خوەپیشاندەرێن ئیراقێ: موقتەدا سەدر خیانەت ل مە کر

خوەپیشاندەرێن ئیراقێ: موقتەدا سەدر خیانەت ل مە کر

کۆمیتەیێن هەماهنگیا خوەپیشاندانێن ئیراقێ رۆژا شەمبی 25/1/2020ان راگەهاندن موقتەدا سەدر رێبەرێ بزاڤا سەدر خیانەت ل وان کریە.

کۆمیتەیا هەماهەنگیا خوەپیشاندەران کو ژ کەسێن نەرازی یێن ئیراقی هاتیە پێک ئینان د داخۆیانیەکا توند دا، رەخنە ل موقتەدا سەدر گرتن و راگەهاند سەدر ئیخانەت ل “ئازادیخازێن” ئیراقێ کریە.

کۆمیتەیا هەماهەنگیا خوەپیشاندەران ل ئیراقێ هەر وها تەکەز کر کو خوەپیشاندەرێن ئیراقی ب فەتوایێن مەزهەبی یان توویتێن سەدر نەهاتینە سەر جادەیان کو ب توویت یان فەتوایەکا سەدر مەیدانێن خوەپیشاندانان ڤالا بکەن. ڤێ کۆمیتەیێ ژ سەدر و ئالیگرێن وی رە خواست کو گرەوان لسەر ب دوماهی هاتنا سەبر و هەدارا خوەپیشاندەرا نەکەن، خوەپیشاندەر ب هەدارن و تا خواستەکێن خوە بجی دکن دێ د ناڤا مەیدانێن خوەپیشاندانان بمینن.

د هەمان دەمێ دا ڤێ کۆمیتەیێ رێبەرێ سەدریان ب “سوار بوون لسەر پێلێن خوەپیشاندانان” و پێکۆل ژ بۆ “مفا وەرگرتن” ژ وان خوەپیشاندانان تومەتبار کر.

خوەپیشاندەران راگهاند کو ئەو نابن “ئالاڤەک” ژ بۆ دان و ستاندن و لێدان د بازرگانیەکا سیاسی دا وەکو “موقتدا سەدر” ئەنجام دای، بەلکو تا بدەست خستنا هەموو خواستەکێن خوە دی د قادێن خوەپیشاندانان دا بمینن.

 کۆمیتەیێن هەماهەنگیێ باس ل دان و ستاندنێن دناڤبەرا موقتەدا سەدر دگەل ئیرانێ کرن و راگهاند کو سەدر بەرامبەر “ئیخانەتا خوە ل همبەر ئازادیخازێن ئیراقێ” سۆزا سەرۆک وەزیرتیا ئیراقێ ژ تەهرانێ وەرگرتیە.

موقتەدا سەدر رۆژا رابووری لسەر ڤێ یەکێ کو خوەپیشاندەرێن ئیراقی، خوەپیشاندانێن وی ل دژی ئەمەریکایێ ب ئەمرێ ئیرانێ دزانن، رەخنە ژ خوەپیشاندەران گرتن و راگهاند بوو “من ئۆمێدا خوە ژ خوەپیشاندەران ژ دەست دایە”.