بابێ رۆحیێ نه‌ته‌وه‌یا كورد ل سالا 1967ێ باس ل ره‌وشا نها یا كوردستانێ دكه‌ت

بابێ رۆحیێ نه‌ته‌وه‌یا كورد ل سالا 1967ێ باس ل ره‌وشا نها یا كوردستانێ دكه‌ت

گۆتاره‌كا دیرۆكی یا «مسته‌فا بارزانی» سه‌باره‌ت ب ئه‌ركێ حزبی و حكومی ل كوردستانێ

ڤه‌گه‌ریان بۆ دیرۆكێ

ل رۆژا 17/4/1967ێ كۆمیتا ناڤه‌ندییا پارتییا ده‌مۆكرات یا كوردستانێ، كۆمبوونه‌كا به‌رفرهـ ل «كانی سماق» ل بنارا گه‌لاله‌ ساز كر.

 د ڤێ كۆمبوونێ دا، «مسته‌فا بارزانی» گۆتاره‌ك خواند و د به‌شه‌كێ وێ گۆتارێ دا گۆت:

«برایێن عه‌زیز هه‌موو سه‌روه‌ریه‌ك و هه‌موو بزاڤه‌كا ل دنیایێ ژ بۆ خزمه‌تكا ملله‌تی دهێته‌ كرن، پێدڤییه‌ ئه‌و كه‌سێن كار و بارێن ئه‌ڤی ملله‌تی د ده‌ست دا، ته‌نێ به‌رژه‌وه‌ندیێن ملله‌تی بده‌نه‌ پێش چاڤێن خوه‌ و هه‌موو ئه‌نانیه‌ت و به‌رژه‌وه‌ندیێن كه‌سی ژبیر بكه‌ن و هه‌ر چ كاره‌كێ ژ بۆ به‌رژوه‌ندییا ملله‌تی بیت هه‌گه‌ر بۆ وان ژی یێ خۆش نه‌بیت پێدڤییه‌ بكه‌ن و ب دووڤ نه‌فه‌سا خوه‌ نه‌كه‌ڤن، ئه‌ڤجا ل ڤێره‌ من دڤێت هنده‌ك تشتان ل بیر بینم! حساب نه‌كه‌ن ره‌خنه‌یا كه‌سه‌كێ ده‌ست نیشان كری دكه‌م، نابیت وه‌ها ژی بزانن كو ره‌خنه‌یا كه‌سێ ناكه‌م – ئه‌ز د ڤێ خالێ دا دبێژم كو دێ ره‌خنه‌یا خۆ ژی كه‌م هه‌گه‌ر كاره‌كێ وه‌ها بكه‌م كو ژ بۆ شۆرشێ و ژ بۆ ملله‌تی زه‌ره‌ هه‌بیت».

«ئه‌و به‌رپرسێ ژ بۆ به‌رژه‌وه‌ندییا خوه‌ یا كه‌سۆكی، یان بۆ به‌ریكا خۆ، یان ژ بۆ خۆ مه‌زنكرنێ بزاڤان بكه‌ت، یان گوهـ نه‌ده‌ته‌ فه‌رمانان، ئه‌و كه‌س نه‌كورد و خزمه‌تا شۆرشێ ناكه‌ت»

«دڤێت ئه‌م وه‌زیفا خۆ باش بزانین، هه‌گه‌ر هه‌موو به‌رپرسێن شۆرشێ ژ بۆ به‌رژه‌وه‌ندییا شۆرشێ كار نه‌كه‌ن و خه‌مساریێ د وه‌زیفا خۆ دا بكه‌ن، ئه‌م ب خۆ دێ بینه‌ دوژمنێن خوه‌ و دێ بینه‌ خزمه‌تكارێن دوژمنێ ملله‌تی، دڤێت ئه‌م تێبگه‌هین رامانا ملله‌تی چی یه‌؟ رامانا ره‌خنه‌یێ چی یه‌؟ رامانا كورداتی و نه‌ته‌وێ چی یه‌؟ ئه‌و به‌رپرسێ ژ بۆ به‌رژه‌وه‌ندییا خوه‌ یا كه‌سۆكی ده‌ست ژ به‌رژه‌وه‌ندییا شۆرشێ به‌رده‌ت، یان بۆ كیستێ خۆ و ژ بۆ پاره‌ی، یان ژ بۆ خۆ مه‌زنكرنێ بزاڤان بكه‌ت، یان گوهـ نه‌ده‌ته‌ فه‌رمانان و ژ سیسته‌می ده‌ربكه‌ڤیت، ئه‌و كه‌س نه‌كورد و خزمه‌تا شۆرشێ ناكه‌ت».

