یه‌كێتی یا نشتیمانی یا كوردستانێ كۆنگره‌یا خوه یا 4ێ ل ژێر ناڤێ «نوێبوونه‌وه» ساز كر و سه‌ركه‌تنا كۆنگره‌ی ژی د په‌یامه‌كێ ده ب زارێ د. به‌رهه‌مێ سالح راگهاند، وه‌كه به‌را كۆنگره‌ی یه‌كێتیێ سۆز دایی كو ئه‌ڤ كۆنگره دێ ژ بۆ راده‌ستكرنا ده‌ستهلاتێ و نووبوونێ به، یا راست ئه‌ڤ سۆز ب جی هات و ب باندۆرا راسته راست یا ئیرانێ هه‌ر چ سیاسییه‌كێ كو ده‌ستێن وی ل گه‌ل داگیركه‌ران، كه‌تن خه‌تا رێبه‌راتییا وێ پارتیێ و بالێ نشتیمانی و ره‌فه‌راندۆمچی ژی شكه‌ستن.
گه‌لێ كوردستانێ هه‌ر چه‌ند كو پشتی كۆنگره‌یا 4ێ ل به‌ندا یه‌كێتییه‌كێ بوو كو وه‌كه ناڤێ خوه ب كراسه‌كێ نشتیمانی و كوردستانی خوه نووكر با، لێ د هلبژارتنا ئه‌نجوومه‌نا گشتی یا سه‌ركرداتییا وێ ده، گرۆپا به‌رپرسیار ژ بوویه‌رێن «16 ئۆكتۆبه‌رێ» و راده‌ستكرنا كه‌ركووكا دلێ كوردستانێ، هه‌ر وها به‌رپرسیارێن ئه‌منی، سه‌ربازی، بازرگانی بوون سه‌ركێش، پرسا ل ڤر تێ كرن ئه‌وه گه‌لۆ ئه‌ڤ كه‌سێن كو خاكا ولات و پیرۆزی دانه داگیركاران، گه‌ل دێ چ كاره‌كێ نشتیمان په‌روه‌ری ژ وان چاڤه‌رێ بكه؟.
خه‌تا «لاهۆری – پاڤێلی» عه‌شقا ئه‌به‌دی یا داگیركاران
د هلبژارتنا ئه‌نجوومه‌نا گشتی یا سه‌ركرداتییا یه‌كێتیێ ده، بالێ «لاهۆر شێخ جه‌نگی» ل ته‌ڤ بازنه و كۆمیته‌یێن یه‌كێتیێ پرانییا ئه‌ندامێن ئه‌نجوومه‌نا سه‌ركرداتیێ ب ده‌ست خستن، پشتره بالێ «پاڤێل تاله‌بانی»، بالێ «كوسره‌ت و مه‌لا به‌ختیار» كو گه‌ل وان ب نشتیمان په‌روه‌ر و ده‌ست پاك ناس دكن، هاتن دوور كرن و راستی شكه‌ستنێ هاتن.
گه‌ر پرس وه‌ره كرن ئایا ئه‌ڤ چ بوو؟ به‌رسڤ گه‌له‌ك كورت و زه‌لاله، ئه‌و ژی: ب قوده‌رتا ئیرانێ یه‌كێتی كه‌ت ده‌ست سالحان «خه‌تا لاهۆر و پشتره خه‌تا پاڤێل» واته عه‌شقا ئه‌به‌دی یا «په‌كه‌كێ، به‌غدا، ئه‌نقه‌ره و ته‌هرانێ» و «خه‌تا كۆسره‌ت» دووركه‌ت، ب گۆتنه‌كه دن، ئێدی ده‌وله‌تا نه‌ته‌وه‌یی ژ بۆ باشوور پێتر نێزی خه‌ونێ دبه.
