هەڤدەم دگەل بەردەوامیا جێگیر کرنا هێزێن خوە یێن سەربازی ل ئیدلبێ، ترکیێ گەف ژ ئەنجامێن هەر ئێریشەکێ ژ بۆ سەر هێزێن خوە کر و راگهاند ئەمێ بەرسڤا هەر ئێریشەکێ بدین کو ببهێتە کرن سەر لەشکرێن مە ل ناڤا خاکا سووریێ دە.
ئەڤ گەفێن ترکیێ پاش هنارتنا هێزێن زێدەتر هات ژ بۆ ئدلبێ.
پێش نها فەرماندارێن ترکیێ یێن ل ئیدلبێ و فەرماندارێن رووسی جڤینەک سەبارەت رەوشا ئیدلبێ ئەنجام دابوو کو تێدە باس ل پاراستنا ئارامیێ و پێشدە برنا سیاسی و ئەنجامدانا جڤینەک دن ل هەفتەیا داهاتی کربوو.
هنەک چاڤکانیێن ل ئیدلبێ راگهاند، دانوستاندنێن دناڤبەرا فەرماندارێن ترکیێ و رووسیێ سەبارەت لهەڤهاتنا سووچیی یا تایبەت کو ل سەر رەوشا ناڤچەیێن ژێر دەستهلاتا ترکێێ هاتبوو ئیمازکرن بوو.
ترکان د ڤێ جڤینێ دە ئاماژە ب هنەک خالێن ڤێ لهەڤهاتنێ کربوو و تەکەز کربوو کو د ڤێ لهەڤهاتنێ دە باس ل ناڤچەیێن ژێر دەسهلاتا ترکیێ هاتبوو کرن، ترکیێ دبێژە کو رەژیما سووریێ و میلیشیاتێن گرێدایی وێڤە پێگیریێ ب ڤێ لهەڤهاتنێ ناکن.
فەخرەدین ئالتۆن گوتەبێژێ سەرۆک کۆمارێ ترکیی گۆت: “سەرۆبن بوونا رەوشێ ل ئیدلبی ئێدی ناهێ قەبوول کرن و رەژیما ئەسەد پێویستە باجا ڤێ رەوشێ و گهیشتن ب ڤێ رەوشێ بدە”.
ژ ئالیەکە دن ئارتێشا رەژیما ئەسەد پاش راگهاندنا کۆنترۆلکرنا باژارێ سەرقب، راگهاند ئەوێ بەردەوام بن ل سەر پێشڤەچوونێن خوە ژ بۆ کۆنترۆل کرنا تەمامی یا باژارێ ئیدلبێ ل باکورێ سووریێ.
ل گۆرەی روانگەها مافێن مرۆڤان ل سووریێ، د دەما چەند دەمژمێرێن بۆری دە پێتری ٤٠٠ بارهلگران ب هەری کێم ب هلگرتنا وەساییتێن لەشکری، چەک، پێتڤیێن لۆجیستی دگەل سەدەهان لەشکرێن ترکیێ چوونە ناڤا ئیدلبێ دە.
ئەڤ لەشکر کێشیا ترکیێ وەکە مەزنترین لەشکرکشی ژ بۆ باژارێ ئیدلبێ تێ خەملاندن، ژبەرکو هەر ژ سەردەما هەبوونا ئیمپراتۆریەتا عوسمانێ هەیا نها ئەڤ یەکەم جارە ب ڤی رێژە لەشکر ل باژارێ ئیدلبێ تێن جێگیر کرن.
