لاهۆر شێخ جه‌نگی و مه‌حموود سه‌نگاوی ئه‌گه‌رێ بلندبوونا بهایێ غازێ نه‌

لاهۆر شێخ جه‌نگی و مه‌حموود سه‌نگاوی ئه‌گه‌رێ بلندبوونا بهایێ غازێ نه‌

حكوومه‌تا هه‌رێما باشوورێ كوردستانێ، ئیرۆ راگهاندنه‌ك ل ده‌ربارا بلندبوونا بهایێ غازێ ل هه‌ر یه‌ك ژ باژارێن هه‌ولێر و دهۆكێ وه‌شاند و تێدا‌ گۆتییه‌: «ب رێگرییا هنده‌ك كه‌سه‌كێن بالاده‌ست ل سنۆرێ گه‌رمیان و سلێمانیێ، بهایێ غازێ بلندبوویه‌».

پشتی ل رۆژێن بووری بهایێ غازێ ل هه‌ولێر و دهۆكێ بلندبوویی و ولاتیێن نه‌رازیبوونێن خوه‌ دیار كرین، ئیرۆ به‌رده‌ڤكێ حكوومه‌تا هه‌رێما باشوور روهنكرنه‌ك ل ده‌ربارا وێ پرسێ ژ بۆ رایا گشتی وه‌شاند.

د. جۆتیار عادل به‌رده‌ڤكێ حكوومه‌تا باشوور دبێژه‌: «هنده‌ك كه‌سێن بالا ده‌ست ل سنۆرێ گه‌رمیان و سلێمانیێ بوونه‌ ئه‌گه‌رێ بلندبوونا بهایێ غازێ ل هه‌ولێر و دهۆكێ».

هه‌ر وها دوپات كر، ل گه‌ل ده‌ستبكاربوونا كابینه‌یا 9ێ یا حكوومه‌تێ، وه‌ك‌ به‌رسڤه‌ك ژ بۆ داخوازیێن ره‌وا یێن ولاتییان د ئه‌نجام دانا چاكسازیێ دا و گرتنه‌به‌را زه‌لالیێ د كارێن حكوومی دا، بریار هاتییه‌ دان كو گرێبه‌ستێن كۆمپانییا د چارچووڤێ یاسایێ و رێنمایان دا و ل گۆر پرۆسه‌یا ب ته‌نده‌ر كرنێ بیت.

حكوومه‌تا باشوور: دێ رێ ل مافیایێ گرین

د ڤی چارچووڤه‌ی دا و ب تایبه‌ت د پرسا ڤه‌گوهاستنا غازێ دا ژ كۆمپانییا «دانه‌ غاز» ژ بۆ پارێزگه‌هێن هه‌رێما باشوورێ كوردستانێ كو ژ ئالیێ كۆمپانییه‌كا ده‌ستنیشان كری ڤه‌ هاتبوو قورخ كرن، لێ پشتی بوویه‌ ته‌نده‌ر و ب كۆمپانییه‌كا دی هاتییه‌ دان، هنده‌ك كه‌سێن بالا ده‌ست ل سنۆرێ گه‌رمیان و سلێمانیێ رێگری كرییه‌ و وه‌كه‌ كاره‌ته‌كا فشارێ رێنه‌دان به‌هرا غازێ یا هه‌ولێرێ و دهۆكێ وه‌ك پێدڤی بگه‌هیت، ئه‌ڤه‌ ژی بوویه‌ ئه‌گه‌رێ بلندبوونا بهایێ غازێ ل ڤان دو پارێزگه‌هان.

به‌رده‌ڤكێ حكوومه‌تێ هه‌ر وها ده‌ست نیشان كر، وان كه‌سان ل دۆ رۆژێن بووری ب هێزه‌كا چه‌كدار ڤه‌ چووینه‌ سه‌ر كۆمپانییا ته‌نده‌ر بۆ كه‌فتی و ره‌وش زێده‌تر ئالۆز كرییه‌.

به‌رده‌ڤكێ حكوومه‌تا هه‌رێما باشوورێ كوردستانێ ل دوماهییا روهنكرنا خوه‌ دبێژیت: «زێده‌باری هایدار كرنا ولاتییان، ئه‌م وان دل ته‌نا ژی دكه‌ین كو حكوومه‌ت ژ گاڤێن خوه‌ یێن چاكسازیێ پاشڤه‌ نازڤریت و هه‌موو رێكێن یاسایی دێ هێن بكار ئینان ژ بۆ كو رێ ل مافیایان بهێت گرتن».

