شاسوار ب فه‌رمانا «ئیرانێ، ئه‌هلولحه‌ق و حزبوللا» دڤێت ره‌وشێ تێكبده‌ت
د به‌شێ ئێكێ یێ ڤێ بابه‌تی دا، پێگه‌ها «داركا مازی» تنێ كورتییه‌ك ل سه‌ر شاسوار عه‌بدلواحد به‌حس كر، كانێ ئه‌ڤ كه‌س كی یه و چاوا وه‌ك مه‌دیاكار و سیاسه‌تمه‌دار و سه‌رۆك حزب ده‌ركه‌تییه، لێ به‌لێ د به‌شێ دوێ دا، دێ به‌رسڤا ڤان پرسێن ل سه‌ری دیار كری ده‌ین.
بریارا ده‌رێخستنا هێزێن ئه‌مه‌ریكی، ره‌تكرنا كوردان و هۆشداریێن ئیرانێ
وه‌ك كارڤه‌دان ل سه‌ر كوشتنا قاسم سوله‌یمانی كو ل 3/1/2020ێ ل نێزیكی فرۆكخانه‌یا نێڤده‌وله‌تی یا به‌غدایێ ژ ئالیێ ئه‌مه‌ریكا ڤه هاتبوو كوشتن، په‌رله‌مانێ ئیراقێ ل 5/1/2020ێ ئانكو ب دو رۆژان پشتی وێ بوویه‌رێ، روونشتنه‌كا نه‌ئاسایی ساز كر و تێدا ب كۆیا ده‌نگێن په‌رله‌مانتارێن شیعه بریارا ده‌رێخستنا هێزێن ئه‌مریكی و یێن هه‌ڤپه‌یمانییا نێڤده‌وله‌تی ژ خاكا ئیراقێ په‌سه‌ند كر، په‌رله‌مانتارێن كورد یێن پرانییا فراكسیۆنان دگه‌ل رێژه‌یه‌كا زۆر یا په‌رله‌مانتارێن سوننه بایكۆتا روونشتنێ كر و ده‌نگ ژ بۆ نه‌دا.
پاش بریارێ، سه‌ركرداتییا هه‌رێما باشوورێ كوردستانێ ب تایبه‌ت نێچیرڤان بارزانی سه‌رۆكێ هه‌رێما باشوور و مه‌سروور بارزانی سه‌رۆكوه‌زیرێ حكوومه‌تا باشوور، هه‌لوه‌ستێن خوه یێن دژ دیار كرن و ئه‌ڤ بریارا په‌رله‌مانێ ئیراقێ ب بریاره‌كا شاش وه‌سف كرن.
كۆمارا ئیسلامی یا ئیرانێ ل ڤێره و ب ئه‌گه‌را بایكۆت كرنا كوردان و هه‌لوه‌ستێن سه‌ركرداتییا وێ ل سه‌ر بریارا ده‌رێخستنا هێزێن ئه‌مه‌ریكی، بریار دا ب هه‌ر ئاوایه‌كی دربه‌كی ل حكوومه‌تا باشوور بده‌ت، ب گۆتنه‌كا دی: «ئیرانێ ژێر ب ژێر كار كر كو حكوومه‌تا باشوور باجا وێ بایكۆتكرنێ بده‌ت».
ده‌ستپێكا پیلانا تێكدانا ره‌وشا هه‌رێما باشوور
وه‌ك مه ئاماژه پێ كری، پشتی كوشتنا قاسم سوله‌یمانی، ئیرانێ دڤیا ب هه‌ر ره‌نگه‌كێ هه‌بیت دربه‌كێ ل حكوومه‌تا باشوورێ كوردستانێ بده‌ت، ل ڤێره ئیرانێ فه‌رمان ژ بۆ میلیشیایێن خوه یێن ل ئیراقێ هنارت كو رێیه‌كا گونجایی ببینن، میلیشیایان هه‌ر راست په‌نا ژ بۆ «سروه عه‌بدلواحد» یا خویشكا شاسوار برن، وان باش فام دكر كو «سروه و برایێ وێ شاسوار» دووری خه‌تا كوردایه‌تیێ نه، دژبه‌رێن حكوومه‌تا باشوورن و دیرۆكه‌كا پر قرێژ یا هه‌موو جۆره بێ ره‌وشتییه‌كێ د راستا نه‌ته‌وه و نشتیمانێ خوه دا هه‌یه.
