شاسوار عه‌بدلواحد ژ خارنا پارێ خه‌لكی به‌ر ب خارنا سه‌رێ خه‌لكی

شاسوار عه‌بدولواحد ژ خارنا پارێ خه‌لكی به‌ر ب خارنا سه‌رێ خه‌لكی

به‌شێ ئێكێ

جۆره‌كێ بازرگانان ل هه‌رێما باشوورێ كوردستانێ ده‌ركه‌تنه‌ كو پرانییا وان ل سه‌ر مللێن خه‌لكێ هه‌ژار و كێم ده‌رامه‌ت ده‌وله‌مه‌ند بووینه‌، وان بازرگانان قانوونێن حكوومه‌تا باشوور و قه‌یرانا سالێن جه‌نگا دژی داعشێ د به‌رژه‌وه‌ندییا خوه‌ دا شكاندینه‌، ب گۆتنه‌كا دی «ئه‌ڤ جۆرێ بازرگانان ئه‌ون كو ل خه‌مێن خه‌لكی سوار بووینه‌ پشتی كو ئیستغلالا خه‌لكێ هه‌ژار و حكوومه‌تێ كرین».

چاڤكانیێن داركا مازی ل باشوورێ كوردستانێ راپۆرته‌ك ل سه‌ر ره‌وشا ناڤخوه‌ و ره‌وشا خه‌لكی شاندییه‌، ئه‌ڤ راپۆرت به‌حسا‌ مژارا قه‌یرانا گازێ و غازێ و كارڤه‌دانێن جێبه‌جێكرنا پرۆژه‌یا چاكسازیێ دكه‌ت، هه‌ر وه‌ها كانێ ب چ ئاوا ئه‌ڤ ته‌خا ده‌ست نیشان كری یا بازرگانان، یارییان ب هه‌ستێن خه‌لكێ هه‌ژار دكه‌ن.

شاسوار عه‌بدلواحد بازرگانێ هه‌ست و سۆزێن هه‌ژاران

شاسوار عه‌بدولواحد كوردێ باشوورێ كوردستانێ یه‌، خوه‌ ب بزنزمان، سیاسه‌تمه‌دار و مه‌دیاكار دده‌ته‌ ناس كرن، كه‌نالێ ئاسمانی یێ nrt ل سلێمانیێ ل بن ناڤێ كۆمپانییا نالیا دامه‌زراندییه‌، هه‌روه‌ها هنده‌ك پرۆژه‌یێن بازرگانی وه‌ك چاڤی لاند ل سلێمانیێ هه‌نه‌.

شاسوار عه‌بدولواحد ته‌مه‌ن 41 ساله‌، ل سالا 2017ێ دژاتیا خوه‌ ژ بۆ ریفراندۆما سه‌رخوه‌بوونا كوردستانێ ب ئاشكرایی كر و سه‌ركێشییا بزاڤه‌كێ ب ناڤێ «نه‌» ژ بۆ دژاتیا ریفراندۆمێ كر.

ل هه‌مان سالێ ته‌ڤگه‌ره‌كا سیاسی ب ناڤێ «نه‌وه‌ی نوێ» دامه‌زراند و به‌شداری هه‌لبژارتنێن ئیراقێ و كوردستانێ بوو.

شاسوار عه‌بدولواحد ل ده‌ستپێكا ده‌ركه‌تنا خوه‌ ژ بۆ مه‌یدانا بازرگانیێ و پاشی سیاسه‌تێ ل هه‌رێما باشوور، گه‌له‌ك پرس ل سه‌ر هه‌بوون، چ كه‌س و ئالییان نه د‌زانی ئه‌و ل چ ده‌مه‌كی و چاوا ده‌وله‌مه‌ند بوویه‌.

چاڤكانیێن داركا مازی ل باشوورێ كوردستانێ، هنده‌ك زانیاری ل ده‌ربارێ شاسوار عه‌بدولواحد ب ده‌ست ئێخستن.