پۆلات شێخ جه‌نگی و دژه‌ تیرۆرا یه‌كێتیێ خودانێ كۆمپانییا غازێ ره‌ڤاندیه‌

ل رۆژێن رابووری بهایێ ئێك لێترا غازا شل ژ 260 دیناران بۆ 500 دیناران بلندبوویه‌، ئه‌ڤ ژی پشتی كو حكوومه‌تا باشوورێ كوردستانێ گرێبه‌ستا كۆمپانییا «گۆلدن جاگوار» یا ڤه‌گوهاستنا غازێ ب دوماهی ئینای و ته‌نده‌را ڤه‌گوهاستنێ دایه‌ كۆمپانییه‌كا دی ب ناڤێ »سۆر گاز».

ل گۆر چاڤكانیێن داركا مازی كو ژ به‌رپرسه‌كێ بالا ده‌ست یێ یه‌كێتییا نشتیمانی وه‌رگرتینه‌، كۆمپانییا «گۆلدن جاگوار» یا كه‌سه‌كی یه‌ ب ناڤێ «شێروان» خه‌لكێ چه‌مچه‌ماله‌ و شریكێ «پۆلات شێخ جه‌نگی» یێ برایێ لاهۆر شێخ جه‌نگی یه‌، 33% ژ ڤێ كۆمپانیێ یا پۆلاتی یه‌.

حكوومه‌تا باشوور ته‌نده‌را ڤه‌گوهاستنا غازێ ژ كۆمپانییا «گۆلدن جاگوار» دایه‌ كۆمپانییا «سۆر گاز» كو خودانێ وێ كه‌سه‌كێ ناسیاره‌ و ب «شێخ به‌كر سه‌ید گۆله»‌ تێ ب ناڤ كرن و بریاربوو ل 31 مه‌ها بووری ده‌ست ب كار ببیت، لێ به‌لێ پۆلات شێخ جه‌نگی په‌یوه‌ندی پێ كرییه‌ و گۆتییه‌ وی كو دڤێت ئه‌و ژی ب هه‌مان ئاوایێ كۆمپانییا گۆلدن جاگوار شریكێ وی بیت.

پشتی سه‌ید به‌كر خودانێ كۆمپانییا نوو ته‌نده‌ر بۆ كه‌فتی ره‌ت كری پۆلات شێخ جه‌نگی بكه‌ته‌ شریكێ خوه‌، ئه‌و و هه‌ژماره‌كا ستافێ كۆمپانییا وی ژ ئالیێ هێزه‌كا دژه‌ تیرۆرا یه‌كێتیێ هاتنه‌ ره‌ڤاندن و ئه‌شكه‌نجه‌ دان و ب وێ ئه‌گه‌رێ ئه‌و هێزه‌ رێ ناده‌ت غاز بگه‌هیته‌ هه‌ولێر و دهۆكێ.

لاهۆر و سه‌نگاوی رێناده‌ن غاز بۆ هه‌ولێر و دهۆكێ بهێت

پشتی کێم بوون و گران بوونا بهایێ غازێ ل هەر دو باژارێن دهۆک و هەولێرێ ل باشوورێ کوردستانێ، پێلەکا مەزن یا نەرازیبوونێن ولاتییان ل دووڤ خوە ئانین ب تایبەتی د تۆرێن جڤاکی دا، ئەڤ یەک بۆ ئه‌گه‌ر کو پەیڤدارێ حكوومه‌تا هەرێما کوردستانێ هنده‌ک زەلالکرنان ل سەر ڤێ پرسگرێکێ بده‌ت.

ل گۆر زانیاریێن پێگەها دارکا مازی کو ژ ژێده‌ره‌كێ تایبەت د ناڤ یەکیتییا نیشتیمانی یا کوردستانێ دا ب دەست خوە خستینە، کەسێن کو ناهێلن غاز بگەهیت دهۆکێ و هەولێرێ، باله‌كێ خوەدان دەستهه‌لاته‌ د ناڤ یه‌كێتیێ دا، ب تایبەتی شێخ لاهۆر و مەحموود سەنگاوی.

وی ژێده‌ری ب پێگەها دارکا مازی راگهاند، پشتی راگهاندنا پرۆژەیێ چاکسازیێ ژ ئالیێ حكوومه‌تا هەرێما کوردستانێ ڤە، بەرژەوەندیێن هندەک کەسان کەتینە بن خه‌ته‌رێ، لاهۆر و سەنگاوی ژی دو ژ وان کەسانە یێن کو بەرژەوەندیێن وان یێن تایبەت کەتینە د خه‌ته‌رێ دا و هەر ژ بەر ڤێ یەکێ دخوازن ئالۆزییان دروست بکه‌ن داكو رێکێ ل همبەر چاکسازییان بگرن و بشێن بەرژەوەندیێن خوە یێن تایبەت ب پارێزن.

پوستێن ھەمان بەش