د درێژییا ئاخفتنێن خۆ دا بارزانی گۆت:

«برایێن عه‌زیز رجایا من ژ هه‌وه‌ كوڕێن ملله‌تی ئه‌ڤه‌یه‌، بزاڤێ بكه‌ن رۆژ بۆ رۆژێ حزبا خوه‌ ب هێزتر و رێكخستی تر بكه‌ن و هه‌ماهه‌نگیێ ل گه‌ل هه‌موو ئالییه‌كی بكه‌ن، هه‌گه‌ر رێكخستنێن حزبێ د باش بن، فه‌رمانێن وێ رێكارێن باش بۆ بهێنه‌ كرن، رامانا وێ ئه‌وه‌ له‌شكر و ملله‌ت ژی دێ بهێزتر و باشتر بن».

«حزب واته‌ سازیێن هه‌موو ملله‌تی، له‌شكر و هه‌موو و ته‌خێن دی به‌شه‌كن ژ ملله‌تی، سه‌روه‌ریه‌ك بێی سه‌ركرداتییا حزبه‌كا رێكخستی سه‌ركه‌فتی نابیت، هه‌گه‌ر بێژم حزب مه‌به‌ست پێ حزبه‌كا دلسۆز ژ بۆ ملله‌تی كو به‌رژه‌وه‌ندیێن ملله‌تی ل به‌رچاڤ بن، نه‌ك وه‌ك وان كو ل (ماوه‌تێ) بوون و زولم ل ملله‌تی كرین و ناڤێ حزبێ ژی ل خوه‌ كرین».

«دڤێت بزانین دێ بینه‌ دوژمنێن خۆ و دوژمنێن ملله‌تی هه‌گه‌ر هه‌ر تشته‌كێ بیت ب غه‌در و زولم ژ ملله‌تی بستینین»

«ئه‌ڤجا هه‌گه‌ر مه‌ بڤێت شۆرشا مه‌ سه‌ربكه‌ڤیت، پێدڤییه‌ ئه‌م ئه‌ڤێ حزبا خوه‌ ب هێز بكه‌ین و ئه‌م هه‌موو، ئه‌ز یان له‌شكر یان ملله‌ت ب دلسۆزی هاریكارییا حزبا خۆ بكه‌ین، نابیت كه‌س ژ مه‌ چاڤ ل سه‌رۆكاتی و مه‌زناهیێ بیت، هه‌ر كه‌س بشێت پترین هێز و شیان هه‌بن و ل به‌رانبه‌ر بشێت خزمه‌تا ملله‌تی بكه‌ت، ملله‌ت دێ وی ب سه‌رۆكێ خۆ زانیت، ئه‌و كه‌سێ كاره‌ك د ده‌ست دا و ژ هنده‌ك كه‌سان به‌رپرس بیت‌، پێدڤییه‌ ژ وان كه‌سێن ل ژێر ده‌ستێ خوه‌ پتر زه‌حمه‌ت و ئیزایێ بكێشیت، هه‌گه‌ر یه‌ك ژ گرۆپا وی برسی بیت، پێدڤییه‌ نانێ خۆ بده‌تێ و برساتیێ بۆ خۆ قه‌بوول بكه‌ت، دڤێت مه‌زن ته‌حمولێ پتری بچووكان بكه‌ن، هه‌گه‌ر ئه‌ز ناڤێ مه‌زن ل خۆ بكه‌م و یێ تێر بم و یێ بچووكتر ل به‌ر چاڤێ من برسی بیت، ئه‌ز ڤێ ب شه‌رمه‌كا گه‌له‌ك مه‌زن دزانم، لێ هه‌گه‌ر ئه‌ز ژ برسان دا بمرم و هه‌ژاره‌كی ژ برسان دا رزگار بكه‌م، بۆ من دێ شه‌ره‌فه‌كا مه‌زن بیت، مرۆڤاتی ئه‌ڤه‌یه‌ كو قوربانیێ ب له‌زه‌ت و خۆشییا خۆ ژ بۆ به‌رژه‌وه‌ندییا هه‌ژاران بده‌ی… دڤێت هه‌ر كه‌س د ڤێ شۆرشێ دا كار بكه‌ت، ل به‌راهیێ ئه‌ز، ل دوماهیێ ئه‌م هه‌موو به‌رپرسین هه‌تا دگه‌هیته‌ پێشمه‌رگه‌یه‌كی و ئه‌ندامه‌كێ حزبێ كو دڤێت ئه‌ڤه‌ ژ بیرا مه‌ نه‌چیت: هه‌گه‌ر دلێ گوندییه‌كی، شڤانه‌كی، دكانداره‌كی، ژنه‌كێ، زارۆیه‌كی عاجز بكه‌ین، هه‌گه‌ر خه‌به‌ر و گۆتنێن نه‌شرین ب تاكێن ملله‌تی بێژین، هه‌گه‌ر هێكه‌كێ‌، مریشكه‌كێ یان هه‌ر چ بیت، ب غه‌در و زولم ژ ملله‌تی بستینین، دڤێت بزانین دێ بینه‌ دوژمنێن خۆ و دوژمنێن ملله‌تی».

