سوپایێ پاسدارێن ئیرانێ: ژ ترسا ئێریشا ئەمەریکا ئەم وها فکرین کو ئەو مۆشەکا كرۆزە و مە خستە خارێ

سوپایێ پاسدارێن ئیرانێ رادگەهینە ژ ترسا ئێریشا ئەمەریکا، بالەفرا ئۆکرانی ل مە ببو مۆشەکا كرۆز و مە ب مۆشەکەکێ لێدا و خستە خوارێ، لێ بەلێ ب تو ئاوا باس ل ڤێ یەکێ ناکە کو جما دەما 4 رۆژانە زانیاریێن درەو بەلاڤ دکە و دبێژن مە ئەو بالەفر نەخستیە خوارێ.

سەرێ سبەیا رۆژا چارشەمی، د مەکێ دە کو مەدیایێن رەژیما کۆمارا ئیسلامی یا ئیرانێ مژولی پرۆپاگندەیێن ئیریشا مۆشەکی یا سوپایێ پاسداران بۆ سەر پێگەهێن ئەمەریکا ل عەین ئەسەد و هەرێما کوردستانێ بوون و باس ل کوشتنا 80سەربازێن ئیەمەریکی وەکە “تۆلهلدانا ب زەبر”ا کوشتنا قاسم سولەیمانی فەرماندارێ کوشتی یێ فەیلەقا قودس ئا ئیرانێ بوون، د پەراوێزا نووچەیێن خوە دە ئاماژەیەک ب ڤێ یەکێ دا کو بالەفرا ئۆکرانی ژبەر پسگرێکەک تەکنیکی ل نێزی تەهرانێ کەتیە خوارێ.

هەر ل دەستپێکا کەفتنە خوارا بالەفرا بووینگ 737ێ هێلا فرۆکەڤانی یا ئۆکراینی، ئاژانسا ئەسۆشێتد پرێس، ژ زاردەڤێ کاربدەستێن ئۆکرانی بەلاڤکر کو سەرەرای حاشایی کرنا تەهرانێ، ئەو سەدەما ب هەڤدو کەتنا مۆشەک یان کریارەک تەرۆریستی ژ بۆ کەتنە خوارا بالەفرا ئۆکرانی ب دوور نابینن.

ئیران و رایەدارێن وێ یێن جودا هەر جۆرە ئەگەرەک ژ بلی ئەگەرا تەکنیکی ژ کەتنە خارا بالەفرا ئۆکرانی وەکە پێلانگری و شەرێ سایکۆلۆجی یێ دوژمن دهەسباند و دگۆت بالەفرێ بەرا کو بکەڤە خارێ پەیوەندی ب بالەفرخانەیا خۆمەینی ل تەهرانێ کریە و گۆتیە پشگرێکا تەکنیکی هەیە و دخوازە ڤەگەرە لێ بەلێ دەرفەتا ڤەگەرانێ نەبوویە. بسپۆرێن هکوومەتا ئیرانێ تەکەز کر کو ژبەرکو بالەفر ژ نۆ دە بلند بوویە ئەمبارێن وێ پری بەنزین بوون ژبەر ڤێ یەکێ ئاستا تەقینا وێ ب هێز بوویە.

ژبەر کەتنە خارا بالەفرێ هەر هەموو 176 کەسێن تێدە هاتن کوشتن، لێ بەلی رایەدارێن کۆمارا ئیسلامی یا ئیرانی لسەر ئاخافتنێن خوە موکر بوون و تەکەز دکر کو پسگرێکەک تەکنیکی بوویە. د بەرسڤا داخوازیا ئۆکرانیا دە ژ بۆ ڤەگەراندنا سندۆقا رەش یا بالەفرێ (سندۆقا زانیاریان)، ئیرانێ رەد دکر کو سندۆقێ ڤەگەرینە و گۆت ئەم ب خوە وێ لەکۆلینان بکین. پاش دەمەکی راگهاند سندۆقێ دربەک لی کەتیە و دبە زانیاریێن طیدە نەهێن ئەشکەرە کرن.

ئینکارکرنا رایەدارێن کۆمارا ئیسلامی یا ئیرانێ د دەمەکی دە بوون کو د تۆرێن جڤاکی دە رۆژ ب رۆژ وێنە و ڤیدیۆیێن نۆ ل سەر کەتنەخارا بالەفرێ و دیتنا پەرچەیێن جودا ژ بالەفرێ ل جیێ بوویەرێ دهاتن ئەشکەرە کرن.

