کچ تەشیا دایێ د رێسیت و کوڕ کڤانێ بابێ دکێشیت

کچ تەشیا دایێ درێسیت و کوڕ کڤانێ بابێ دکێشیت

د ناڤ کوردان دا هنده‌ك گۆتن و پەند هەنە کو ژ کەڤن دا ژ بۆ کوردان ماینە و کار ل سەر دکه‌ن، هنده‌ك ژ وان گۆتن و پەندان جهێ سەرنج راکێشانا پرانیا گەلێ کوردن و زۆر جاران د دیوانان دا ژ بۆ ئیسبات کرنا ئاخفتن یان بوویەرەکا تایبەت ب کار دئینن، لێ ئەڤجارە ئەمێ باس ل گۆتنەکا کوردی بکه‌ین کو هنده‌ك گۆمانێ ل سەر راستییا وێ گۆتنێ پەیدا دکەت، ئەو گۆتن ژی ئەڤە کو «کۆر کڤانا بابێ دکێشیت»!

«مامه‌ی سووند ب كه‌ركووكێ د خوار و ب كلیلا چاره‌سه‌رییا دۆزا گه‌ل ددیت، لێ كۆڕێ وی ب تاكه‌ رێیا ب ده‌ستخستنا پاره‌ی»

گه‌له‌ك جاران باس ل کەرکووکێ و شۆرشێن گه‌لێ كورد دهێت کرن، ژ بەر کو گه‌لێ كورد یەک ژ مەزنترین شۆرش د دیرۆکا خوە دا کرییە قوربانی و رازینەبوون دەست ژ کوردستانی بوونا کەرکووکێ به‌رده‌ن، «مام جەلال تالەبانی» کەسەکە کو گه‌له‌ك جاران باس ل کوردستانی بوونا کەرکووکێ کرییە و گه‌له‌ك جاران ب خاکا کەرکووکێ سووند خوارییە، بۆ نموونه‌ مام جەلال د کۆمبوونەکا جەماوەری دا ل سالا 1992ێ دبێژیت: «کەس نه‌شێت ئاگرێ بابە گۆرگۆر بڤەمرینیت، هه‌تا کوردەک ل دنیایێ مابیت، کەرکووک باژارەکێ کوردستانێ یە، ئەز وه‌ها هزر دكه‌م کو كورد دێ دەستان ژ هەموو کوردستانێ بەردەن، لێ چ کوردەک نینە دەست ژ کەرکووکێ بەردەت، یەک کوردێ ب شەرەف نینە کوردستانی بوونا کەرکووکێ رەد بکەت، شەنگال و تەلەعفەر و زوممار هەرە بەر ب خارێ خانەقین و مەندەلی و بەدرەو جەسان هەر هەموو خاکا پیرۆزا کوردستانێ یە، هەزاران سالە باب و باپیرێن مە ئەڤ خاکە پاراستییە و ژ بۆ مە هێلاینه‌، ژ بلی ڤێ یەکێ نها کورد خودان هێزا پێشمەرگەیان یا قەهرەمانە کو رۆژ ب رۆژێ بهێز دکەڤیت و خوە ژ بۆ رزگارکرنا تەڤاهییا کوردستانێ ئامادە دکەت، چاڤێ مە ل بوهۆسته‌كا خاکا کەسێ نینە، لێ سنۆرێ کوردستانێ چیایێ حەمرینە واتە هه‌تا کو حەمرین مابیت سنۆرێ خوارێ یێ کوردستانێ یە ب كووراتییا چاڤێ دوژمنێن کوردستانێ، کلیلا چارەسەرکرنا پرسگرێکا گەلێ کورد کەرکووکە و فەقەت کەرکووکە و دێ هەر کەرکووک مینیت».

پاش مام جەلال ل 9ی شواتا سالا 2004ێ بۆ جارا یەکەم د روونشتنەکا «مجلس الحكم) دا کو ل وی دەمی ئیراق ب رێیا وێ ئه‌نجوومه‌نێ دهات برێڤەبرن، نەخشەیەکێ مەزن یێ هەر 4 پارچه‌یێن کوردستانێ کو یێ سه‌رده‌مێ عۆسمانییان بوو بلند کر و تێدا ئەڤ یەک سەلماند کو ناڤچەیێن دکەڤن سنۆرێ ماددەیا 140ێ سەر ب باشوورا کوردستانێ ڤه‌ نە، ئەڤ یەک ژی بۆ دۆکیۆمێنتەکا دیرۆکی ژ بۆ گەلێ کورد کو پشترە ب رۆژا «مورافه‌عا مەزن» هات ب ناڤ کرن.