«هه‌گه‌ر دلێ ملله‌تی ل گه‌ل مه‌ نه‌بیت، ئه‌م هزار جاران ژ نوكه‌ ب هێزتر بین، دێ شكێین و نه‌شێین سه‌ركه‌فتنێ بینین»

«هه‌گه‌ر دلێ ملله‌تی ل گه‌ل مه‌ بیت، دوژمنی هزار جاران هێزا زێده‌تر هه‌بیت، نه‌شێت مه‌ بشكێنیت، هه‌گه‌ر دلێ ملله‌تی ل گه‌ل مه‌ نه‌بیت، وللاهی دێ بۆ هه‌وه‌ بێژم: ئه‌م هزار جاران ژ نوكه‌ ب هێزتر بین، دێ شكێین و نه‌شێین سه‌ركه‌فتنێ بینین، هه‌گه‌ر ئه‌م هه‌موو پێكڤه‌ بۆ به‌رژه‌وه‌ندییا گشتی كار نه‌كه‌ین و ئه‌نانیه‌ت و حه‌ز ژ خۆ‌ كرن ل ده‌ڤ مه‌ هه‌بیت، ل وی ده‌می دێ خزمه‌تا دوژمنی كه‌ین ژ بۆ نه‌مانا خۆ».

«برایێن عه‌زیز: هه‌ر وه‌ك من ل سالێن 45ێ و ل سالێن شێستان و هه‌رده‌م گۆتی و نها ژی دبێژم: ئه‌م شه‌رێ عه‌ره‌ب و كوردان ناكه‌ین، نه‌ هه‌ر نابێژم شه‌رێ عه‌ره‌بان ناكه‌م – شه‌رێ هیچ نه‌ته‌وه‌یه‌كێ ناكه‌م، ل گه‌ل چ ملله‌تان ل سه‌ر ئه‌ساسێ ناڤی، ئه‌ڤه‌ زه‌ره‌، ئه‌ڤه‌ سووره‌، ئه‌ڤه‌ ره‌شه‌، ئه‌ڤه‌ شینه‌، ئه‌ڤه‌ سپی یه‌ شه‌ری ناكه‌م، كورد و عه‌رب برایێن ئێكن و دشێن دگه‌ل ئێك ب ته‌بایی و برایه‌تی و خۆشی و ئاشتی بژین، به‌لێ عه‌رب برایێ مه‌زنه‌ و ئه‌م برایێ بچووك، ئه‌م دبێژین ئه‌ڤه‌ نه‌دادپه‌روه‌ری یه‌ كو برایێ بچووك برسی و رویس بیت و نه‌شێت بخوینیت و فێری تشته‌كی نه‌بیت و نه‌شێت نه‌رینا خۆ لدۆر ئیداره‌یا مالا خۆ یا هه‌ڤپشك دیار بكه‌ت و برا گه‌وره‌ هه‌موو تشتێن مالێ بۆ خۆ ببه‌ت! پێدڤییه‌ دادپه‌روه‌ری ل به‌رچاڤ بهێت وه‌رگرتن، برایێ بچووك خۆ ب مه‌زلووم نه‌بینیت و غه‌در لێ نه‌هێته‌ كرن، ئه‌م دژاتییا حكوومه‌تێ ناكه‌ین هه‌گه‌ر حكوومه‌ت نه‌كه‌ڤیته‌ ده‌ستێ دز و حیزان!