ئیرانێ كو ب رێیا یه‌كێتیێ دژاتییا ره‌فه‌راندۆما سه‌رخوه‌بوونا باشوورێ كوردستانێ كر و سه‌ركه‌تن د ڤێ پیلانێ ده ئانی، پشتی 16 ئۆكتۆبه‌رێ ژی خوه‌ست خه‌تا «لاهۆر و پاڤێل» بهێز بكه و پیلانه‌كه موحكه‌م ژ بۆ دووركرنا وان سه‌ركرده‌یێن یه‌كێتیێ دا كو پشتگری ل ره‌فه‌راندۆمێ كربوون، ئه‌ڤ یه‌ك ژی ب پیلانێن قرێژ یێن «پاڤێل و لاهۆر» هات ئه‌نجامدایین و ئه‌و سه‌ركرده یه‌ك ب یه‌ك ب سووچێن جودا ژ ناڤه‌ندێن بریاردانێ دوور كرن، د كۆنگره‌یا 4ێ ژی ده، ئه‌ڤ پیلان ب داوی هات وه‌ختا «مالباتا شێخ جه‌نگی و مالباتا تاله‌بانی» و ئالیگرێن وان ب بالاده‌ستێن حه‌ساسترین ناڤه‌ندا بریاردانا یه‌كێتیێ ده‌ركه‌تین.
رۆبۆتێ پاڤێل كی یه؟
د كۆنگره‌یا 4ێ یا یه‌كێتیێ ده، 121 ئه‌ندام ژ بۆ ئه‌نجوومه‌نا گشتی یا سه‌ركرداتیێ هاتن ده‌ست نیشان كرن، ئه‌ڤ ئه‌نجوومه‌ن دێ كه‌سێ یه‌كه‌مێ یه‌كێتیێ ده‌ست نیشان بكه و چه‌ندین پۆستێن دن یێن هه‌ری گرینگ و د وه‌ختا 45 رۆژان ده، به‌را كو كۆنگره ده‌ست پێ بكه ناڤێ د. به‌رهه‌م سالح دهات گۆتن كو ببه سه‌كره‌ته‌رێ یه‌كه‌مێ یه‌كێتیێ، پشتره هنه‌ك سه‌ركرده‌یێن یه‌كێتیێ گۆتن كو مومكینه ل هه‌ر ده‌مێ ناڤ بهێ گوهه‌رین و كه‌سه‌كێ دن به، ل ڤر ژی ده‌ست نیشان كرنا وی كه‌سی كاره‌كێ ب زه‌حمه‌ت و ئاسێ نابه ژ بۆ ئه‌نجوومه‌نا گشتی، ژ به‌ر كو گۆتن و بریار یا ئه‌نجوومه‌نێ نابه، به‌لكو دێ یا ته‌هرانێ به، له‌وما دێ 2 ناڤێن دن كه‌ڤن د بازنه‌یا هه‌ڤركیێ ده ل سه‌ر وێ پۆستێ ئه‌و ژی «پاڤێل تاله‌بانی، لاهۆرێ شێخ جه‌نگی»، لێ به‌لێ ته‌هران ناخوازه ب وێ زه‌لالیێ ڤی كاری بكه به‌لكو ژێر ب ژێر ، ئه‌ڤ ژی ب وێ واتایێ تێ كه‌سێ كو دێ ببه سه‌كره‌ته‌رێ یه‌كێتیێ، پێویسته یه‌ك ژ زه‌لامێن پاڤێل و لاهۆر به، د لیستا سه‌ركرداتییا نوو یا یه‌كێتیێ ژی ده، پاڤێل ته‌نێ یه‌ك رۆبۆتێ زێده گوهداره هه‌یه كو ب «د. به‌رهه‌م سالح» تێ ناڤ كرن.
مالباتا تاله‌بانی VS مالباتا جه‌نگی
كۆنگره‌یا 4ێ یا یه‌كێتیێ 16 بازنه‌یێن هلبژارتنێ دانابوون، د پرانییا وان ده، بالێ مالباتا «شێخ جه‌نگی» و ئالیگرێن وان، سه‌ركه‌تن، ژ به‌ر كو لاهۆر كاره‌كی هه‌ری زێده و حساباتێن هه‌ری ده‌قیق دانابوون، مه‌رجێن ئه‌ندامبوونێ ژی د په‌یره‌وا یه‌كێتیێ ده، د به‌رژه‌وه‌ندییا ئالیگرێن خوه ده نڤیساندبوون.