كۆمبوونا سروه عه‌بدلواحد و فه‌رماندارێ سپایێ پاسداران
ل ناڤه‌راستا مه‌ها 1 یا ئه‌ڤساله، ئانكو ب حه‌فتییه‌كێ پشتی بریارا په‌رله‌مانێ ئیراقێ یا ده‌رێخستنا هێزێن ئه‌مریكی، پله‌داره‌كێ هه‌ره به‌رزێ سپایێ پاسدارێن ئیرانێ ب ناڤێ «حه‌جی و كۆدناڤێ ئه‌بۆ فاتیمه»، ل به‌غدایێ دگه‌ل سروه عه‌بدلواحدێ كۆمبوو.
د ڤێ كۆمبوونێ دا، هه‌ر ئێك ژ:
حه‌یده‌ر ئه‌لساعدی/ به‌رپرسێ باده‌كا ئابوورى یا عه‌سائب ئه‌هلولحه‌ق ئه‌وا قه‌یس خه‌زعه‌لی سه‌رۆكاتییا وێ دكه‌ت و جهێ باوه‌رییا قه‌یس خه‌زعه‌لی یه.
یووسف ئه‌ل ناسری/ به‌رپرسێ په‌یوه‌ندیێن ته‌ڤگه‌را نوجه‌با یا گرێدای حه‌شدا شه‌عبی.
محه‌مه‌د سامر سه‌عید / به‌رپرسێ په‌یوه‌ندیێن گشتی یێن حزبوللا یا ئیراقی.
د ئاماده‌بوون و كۆمبوونێ دانوستاندنا خالا سه‌ره‌كی كرن، ئه‌و ژی دانانا به‌رنامه‌یه‌كی ژ بۆ لاواز كرنا حكوومه‌تا باشوورێ كوردستانێ و چ رێكه‌كا گونجای هه‌یه ره‌وشا ناڤخوه یا هه‌رێما باشوور پێ بهێته تێكدان.
د كۆمبوونێ دا رێككه‌فتن هاته كرن ئه‌گه‌ر بشێن ئه‌ڤی كاری ب رێكا «شاسوار عه‌بدلواحد» بكه‌ن و ئه‌ڤ گرۆپه ئانكو «ئیران، عه‌سائب ئه‌هلولحه‌ق، ته‌ڤگه‌را نوجه‌با و حزبوللا یا ئیراقی» هه‌موو جوره پشته‌ڤانییه‌كێ ژ بۆ شاسواری بكه‌ن دا كو ببیته كه‌سه‌كێ سه‌رنج راكێش ل باشوورێ كوردستانێ، ئه‌ڤ پشته‌ڤانی یه ژی ژ روویێ ماددی و بازرگانی و هه‌ر چ ئالاڤه‌كێ پێدڤی بیت.
به‌لێ پشتی كۆمبوونێ، «سروه» هاته سلێمانیێ و دگه‌ل شاسوار كۆمبوو، شاسوار رازیبوو ب ڤی ئه‌ركی رابیت، لێ ل به‌رانبه‌ر 3 داخوازییان، داخوازیێن شاسوار ئه‌ڤه بوون:
رۆله‌كێ سه‌ره‌كی ل ئیراقا داهاتی دا هه‌بیت.
ده‌لیڤه‌یێن بازرگانیێ دگه‌ل ئیرانێ پتر بۆ بهێنه به‌رده‌ست كرن.
