یه‌كێتیێ سیسته‌ما هه‌ڤسه‌رۆكاتیێ په‌ژراند
یه‌كێتییا نشتیمانی یا كوردستانێ ئیرۆ جڤیا و ژ بۆ سه‌رۆكاتییا پارتییا خوه، سیسته‌ما هه‌ڤسه‌رۆكاتیێ په‌ژراند، ئه‌و سیسته‌ما پارتییا كاركه‌رێن كوردستانێ په‌كه‌كێ و پارتیێن گرێدای وێ پێ دهێن ناسین.
ئه‌نجوومه‌نا سه‌ركرداتییا گشتی یا یه‌كێتییا نشتیمانییا كوردستانێ یه‌نه‌كێ ئیرۆ رۆژا شه‌می 8/2/2020ێ جڤیا و د جڤینێ دا، سیسته‌ما هه‌ڤسه‌رۆكاتیێ ژ بۆ سه‌رۆكاتییا یه‌كێتیێ ب كۆیا ده‌نگان په‌ژراند.
مه‌دیایا یه‌كێتیێ ئه‌ڤ چه‌نده به‌لاڤ كر، لێ به‌لێ ئاشكرا نه‌كر كو چه‌ند كه‌س ژ بۆ هه‌ڤسه‌رۆكاتییا یه‌كێتیێ كاندیدن.
ئه‌نجوومه‌نا گشتی یا سه‌ركرداتییا یه‌كێتیێ د جڤینا خوه یا ئیرۆ دا، چ بریاره‌ك نه‌دا كانێ هه‌ڤسه‌رۆكان دێ جێگر هه‌بن و ته‌نێ ئه‌رك و به‌رپرسیاریێن هه‌ڤسه‌رۆكێ حزبێ نیقاش كرن.
یه‌كێتییا نشتیمانییا كوردستانێ ل 21 دیسامبه‌را سالا رابووری 2019ێ كۆنگره‌یا خوه یا 4ێ ئه‌نجام دا، د كۆنگره‌ی دا ئه‌نجوومه‌نا گشتی یا سه‌ركرداتیێ هات ده‌ست نیشان كرن كو 118 كه‌سن، هه‌ر وها بریار دا كو ئه‌ڤ ئه‌نجوومه‌ن ب ئه‌ركا ده‌ست نیشان كرنا سه‌رۆكێ یه‌كێتیێ ل ده‌مه‌كێ پاشتر رابیت.
هه‌ر چه‌ند كو وه‌ختا كۆنگره‌ی ده‌نگۆیێ وێ یه‌كێ هه‌بوو كو د. به‌رهه‌م سالح سه‌رۆكاتییا یه‌كێتیێ ژ بۆ قۆناغا بهێت دبكه‌ت، لێ به‌لێ هه‌ژماره‌كا ناڤێن دی هه‌نه هێشتا یه‌كلا نه‌بوونه.
سیسته‌ما هه‌ڤسه‌رۆكاتیێ ژبۆ برێڤه‌برنا پارتیێن سیاسی یێن كوردی، سیسته‌مه‌كا نوو نینه، به‌لكو ئه‌زموونه‌كه ل ده‌ستپێكێ پارتییا كاركه‌رێن كوردستانێ په‌كه‌كێ په‌یره‌و كر، پشتره و ب تایبه‌ت پشتی ده‌سته‌سه‌ر كرنا عه‌بدوللا ئۆجالان رێبه‌رێ په‌كه‌كێ ل باكورێ كوردستانێ پارتیێن سیبه‌ر و نێزی په‌كه‌كێ ئه‌و سیسته‌م ژ بۆ خوه ده‌ست نیشان كرن.
هه‌ر وها ل رۆژئاڤایا كوردستانێ ژی پارتییێن گرێدای په‌كه‌كێ وه‌كه پارتییا یه‌كێتییا ده‌مۆكراتیك په‌یه‌دێ ئه‌ڤ سیسته‌م ژ بۆ خوه ده‌ست نیشان كر.
