وی ده‌ چ بوو؟

  • وه‌ختا ئاپۆ هاتییه‌ گرتن و هێژان د باله‌فرێ ده‌ چ گۆتبوو؟

د پرتووکا (دیرۆکەک ژ ئاگری) کو پێک دهێت ژ هنه‌ك هەڤپەیڤینێن جەمیل باییک ل گەل حەسەن جۆدی دە، باییک و پەکەکە ب هەموو ئاوایەکی هەول ددن گرتنا ئۆجالان وەکە پیلانەکە ناڤدەولەتی ب بەشدارییا هەر یه‌ك ژ «یەونانستانێ، ئیتالیا، مسر، به‌ریتانیا، سووریێ، ئیسرائیل، ئەلمانیا، ئەمەریکا، کینیا و ئیراقێ هه‌ر وها پەدەکێ و یەنەکێ» بدن ناساندن، لێ بەلێ راستی تشتەکە دنە، ئەو تشت ژی ئەڤە کو ئۆجالان ب كێفا دلێ خوە ڤەگەری ترکیێ.

پەکەکە دبێژە: «ئۆجالان ب پیلانگێرییەکە ناڤده‌وله‌تی هاتییە دەستەسەرکرن»، لێ بەلێ ئۆجالان ب خوە ڤه‌گه‌رییه‌ ترکیێ و تو پیلانەکە ناڤدەولەتی ل دژی ئۆجالان نەبوویە، ئۆجالان ب خوە بوو کو دخوه‌ست ڤه‌گه‌ره‌ ترکیێ، به‌لگه‌ ل سەر وێ یەکێ پڕن، لێ دبە ئەڤ ئاخفتنا ئۆجالان کو دبێژە پەکەکێ «یان دبە پەکەکە خوە ب گوهه‌رە یان ژی ئەزێ ژ پارتییا هەوە جودا ببم» باشترین به‌لگه‌ بە ل سەر ئاخفتنا مە، ئەڤ ئاخفتن ژی دیسان د پرتووکا (دیرۆکەک ژ ئاگری) ده‌ ل لاپەرا 539ان دە ب روهنی هاتییە باس کرن، گەلو قه‌ی مەبەستا ئۆجالان ژ خوە گۆهەرینا پەکەکێ چ بوویە؟

جەمیل باییک ل سەر دەرکەتنا ئۆجالان ژ ولاتێ سووریێ و نەچوونا ئۆجالان ژ بۆ چیا و چوونا  ژ بۆ ئەورۆپایێ دبێژە: «ژ بەر کو سووریێ رێبەر ئاپۆ وەکە مێهڤان چەندین سالان قەبوول کربوو، تا کو چ زیان ب سووریێ نەکەڤن، سەرۆک ناچار دبە سووریێ ب جی بهێلە، ژ بەر کو د ئەخلاقێ ئاپۆ دە نینە کەسەکێ کو ئالیکارییا وی کربە تووشی پرسگرێکان بکە»، باییک بەردەوامیێ د دە ئاخفتنا خوە و دبێژە: «ئەخلاقەکێ سەرۆک هەیە، گەر کەسەک دوستاتییا سەرۆک بکە، سەرۆک رێزێ ل وێ دوستاتیێ دگرە، گەر سووریێ مێهڤاندارییا سەرۆک کربە و نها ژ بەر مانا سەرۆک ل سووریێ، خەتەر بكه‌ڤه‌ سەر سووریێ، سەرۆک ژ ئالیێ ئەخلاقی ڤه‌ نەدکاری وێ یەکێ قەبوول بکە».

هه‌ر وها دبێژه‌: «گەر خەتەرەک هەبە بلا ژ ویرە بە نەک هه‌ڤالێ وی»، ل ڤر پێویسته‌ ئەم ڤێ پرسێ بکین، گەلۆ ما قەی باشوورێ کوردستانێ ب هەموو پارتیێن خوە ڤە ب تایبەتی پارتییا دەموکرات یا کوردستانێ، چه‌ند هاریكارییا پەکەکێ و سەرۆکێ وان کرییە کو هازر بوون باشوور بێخن خەتەرێ و ترکیێ راکێشن باشوور و ئەو ب خوە ژی شەری ل دژی باشوور بکن؟

به‌را كو چ گڤاشتنه‌ك ل سه‌ر بهیت كرن رێبه‌ر ئاپۆ گۆت: «ئه‌ز ژ بۆ خزمه‌تكرنا ده‌وله‌تا تركیێ ئاماده‌مه‌»

هەر چاوا بە د وه‌ختا گرتنا ئۆجالان دە ل کینیایێ، پەکەکە مژۆلی ل دارخستنا 6مین کۆنگرەیا خوە بوو، پاش کو ئۆجالان تێ گرتن قۆناغەکە نوو یا ژیانا پەکەکێ ل ئیمرالیێ دەست پێ دکە، پەکەکێ د خوەست ئاخفتنەکا رێبه‌ر ئاپۆ ژبیرا گه‌ل ببه‌ و ژ بۆ وێ یەکێ هەموو رێ بکارئانین و تا رادەیەک مەزن کارین سەرکەتنێ تێدە بینن، ئەو ئاخافتن ژی ئەڤ بوو «ئەز ژ بۆ خزمەتکرنا دەولەتا ترکیێ ئامادەمە».