ئه‌گه‌ر پیلانێ سه‌رنه‌گرت، گرۆپێ مافیایێ قه‌رێن حكوومه‌تا باشوورێ كوردستانێ كو 51 ملیۆن دۆلارن و ل سه‌ر وی نه، پێشڤه بده‌ن.
سروه جاره‌كا دی پشتی ڤێ كۆمبوونێ ڤه‌دگه‌ریته به‌غدایێ و په‌یاما شاسوار ژ بۆ گرۆپی دبه‌ت.
كۆمبوونا چاڤی لاند: سروه و گرۆپ دگه‌ل شاسوار كۆمبوون داكو ئه‌ڤێ پیلانێ جێبه‌جێ بكه‌ن
پشتی گرۆپ ل سه‌ر داخوازیێن شاسوار عه‌بدلواحد رازی بووی، بۆ جارا دوێ «سروه» هاته سلێمانیێ، لێ ڤێ جارێ نوونه‌رێن ئالیێن ل به‌غدا كۆمبووین دگه‌ل دا بوون و «سروه» دخوازیت كو ب فرۆكه‌یێ بچنه سلێمانیێ، لێ وان ره‌ت كر و پێشنیاز كرن ب ترومبێلان بچنه باره‌گه‌هێ حه‌شدا شه‌عبى ل كه‌ركووكێ و ژ كه‌ركووكێ ب هه‌ڤرا ب رێكا ترومبێلێن «سروایێ» بچنه سلێمانیێ و ئارمانج ژى ژ ڤێ پێشنیازێ ئه‌و بوو داكو كه‌سێ ئاگه‌هـ ژ چوونا وان نه‌بیت و ل فروكخانه‌یا سلێمانیێ نه‌كه‌ڤنه بن كۆنترۆلا فروكخانه‌یێ، چونكه دبیت ده‌زگه‌هێن هه‌والگیرییا حكوومه‌تا باشوور بزان كو ئه‌و چووینه سلێمانیێ و د ئه‌نجام دا ئه‌و گرۆپ ب گۆر وێ سیناریۆیێ گه‌هشتنه سلێمانیێ و ل چاڤی لاند ب ئاماده‌بوونا نوونه‌رێ كونسلێ ئیرانێ، دگه‌ل شاسوار عه‌بدلواحد دا كۆمبوون.
د كۆمبوونێ دا پیلان بۆ شاسوار هاته شرۆڤه‌كرن، شاسوار هه‌ر راست رازیبوو و ژبلی خۆشكرنا رێكێ و داخوازیێن ل سه‌ری ئاماژه كری، شاسوار گۆتبوو كو وی ئاریشه‌یه‌كا دی هه‌یه، ئه‌و ژی ئێكه‌تییا نشتیمانییا كوردستانێ یه.
د به‌رسڤا وی دا، نوونه‌رێ كونسلێ ئیرانێ دبێژیت: «بۆ جێبه‌جێكرنا پیلانێ، وان سیناریۆیه‌ك بۆ ئێكه‌تیێ به‌رهه‌ڤ كرییه و ئه‌و سیناریۆ دێ چێكرنا پرسگرێك و ئاریشه‌یان بیت د ناڤ سه‌ركرداتییا وێ دا، داكو به‌شه‌كێ گرۆپا هه‌ڤالێن وان (گرۆپا 16 ئۆكتۆبه‌رێ) بشێن كارێ خۆ بكه‌ن، واته ل ڤێرێ دیار دبیت كو گرۆپا 16ی ئۆكتۆبه‌رێ ژى بووینه چه‌ند به‌شه‌ك د ناڤا خۆ دا، هه‌روه‌ها سیناریۆ ژی بۆ تێكدانا ره‌وشێ ل ناڤبه‌را هه‌ولێر و سلێمانیێ هه‌نه».