ل داویێ سەرۆک وەزیرێن کەنەدا د کۆنگرەیەکە رۆژنامەڤانی دە ئەشکەرە کر کو زانیاریێن تەمام ل بەر دەستێن مە هەنە کو ئیرانێ ئەو بالەفر خستیە خارێ، 63 کەس ژ وان کەسێن د ناڤا بالەفرێ دە هەمولاتیێن کەنەدایێ بوون و ئەڤێ یەکێ وها کر کو فشارێن کەنەدا و پاشان ئۆکرانیا و ئەورۆپا ل سەر ئیرانێ ژ بۆ لێکۆلینێن زەلالتر، ئیرانێ نەجار بکن ژ درەوێن خوە پاشگەز ببە.

ژ بلی قوربانی بوونا ب ئێش یا 176 مرۆڤێن پر هێڤی و بێ گونەه، یاکو د ڤێ بوویەرێ دە جهێ سەرنجێ یە کارڤەدانا کۆمارا ئیسلامی و مەدیایێة فارسی زمان بوو، ژ بلی ڤێ ژی دبە لسەر ڤێ ئەساسێ جارەکە دن هەلسەنگاندنەک ژ بۆ شیانێن مۆشەکی یێن ئیرانێ و ئیدیئایێن وێ د ڤێ زەمینێ دە بکین.

چما ئیرانێ هەول دا ڤێ جینایەتێ ڤەشێرە؟

کۆمارا ئیسلامی ل دەستپێکا هاتنە سەر کارێ خوە هەیا نها وەکە بناغەیەک مفا ژ درەوان و چەواشەکاریان وەرگرتیە. هەیا نها ژی قازانجەک مەزن ژ ڤێ شێوازێ کریە. رەژیما تەهرانێ زۆرترین چەواشەکاری ل دژی خەباتا رزگاری خوازا رۆژهلاتێ کوردستانێ بکارئانیە کو دبە چەواشەکاری د نووچەیێن تایبەت ب خەباتا چەکداری یا پێشمەرگەیێن کوردستانێ و هەروها حاشاکرن ل تەرۆرا رێبەرێن کورد یێن وێ پارچەیا کوردستانێ، وەکە میناک باس بکین. هەڤدەم کوشتنا خوەپیشاندەران و گرتن و ئیشکەنجەدانا وان و د هەمان دەم دە حاشاکرن وان ل ڤان کریاران میناکەک دنە ژ هەزاران میناکێن ب ڤی ئاوای. وسان دیارە کو کۆمارا ئیسلامی د خەلەتیەکە حیسابی دە وەها دفکری کو ب درەو کرنێ دکارە خوە ژ ڤێ جینایەتا نۆ ژی ڤەدزە. لێ بەلی بەشەک زیدە ژ کەسێن د ناڤا بالەفرێ دە هەمولاتیێن بیانی بوون، وەکە کوردان بێ ولات و بێ پشتەڤان نەبوون، پرانیا ولاتێن رۆژئاڤا ب تایبەتی کەنەدا ئەوقاس فشار ل ئیرانێ کرن کۆ ناجار بە راستیان ئەشکەرە بکە.

گەر ب نەتەوەپەرستی نەهێت دانان ئەم دکارین ببێژین درەو کرنێ ریهۆریشالەک د کلتوورێ نەتەوەیی یێ بلندێ فارساندا هەیە و کۆمارا ئیسلامی ب نیقابەک ئۆلی ئەڤ یەک پێتر ب خەمل و کاریگەرتر کریە. گەر جاڤخشاندنەکێ د ئاژانسێن فارسی زمان دە بکین خوە ئەوێن کو سەرڤە سەرڤە  خوە ب دژبەرێن کۆمارا ئیسلامی یا ئیرانێ دزانن د ڤان جار رۆژان دە نەک ب تەنێ تەکەزێ ل سەر درەوێن کۆمارا ئیسلامی یا ئیرانێ دکن بەلکو هەول ددا هینجەتێن مەنتقی و زانستی ژ بۆ درست بکن. پێگەها بی بی سی فارسی باشترین میناکە د ڤێ دەربارێ دە.