شاسوار عه‌بدولواحد ده‌ستپێكا كارێن خوه‌ یێن بازرگانی ب فێل كرنێ ل خه‌لكێ هه‌ژار ده‌ست پێ كرینه‌، وه‌ختێ كو ب رێیا پرۆژه‌یێ «چاڤی لاند» پاره‌یه‌كێ زۆر ژ خه‌لكێ هه‌ژار و كرێچی وه‌رگرتی كو پتری 20 ملیۆن دۆلاران بوون و هه‌تا نها ئه‌و پاره‌ ژ بۆ خودانێن وان نه‌ڤه‌گه‌راندیه‌.

هه‌روه‌ها ل ئالییه‌كێ دی شاسوار عه‌بدولواحد نه‌تنێ فێل ل خه‌لكێ هه‌ژار كریه‌ به‌لكو حكوومه‌تا باشوور ژی ژ فێلێن وی رزگار نه‌بوویه‌ و ده‌ما چه‌ندین سالانه‌ ب رێكا د .به‌رهه‌م سالح  51 ملیۆن دۆلار كو وه‌ك قه‌ر ژ وه‌زاره‌تا دارایی یا حكوومه‌تا باشوور وه‌رگرتبوون هێشتا ئه‌و قه‌ره‌ ژبۆ حكوومه‌تێ ڤه‌نه‌گه‌راندیه‌.

بۆچی شاسوار پشتی پرۆژه‌یێ چاكسازیێ دڤێت ره‌وشێ تێكبده‌ت

پێگه‌ها داركا مازی ئه‌ڤ پرس ژ چاڤكانییه‌كێ نێزیكی شاسوار عه‌بدلواحد كر، هه‌ر چه‌نده‌ ب وێ زه‌لالیێ به‌رسڤ نه‌دا، لێ به‌لێ گۆت: «ئه‌گه‌ر پرۆژه‌یا چاكسازیێ یه‌ كو په‌رله‌مانێ كوردستانێ ل مه‌ها رابووری ده‌نگ ل سه‌ر دایه‌ و نها كه‌تیه‌ د وارێ جێبه‌جێكرنێ دا» كو چه‌ندین جاران شاسوار چه‌ند لایه‌ن ئاگه‌هدار كرینه‌ كو هه‌گه‌ر په‌سندا پرۆژه‌ى بهێته‌ دان ئه‌م دێ كورستانا باشور وه‌ك مه‌یدانا ئازادیێ ل ئیراقێ لێ كه‌ین .

ل گۆر پرۆژه‌یا چاكسازیێ پێدڤییه‌ هه‌موو قه‌رێن ل سالێن رابووری حكوومه‌تێ داینه‌ بازرگانێن باشوور بهێنه‌ ڤه‌گه‌راندن، حكوومه‌تێ كوژمێ 800 ملیۆن دۆلاران قه‌ر ل جه‌م بازرگانان هه‌نه‌، ژ وێ كوژمه‌ی 51 ملیۆن دۆلار ل جه‌م شاسوار عه‌بدولواحد هه‌نه‌، ل ڤێره‌ و ژ بۆ كو شاسوار خوه‌ ژ ڤه‌گه‌راندنا وی قه‌ری بۆ حكوومه‌تێ ڤه‌دزیت، سیاسه‌تا تێكدانا ره‌وشێ وب هه‌ڤكاریا سازێن ئیرانی و هه‌ژماره‌كا پارتێن   شیعى ل ئیراقێ گرتینه‌ به‌ر و قه‌یرانا غازێ و گازێ ب ده‌لیڤه‌ ژ بۆ خوه‌ دیتیه‌ كو موزایه‌داتان ل سه‌ر سه‌رێ خه‌لكێ هه‌ژار پێ بكه‌ت.

شاسوار و یارییا 20 لێترێن گازێ

ل رۆژێن رابووری شاسوار عه‌بدولواحد تانكه‌ره‌كێ گازێ كڕی و ل یه‌ك ژ تاخێن هه‌ژار یێن باژارێ دهۆكێ هه‌ر ماله‌كێ 20 لترێن گازی ل سه‌ر دابه‌ش كرن و ب ڤێ رێكێ بانگه‌شه‌یا وێ یه‌كێ دكر كو ئه‌و ل سه‌ر كیستێ خوه‌ گازێ ل سه‌ر خه‌لكی دابه‌ش دكه‌ت، لێ یا راست ئه‌و گاز و پرۆژه‌یێن خێرخوازی یێن شاسوار بانگه‌شێ بۆ دكه‌ت، ب پارێ خه‌لكێ هه‌ژار و حكوومه‌تێ ب خوه‌ كریه‌ و ئه‌و بزاڤێ دكه‌ت ب ڤێ رێكێ خه‌لكی ب خاپینیت.