به‌لێ سیناریۆیێ پاش چه‌ند رۆژه‌كان ده‌ستپێكر، ژبلی دروستبوونا ناكۆكییان ل ناڤبه‌را ئه‌ندامێن مه‌كته‌با سیاسییا ئێكه‌تیێ، وێنه‌یێن رویس یێن شێخ جه‌عفه‌ر شێخ مسته‌فای ژی دگه‌ل كچه‌كێ هاتن به‌لاڤ كرن.
به‌شه‌كێ گرۆپا 16ی ئۆكتۆبه‌رێ ژی سۆزا خوه ژ بۆ كونسلێ ئیرانێ ب جهـئینا و وان قه‌یرانا غازێ ب رێیا «پۆلات شێخ جه‌نگی» برایێ لاهۆر شێخ جه‌نگی ب ده‌ستێ محموود سه‌نگاوى دروست كر، داكو غاز ژ بۆ سلێمانیێ و هه‌ولێر و دهۆكێ نه‌هێته هنارتن و شاسوار بشێت ڤێ قه‌یرانێ دگه‌ل كێمییا خزمه‌تگوزاریێن كاره‌بێ و ئاڤێ ب ده‌لیڤه بۆ خوه ببینیت و بشێت ل خه‌مێن خه‌لكی سوار ببیت.
ئارمانجا كۆمارا ئیسلامییا ئیرانێ ژ ڤێ پیلانێ لاوازكرنا حكوومه‌تا باشوورێ كوردستانێ یه، پشتی كو نه‌رازیبوونا خوه ل سه‌ر بریارا ده‌رێخستنا هێزێن ئه‌مریكی ل ئیراقێ دیار كری و ئارمانجا شاسواری ژی یا سه‌ره‌كی ئه‌وه كو پرۆژه‌یێ چاكسازیێ تێكبده‌ت یان له‌كه‌دار بكه‌ت، به‌لێ یا راست ئیران دخوازیت نها ب هه‌ر رێكه‌كا هه‌بیت، حكوومه‌تا باشوور بێ هێز بكه‌ت، ب تایبه‌ت پشتی پرۆژه‌یا چاكسازیێ ئێخستییه د وارێ جێبه‌جێكرنێ دا.
ژێده‌رێن پێگه‌ها داركا مازی ل باشوورێ كوردستانێ كو ئه‌ڤ راپۆرته به‌رهه‌ڤ كرییه، ژ زارێ كه‌سه‌كێ نێزیكی شاسوار ڤه‌گوهاستینه كو شاسوار ل رۆژێن رابووری، واته به‌ری قه‌یرانا غازێ ده‌ست پێ بكه‌ت، گۆتییه چه‌ندین ئالیێن سیاسی و هه‌ژماره‌كا په‌رله‌مانتاران، ئه‌و دێ بانگا خوه‌نیشاندانان كه‌ت و ژ بۆ تێكدانا ره‌وشێ، ئه‌و دێ هه‌رێما باشوور وه‌ك مه‌یدانا ته‌حریر لێ كه‌ت.
[mpc_alert preset=”mpc_preset_24″ icon=”eti eti_link” icon_color=”#ffffff” icon_size=”30″ icon_background_color=”#ce4041″ icon_padding_divider=”true” icon_padding_css=”padding-top:25px;padding-right:25px;padding-bottom:25px;padding-left:25px;” font_preset=”mpc_preset_13″ font_color=”#ffffff” font_size=”20″ font_transform=”none” font_align=”center” content_padding_divider=”true” content_padding_css=”padding-top:10px;padding-right:10px;padding-bottom:10px;padding-left:10px;” background_type=”gradient” background_gradient=”#d14945||#910000||0;100||90||linear” border_divider=”true” border_css=”border-top:0px;border-right:0px;border-bottom:3px;border-left:0px;border-color:#bc3a5d;border-style:solid;border-radius:5px;” padding_divider=”true” margin_divider=”true”]
بۆ دیتنا به‌شێ ئێكێ ڤێره كلیك بكه
[/mpc_alert]