 گەلۆ چما ئۆجالان کو د دیتنا ئالیگرێن پەکەکێ دە ژ (ماهماتا گاندی، نیلسۆن مانێلا، جی گیڤارا) پر ژ بۆ گه‌لێ خوه‌ ب هەیبەت تر، زاناتر و دلسۆزترە، لێ به‌لێ به‌را کو ت گڤاشەک ل سەر ئاپۆ وەرە کرن و هێژان ئه‌و د بالەفرێ دە بوو وه‌ختا ئه‌و ئاخفتن كری، گەر ب راستی ژی وی ژ بۆ خزمەتکرنا ترکیێ خەبات نەکربە؟

ئۆجالان هه‌ر تشت ل دادگه‌هێ فرۆت، په‌كه‌كه‌ هه‌ڤال رێ و ولات

«رێ بدن خزمەتا دەولەتا ترکیێ بکم، ل بەرانبەر ڤێ خزمەتێ ئەزێ ت تشتا ژ هەوە داخواز ناکم، گەلێ کورد هەیا نها پەیڤا کوردستان بکار نەئانیە، ئەڤ یەک ژ بۆ دەولەتا ترکیێ هێزەک نوو و مەزنە»

ئۆجالان ل دادگەها بلند یا ترکیێ، ناڤێن هەموو کەسێن ئالیکاری پێشکێشی پەکەکێ کری گۆتن، ب وێ یەکێ ژیانا سەدەهان کوردێن ولاتپارێز خستە بن خەتەرا گرتن و کوشتنێ، دیسان د ئاخفتنێن خوە دە ل همبەر دادگەها ترکیێ ئۆجالان دبێژە: «رێ ب من بدن خزمەتا ترکیێ بکم، ئەزێ د دەما 6 مه‌هان دە پەکەکێ بێ چەک بکم، شەرێ پەکەکێ ب دەولەتێ رە شاشیەکه‌ مەزن بوو، پێویست بوو پەکەکێ شەر ب ترکیێ رە نەکربا، دۆران کالکان و جەمیل باییک دو کەسێن خەتەرن، من ب زەهمەت ئەو کۆنترۆل دکرن».

ل ڤر ئه‌شكه‌ره‌ دبە کو ئۆجالان ل دژی ئاخفتنا خوە یا بەرێ دەردکەڤە، وه‌ختا باییک گۆتی: «د ئەخلاقا سەرۆک دە نینە کەسەکێ کو هەڤالتییا وی کربه‌، بێخە د خەتەرێ ده‌»، ئۆجالان هەر زوو نێزیترین کەسێن خوە د فرۆشە دەولەتێ کو ئەوژی (باییک و کالکان) بوون.

ئۆجالان د بەردەوامییا ئاخافتنا خوە دە دبێژە: «رێ بدن خزمەتا دەولەتا ترکیێ بکم، ل بەرانبەر ڤێ خزمەتێ ئەزێ ت تشتا ژ هەوە داخواز ناکم، گەلێ کورد هەیا نها پەیڤا کوردستان بکار نەئانیە، ئەڤ یەک ژ بۆ دەولەتا ترکیێ هێزەک نوو و مەزنە، ل سەر (بارزانی و تالەبانی) ژی ئۆجالان ئاخفتنێن وها کێم دبێژە کو ب ت ئاوایەکێ د ئاستا کەسەکێ دە نینە، کو خوە ب سەرۆک و مەزن و سیاسیەک ژیر بدە ناس کرن.

ئۆجالان دەما تێ گرتن ب ت ئاوایەکێ ب یەک پەیڤ ژی پالپشتیێ ل شەرێ پەکەکێ ل دژی دەولەتا ترکیێ ناکە، سەروبن ئۆجالان بوو هێزەک ژ بۆ جێبەجێکرنا پۆلەتیکایا دەولەتا ترکیێ ب تایبەت د قۆناغا پاش سالا 2004ان.

 ئەمێ د نڤیسینێن بهێت دە شرۆڤەیا وێ یەکێ بکین کو ب ت ئاوا ئۆجالان بوویە داردەستێ ترکیێ ل دژی کوردان و ب ت ئاوا ئۆجالان بوویە شیرەتکار و مامۆستەیی دەولەتا ترکیێ، میناکا هەری بەرچاڤ ژی هەلوه‌ست و داخویانیێن ئۆجالانن ل دژی ئاڤاکرنا دەولەتا کوردی کو ب ت ئاوا ناخوازه‌ ئەڤ دەولەتە ژ کوردان رە وەرە ئاڤا کرن و ئەڤ یەک ب پەکەکێ رە ژی دایە قەبوول کرن.