لێ بەلێ کوڕ و برازایێن مام جەلال هەر تشت سەر و بن کر، کوڕ و برازایێن مام جەلال ل 16ی ئۆکتۆبەرا سالا 2017ێ هەر تشت گوهۆری و دیار کر كو «نە گیا ل سەر رهوریشالێن خوە شین دبیت، نە ژی كوڕ کڤانێ بابێ دكێشیت»، ڤان کەسان د خیانەتەکا نشتیمانی یا بێ وێنه‌ دا، ئەو باژارێ باب و مامێ وان سووند پێ دخوار و ب کلیلا چارەسەرکرنا پرسگرێکا گەلێ کورد دزانی ب دو دەستی پێشکێشی دوژمنان کر و ئاخفتنێن مام جەلال هەر هەموو ب درەو دەرێخستن و وان ژی ل سەر ئەکرانێن تیڤیێن لۆکالی و جیهانی یێن HD مورافه‌عەیا خوە یا مەزن ئاشکرا کر و راگه‌هاند ب ئیمزایا 38 کەسان ژ ئەندامێن سەرکرداتییا یەنەکێ مە بریار ب رادەستکرنا باژارێ کەركووکێ دا، کوڕ و برازایێن مام جەلال نە ب تەنێ ب ڤێ خیانەتا خوە کەرکووک رادەستی دوژمنان کر، بەلکو بوونە ئەگەر کو پتری 50٪ ژ خاکا باشوورێ کوردستانێ بکەڤیتە دەست دوژمنێ کوردان.

مالا مام جەلال ل سلێمانیێ دکەڤیتە سەر گرەکێ بلند کو مرۆڤ دشێت د په‌نجه‌رێن وێ را هەموو سلێمانی ببینیت، ل سەر دەمێ مام جەلال مالا وی هه‌رده‌م یا پڕ بوو ژ مێهڤانان، هه‌رده‌م کۆمەک ژ سەرۆک و سەرکردەیێن کورد و ئەرەب و بیانی ل مالا وی بوون، هه‌رده‌م سەرۆک عەشیر و زەلامێن ئۆلی و رۆشەنبیر و نڤیسكار ل ڤێ مالێ و ل سەر سفرەیا ڤێ مالێ بوون، چ جاران سفرە ڤالا نەدما، لێ بەلێ پشتی چوونا مام جەلال ئێدی ئەڤ مالە بوو مالەک کو ب تەنێ پێشوازی ل کەسێن وەکە قاسم سولەیمانی و عەبادی و کەسێن مینا وان دوژمنێن کورد دكر،  ئەو هه‌ژمارا زۆر یا دوست و هه‌ڤالێن مام جەلال ب درێژاهییا 50 سالان ل خوە کۆم کری، هەر پاش نەخوەش کەتنا وی هێدی هێدی ب بێدەنگی کێم و کێمتر بوون، هه‌تا گه‌هشتییه‌ ئاستەک وه‌ها کو مام جەلال ل دەما نەخوەش کەتنا خوە ب تەنێ دگەل زارۆیێ یەک ژ کورێن خوە ل سەر مێزەک رەق یاریان بکەت و کەس ل جەم وی نه‌بیت.

تاکە تشتێ کوڕ و برازایێن مامه‌ی ژ وی فێر بووین خیانەت بوویە

یا راست چ واتایەکا خوە نینە کەسەک 40 سالان دگەل مام جەلال دا بژیت و مەزن ببیت، لێ بەلێ چ سیفاتەکێ وی یێ باش نەگریت، یا راست ژ بەختێ رەشی مە کوردان تاکە تشت کو کوڕ و برازایێن مام جەلال ژ وی فێر بووی خیانەت بوویە و ل 16ی ئۆکتۆبەرێ چاڤ ل خیانەتا باب و مامێ خوە یا سالا 1966ێ کر.

پوستێن ھەمان بەش