هه‌ر وها ژ مالباتا جه‌لال تاله‌بانی، «قوباد تاله‌بانی» ب ته‌زكیه سه‌ركه‌ت، «پاڤێل تاله‌بانی» یێ برایێ وی دووه‌م پترین ده‌نگ ب ده‌ست خستن، لێ به‌لێ كه‌سێن كو «قوباد و پاڤێل» ل وان بازنه‌یان پشتگری لێ دكرن سه‌رنه‌كه‌تن، میناك «یووسف گۆران، ته‌حسین نامق و سه‌ركه‌وت كوبه».
«شاناز ئیبراهیم» كو ب میراتگرا ئیبراهیم ئه‌حمه‌د و مالا مام تێ حه‌ساب كرن، ته‌نێ كاری خوه سه‌ربێخت، چونكه ئه‌و همبه‌ری دژاتییه‌كه مه‌زن ژ ئالێ مالباتا «شێخ جه‌نگی» هاتبوو.
د. به‌رهه‌م سالح كو ل ڤێ داویێ ب سه‌ده‌ما جودابوونا وی ژ یه‌كێتیێ و ئاڤاكرنا وی بۆ پارتییه‌كه دن پێگه‌ها وی ل ناڤ یه‌كێتیێ لاواز ببوو، له‌ورا ئه‌و ب خوه ب ته‌زكیه سه‌ركه‌ت ب حوكمێ كو پۆسته‌كێ به‌رز ل به‌غدا ل سه‌ر حه‌سابا یه‌كێتیێ هه‌یه، لێ به‌لێ هه‌ڤال رێیێن وی خوه نامزه‌د نه‌كرن ژ به‌ركو وان به‌روه‌خت فێهم دكر كو ده‌رناكه‌ڤن، د. به‌رهه‌م ب خوه ژی ئاماده‌یا خوه به‌روه‌خت ژ بۆ بالێ «پاڤێل و لاهۆر» دیاركربوو كو ئه‌و ئاماده‌یه ببه سه‌كره‌ته‌رێ یه‌كێتیێ خوه ئه‌گه‌ر ته‌نێ شه‌كلی ژی به.
«كوسره‌ت ره‌سوول» و بالێ خوه پێگه‌ها خوه ژ ده‌ست دا و ته‌نێ ل بازنه‌یا هه‌ولێرێ هنه‌ك هه‌ڤالێن وی سه‌ركه‌تن و ل ته‌ڤ بازنه‌یێن دن شكه‌ستن خوار.
واته د ڤێ كۆنگره‌ی ده هه‌ر چ كه‌سێ زێده‌تر پاره و هێز د ده‌ست دابه سه‌ركه‌تن، كه‌سێن كو ناڤێ ره‌فه‌راندۆمچییان ژی لێ هاتنه كرن، راستی شكه‌ستنا مه‌زن بوون.
سه‌ركه‌تنا گرۆپا به‌رپرسیار ژ «16 ئۆكتۆبه‌رێ» و شكه‌ستنا ره‌فه‌راندۆمچییان د كۆنگره‌یا 4ێ یا یه‌كێتیێ ده، گه‌له‌ك واته و خواندن ژ بۆ هه‌نه، یا هه‌ری زه‌لال ئه‌ڤه كو بنگه‌ها نوو یا یه‌كێتیێ و سه‌ركێشێن وێ ژ پشتی 16 ئۆكتۆبه‌رێ، ب ته‌مامه‌تی ل دژی پارتییا ده‌مۆكرات یا كوردستانێ «رێبه‌را ره‌فه‌راندۆما سه‌رخوه‌بوونێ» فكرینه و ئێدی ل قۆناخێن پێشه‌رۆژێ ژی وێ ل دژی فكرا نه‌ته‌وه‌یی ب فكرن و پیلانێن خوه ئاڤا بكن.