ئه‌وێن كو خزمه‌تا دوژمنێ كورد و عه‌ره‌بان دكه‌ن، مه‌ د ڤێ شۆرشا خۆ دا به‌رژه‌وه‌ندییا ئیراقێ دڤێت، ل ده‌ستپێكێ بۆ عه‌ره‌بان پاش بۆ كوردان و بۆ هه‌موو خه‌لكێ ئیراقێ، توركمان، ئاشووری، ئه‌رمه‌ن و هه‌ر كه‌سێ دی كو هه‌یه‌.

مه‌ دڤێت حكوومه‌ته‌كا دادپه‌روه‌ر یا دیمۆكرات ب هه‌لبژارتنه‌كا ئازاد یا بێ فشار، نه‌ڤیان و زولم و یا فره‌ئالی ل ئیراقێ هه‌بیت.

یاسایه‌كا پر دادپه‌روه‌ری یا وه‌ها هه‌بیت كو ملله‌تێ ب خۆ بۆ خۆ ب دانیت، هه‌ر رۆژ عه‌سكه‌ره‌ك نه‌بێژیت: «قررنا مایلی» و ب حه‌زا خۆ ب ئه‌نانیه‌ت حوكمی ل سه‌ر ملله‌تێ ئیراقێ بكه‌ت و ملله‌ت نه‌شێت و نه‌وێریت موحاسه‌با وی بكه‌ت.

«مه‌ هێرشی كه‌سێ نه‌كرییه‌ و هێرشێ كه‌سێ ژی ناكه‌ین، ئه‌م به‌ره‌ڤانیێ ژ مافێن شه‌رعی و ژ مال و نامووس و ژیانا ملله‌تێ كورد دكه‌ین»

مه‌ هێرشی كه‌سێ نه‌كرییه‌ و هێرشێ كه‌سێ ژی ناكه‌ین، ئه‌م به‌ره‌ڤانیێ ژ مافێن شه‌رعی و ژ مال و نامووس و ژیانا ملله‌تێ كورد دكه‌ین، ئه‌م قه‌ت حه‌ز ناكه‌ین خوینرێشتن و كوشتن بكه‌ڤیته‌ ناڤبه‌را دو برایێن كورد و عه‌ره‌ب دا، چونكه‌ شه‌ر و كوشتنا كورد و عه‌ره‌بان دێ خزمه‌تا دوژمنێن ئیراقێ كه‌ت، ئه‌ڤجا ئومێدا من ئه‌ڤه‌یه‌ كو خودێ عه‌قل و تێگه‌هشتنێ‌ بێخیته‌ سه‌رێ ئه‌وان یێن دخوازن شه‌ری دگه‌ل مه‌ بكه‌ن، بلا ره‌حمه‌كێ ب ملله‌تێ ئیراقێ بكه‌ن و چاڤێ وان ل زولم و زۆرداریێ ل ملله‌تێ كورد نه‌بیت، دا كو بشێین ئه‌م هه‌موو گه‌لێ ئیراقێ ب خۆشی و برایه‌تی و ئاشتی و دادپه‌روه‌ری پێكڤه‌ بژین.

پوستێن ھەمان بەش