كه‌جه‌كێ دیار کو کۆمکوژییا مەره‌شێ دڤێ تەنێ وەکە کۆمکوژییا ل سەر کوردێن عەلەوی نەیێ دیتن و دەست نیشان کر ته‌كوشینا پرئالی وێ بدۆمە.
كه‌جه‌كێ د به‌شه‌كه دن یا به‌یانا خوه ده سۆزا خه‌باتا ژ بۆ تركیێ دوپات كرییه و گۆتییه: «د سالڤه‌گه‌را 41ان یا كۆمكوژییا مه‌ره‌شێ ده، ئه‌م هه‌موو كوردێن عه‌له‌وی و شۆره‌شگه‌رێن كو شه‌هید بوونه ب رێزداری ڤه ل بیر تینن، ئەم دیسا سۆند دخون کو ئەمێ ل ته‌کۆشینا خوە یا ژبۆ ترکیەیا دەمۆکراتیک بدۆمینن».
ل 19 مه‌ها دیسامبه‌را سالا 1978ێ، هێزێن ده‌وله‌تا داگیركه‌را ترك ل باكورێ كوردستانێ و ل باژارێ مه‌ره‌شێ، كوردێن عه‌له‌وی ئارمانج كرن، نێزیكی 500 كوردان ب ئه‌شكه‌نجێ كوشتن، دۆزێن ل ده‌ربارا ڤێ كۆمكوژییێ هه‌یا سالا 1991ێ به‌رده‌وام كرن.
ل مه‌ره‌شێ هێزێن گرێدای ده‌وله‌تێ پلانه‌ك بكارئانی و وان ده‌ست ب كۆمكوژییه‌كه دژوار ل سه‌ر كوردێن عه‌له‌وی كر، ده‌ستپێكا بوویه‌رێ ل رۆژا 19/12/1978ێ بوو وه‌ختا كو د ناڤا «سینه‌ما راستگران» دا په‌قینه‌ك چێبووی، ئه‌و په‌قین ب ده‌ستێ ده‌وله‌تێ و ئالیێن راستگر هاتبوو پلان كرن، ژ بۆ كو هێجه‌تا كۆمكوژیێ بهێت درست كرن و ب ڤێ هێجه‌تێ ئێریشێن ل سه‌ر تاخێن كوردان ده‌ستپێكرن، ل هه‌مان رۆژێ 3 كوردێن عه‌له‌وی هاتن كوشتن و تركێن سوننه نه‌هێلان جه‌نازه‌یان راكن و ل مزگه‌فتێ بشوون، د ناڤبه‌را كوردان و راستگرێن تركێن فاشێست شه‌رێ كۆلانان ده‌ستپێكر، هه‌یا ل هنه‌ك مزگه‌فتان ژی مه‌لایێن ترك ده‌ست ب فه‌توایێ كرن و دگۆتن:«كی عه‌له‌ویه‌كی بكوژه به‌رانبه‌ری 5 حه‌جانه».
