پشتی مرنا خوە ژی قاسم سولەیمانی دو چالاکڤانێن کورد ب گرتن دان

قاسم سولەیمانی دو چالاکڤانێن کورد ب گرتن ددە

ل رۆژهلاتێ کوردستانێ دو چالاکڤانانێن مەدیایی ژبەر بکار نەئانینا پەیڤا شەهید ژ بۆ قاسم سولەیمانی  تێن دەستەسەرکرن

وەحید فەتاحی، یەک ژ رێڤەبەرێن کەنالەک تیلیگرامی ل باژارێ پاوە ل رۆژهلاتێ کوردستانێ ب توهمەتا بکار نەئانینا پەیڤا “شەهید” ژ بۆ قاسم سولەیمانی د نڤیسانێن خوە دە کو ل کانالا خوە یا تەلیگرامێ دە نڤیساندبوو، ژ ئالیێ سازیا ئیتیلاعاتا سوپایێ ئیرانێ ڤە هات دەستەسەرکرن.

فەتاحی دبە دویەمین چالاکڤانێ مەدیایی ل باژارێ کرمانشاهێ کو ب ڤێ توهمەتێ تێ دەستەسەرکرن، پێش نها مزەفەر وەلیدبێگی ژی ل ڤی باژارای ب ڤێ توهمەتێ چەندین رۆژان هاتبوو دەستەسەرکرن.

رێکخراوا هەنگاو ژ بۆ مافێن مرۆڤان رۆژا شەمی ٢٥/١/٢٠٢٠ان هەڤدەم دگەل بەلاڤکرنا نووچەیێ دەستەسەرکرنا وەحید فەتاحی راگهاند کو یەک ژ چالاکڤانێن مەدیایی خەلکێ پاوە ب سەدەما بکار ئەئانینا پەیڤا “شەهید” ژ بۆ قاسم سولەیمانی، ژ ئالیێ سازیێن ئەولەهی یێن ڤی باژاری ڤە هاتیە دەستەسەرکن.

هەنگاوێ ئەڤ یەک ژی راگهاند کو هێزێن ئەولەهیا ئیرانێ ل پاوە پێش نها مزەفەر وەلیدبێگی یەک ژ مەدیاکارێن ڤی باژاری و رێڤەبەرێ کەنالێ تیلیگرامی یێ ب ناڤێ “دەنگی نۆریاو” ژی ب هەمان توهمەتێ هاتیە دەستەسەرکرن. وەلیدبێگی دو رۆژان پاش دەستەسەرکرنێ د دەمەکێ دە کو ب توندی ژ ئالیێ هێزێن ئەمنی یێن ئیرانێ ڤە د گرتیگەهێ دە هاتبوو ئیشکەنجەدان، ئازاد بوو.

د یاسایێن کۆمارا ئیسلامی یا ئیرانێ دە تو تاوانەک سەبارەت بکار نەئانینا پەیڤا “شەهید” نینە، لێ بەلێ د دەما دو هەفتەیێن رابووری دە ژ بلی باژارێ پاوە، هنەک نووچە سەبارەت دەستەسەرکرنا هنەک کەسان ب تایبەتی رێڤەبەرێن کانالێن تیلیگرامی یان ژی چالاکڤانێن سوشیال مەدیایێ ل چەندین باژارێن ئیرانێ ژبەر بکار نەئانینا پەیڤا شەهید ژ بۆ قاسم سولەیمانی، هاتن بەلاڤکرن.