د راپرسییه‌كێ دا كو كۆمارا ئیسلامی یا ئیرانێ كرییه، ئاشكرا بوویه كو 82% یا گه‌لێ ئیرانێ به‌شدار هه‌لبژارتنێن بهێن یێن وی ولاتی نابن.
کەنالێ خه‌به‌ر كو كه‌ناله‌كێ فەرمی یێ كۆمارا ئیسلامی یا ئیرانێ یه دوهی رۆژا چارشەمبێ 5/2/2020ێ نووچه‌یا ئەنجامێن ڤێ راپرسیێ کو د په‌یجێ خۆ یێ فەرمی دا ل تەلیگرامێ به‌لاڤ كربوو، ره‌ش كرن.
کەنالێ خەبەر یێ کۆمارا ئیسلامی یا ئیرانێ، به‌ری چه‌ند رۆژه‌كان راپرسییه‌كا ئۆنلاین كر و تێدا ب چەند پرسیارەکان ژ بەشداربوویان خواست نەرینا خوە ل سەرهه‌لبژارتنێن پاشه‌رۆژێ یێن په‌رله‌مانێ ئیرانێ دیار بکن.
هەرچەنده ڤی کەنالی چ ریکلامەک ژ بۆ ڤێ راپرسیێ نەکر ژی و دەمەک کورت ژی ژ بۆ دەست نیشان کربوو، لێ بەلێ بەرسڤا بەشداربوویان د ڤێ راپرسیێ دا وه‌ك شۆكه‌كێ بوو و ئاشکرا بوو کو پتری 80٪ یا بەشداربوویان گۆتنه كو ئه‌و به‌شداری هه‌لبژارتنان نابن.
پشتی ئاشكرابوونا ئەنجامێن ڤێ راپرسیێ، بەرپرسێن کەنالی، ئەنجام ره‌ش كرن و رونكرنه‌ك ل شوونا ئه‌نجامان به‌لاڤ كر.
ل گۆر رونكرنا كه‌نالی، هنده‌ك كه‌سان كه‌مپین بۆ به‌رسڤدانا ب دژ ژ بۆ ڤێ راپرسیێ دانابوون، له‌و ئه‌مێ راپرسییه‌كا دی ل شوونا وێ ده‌ست پێ كه‌ین.
كه‌نالێ خه‌به‌ر دبێژیت: هەژمارەکا زێدە ژ گرۆپ و دەستەیێن دژە شۆرەشا ئیسلامی ب كه‌مپینان و بەشداربوون د ڤێ راپرسیێ دا ئۆپشنا نەخێر ئەز بەشدار نابم ب رەنگەکە سیستەماتیک هه‌لبژارتبوو».
رۆپەلا تەلەگرامێ یا ڤی کانالێ فه‌رمی یێ دەولەتا ئیرانێ دگەل داخواز کرن ژ هەموو کەسەکێ ژ بۆ بەشداربوون د راپرسییا نوو دا کو بریارە ئەنجام بدن، نڤیسانییه: «داخوازێ ژ هەموو “گەلێ” خوە یێ ب رومەت دکه‌ین ب بەشداربوون د راپرسییا نوو دا هاریكار بن داکو “ئەنجامەک شەفاف” ب دەست بێخین».