پەیامەکە دن ئا ڤێ بوویەرێ، بێگومان ئەو پرۆپاگندەیە کو کۆمارا ئیسلامی یا ئیرانی لسەر شیانین خوە یێن مۆشەکی و هێزا خوە یا سەربازی ب گشتی دکە و خوە وەکە زلهێزەک دبینە. ب هویربینیکرن ل سەر گۆتنێن رایەدارێن سەربازی یێن ئیرانی ژ بۆ مە ئەشکەرە دبە کو ئەوا ئەو ب خوە باس لێ دکن دگەل وێ یاکو ب راستی هەیە چەند جودایە. ئەمیر عەلی حاجیزادە، فەرماندارێ هێزێن ئاسیمانی یێن سوپایێ پاسدارێن ئیرانی ئیرۆ راگهاند ژ ترسا وان گەفێن کو ئەمەریکا ل ئیرانێ کربوون مە وەها دفکری کو فرۆکەیا ئۆکرانی مۆشەکەک كرۆزە ژبەر ڤێ یەکێ مە لێ خست و مە ئەو تەقاند. ب خواندنا ڤان ئاخافتنان دیار دبە “سیستەما بەرەڤانیا مۆشەکی” یاکو نکارە بالەفرەک و مۆشەکەکێ ژ هەڤ جودا بکە و ئاراستا هاتنا وێ نەزانە دبە چەند بهێز بە.

دیارە هەیا نها ژی گۆمان ژ ڤێ یەکێ تێ کرن کو رەژیما ئیرانێ هەول بدە  ل پشت ئەشکەرە کرنا ڤێ درەوێ، درەوەک مەزنتر ڤەشێرە، ژبەرکو باس ل ڤێ یەکێ تێ کرن کو هەژمارەکە بەرچاڤ ژ کەسێن د ناڤا بالەفرێ دە ژ زانا و کەسێن تیژبیر بن کو ل دەما خوە ئیران بجی هشتی و هەژمارەکە دن ژ وان بسپۆر و شارەزایێن فیزیا و زانستێن پەیوەندیدار د وارێ ئەتۆمێ دە بوون.

دبە ژ ئالیەکە دن ل بوویەرێ بنێرین، ئەو ژی ئەڤە کو ئەو مۆشەکا بالەفر خستیە خارێ رووسی یە و بالەفر ژی ئۆکرانیە و ب کورتی ب مۆشەکەک رووسی بالەفرەک ئۆکرانی خستیە ئەردێ.

خالەکە دن کو دبە جیێ داخێ ئەڤە کو هەژمارەک ژ کوشتیان ژ هەمولاتیێن رۆژهلاتێ کوردستانێ نە، ژ باژارێن مهاباد، سەقز سنە و سەردەشتێ، د جیێ خوەدایە ب ڤێ ئەگەرێ سەرەخوەشیان ل بنەمالەیێن وان بکین.

خراب نیە د داویێ دە دەرئەنجامێن بوویەرێن ڤێ داویێ ب کورتی باس بکین، دوستێن ئیرانێ (حیزبولاها عیراقێ) سەربازەک ئەمەریکی دکوژن ل “کەی 1″، ئەمەریکا زێدەتر ژ 25 چەکدارێة عەشدێ دکوژە. حەشدا شەعبی ئێریشی بالیۆزخانەیا ئەمەریکا دکن، ئەمەریکا قاسم سولەیمانی و ئەبۆ مەهدی موهەندیس و هەژکامرەکە دن ژ پاسداران و حەشدی دکۆژە. ئیران “تۆلهلدانا ب زەبر” ئەنجام ددە لێ بەلێ ژ هێزێن دوژمن کەسێ ناکۆژە و بەرەڤاژی ل کرمانێ 58 کەس ل ژێر دەست و پێیان دە گیانێ خوە ژ دەست ددن و 176 کەسێن دن د ناڤا بالەفرێ دە دهێن سۆتن و دبن رەژی. ئانکو ئیران راست دبێژە زلهێزا ناڤچەیێ یە و ئەمەریکا و رۆژئاڤا دەرهەق ئیرانێ نادەرکەڤن و ژ شیانێن وێ یێن سەربازی ترسیانە، جهێ داخێ یە هەژمارەکە زێدە ژ ئالیێن کوردی ئەڤ درەوێن ئیرانێ لێ بوویە راستی و خوە کریە د هەمبێزا وێ رەژیمێ و شانازیێ پێ دکن کو زلهێزەک دوستاتیا وان دکە.