هه‌ر چه‌نده‌ كو بابه‌تێ شاسوار و 20 لێترێن وی یێن گازێ د سۆشیال مه‌دیایێ دا رۆژه‌كێ گه‌رم و گۆر بوو، لێ به‌لێ ئه‌نجام وه‌ك وی دڤیان نه‌هاتن، له‌ورا نها هستریایێ شاسوار گرتییه‌ و داكو خوه‌ ژ دانا 51 ملیۆن دۆلاران بۆ حكوومه‌تێ ڤه‌دزیت، ئه‌و یێ بزاڤێ دكه‌ت جاره‌كا دی ل خه‌مێن خه‌لكی سوار بیت و خوه‌نیشاندانان دروست بكه‌ت.

سیاسه‌تمه‌دارێ قرێژ و بێ ره‌وشت

چاڤكانیێن داركا مازی ل باشوورێ كوردستانێ بۆچوونا هه‌ژماره‌كا كادرێن حزبێن سیاسی ل ده‌ربارا شاسوارێ سیاسه‌تمه‌دار وه‌رگرتینه‌، وه‌ك كادرێن ته‌ڤگه‌را گۆرانێ، پارتییا ده‌مۆكرات یا كوردستانێ یه‌كێتییا نشتیمانی و حزبه‌كا ئیسلامی، وان شاسوار ب كه‌سه‌كێ دووری خه‌تا كوردایه‌تیێ وه‌سف كرن، به‌لكو زێده‌تر بزاڤێ دكه‌ت ره‌وشێ و كێماسیێن ل ناڤا هه‌رێما باشوور ژ بۆ به‌رژه‌وه‌ندیا خوه‌ بشكێنیت، هنده‌كان بووچوونێن دوورتر هه‌بوون و دبێژن: «شاسوار یێ بزاڤێ دكه‌ت ببیته‌ دارده‌ستێ هنده‌ك ولاتێن جیران ژ بۆ تێكدانا ره‌وشا ناڤخوه‌ یا هه‌رێمێ»، بۆ نموونه‌ وه‌ك چاوا ئیرانێ ده‌ست د تێكدانا ره‌وشا باشوور و ناڤه‌راستا ئیراقێ دا هه‌یه‌، شاسوار نها بزاڤێ دكه‌ت ب وی رۆلی ل باشوورێ كوردستانێ رابیت.

ل ئیراقێ موقته‌دا سه‌در هه‌یه‌ كو فه‌رمانێن ئیرانێ هاورده‌ی ولاتێ خوه‌ دكه‌ت و جادێ ب تلا خوه‌ د لڤینیت، شاسوار ل ڤێرێ یێ بزاڤێ دكه‌ت چاڤ ل سه‌دری بكه‌ت و ئه‌و ل وێ باوه‌رێ یه‌ كو خه‌لك دێ ب گازیا وی ده‌ركه‌ڤن سه‌ر جادده‌یان، لێ یا راست شاسواری نه‌ «عمامه»‌ ل سه‌ر سه‌ری هه‌یه‌، نه‌ژی ریهـ و جلكێن ئۆلداران ل به‌رن، ل ڤێره‌ ژی ئه‌ڤ گۆتنا گه‌لێ باشوور ل بیر دهێت ئه‌و گۆتنا دبێژیت: «مریشكێ چاڤ دا قازێ قوون لێ بوو گه‌لیێ بازێ»، مه‌به‌ست ژی ئه‌وه‌ كو مریشك نه‌دشێت مه‌له‌ڤانییان وه‌كی قازێ بكه‌ت نه‌ژی وه‌كی وێ بفریت.

لێ به‌لێ تشتێ سه‌یر ئه‌وه‌ كو پاش 2 سالان ژ دامه‌زراندنا ته‌ڤگه‌را نه‌وه‌ی نوێ، 3 جاران قه‌یرانێن مه‌زن د ناڤا ڤێ ته‌ڤگه‌رێ دا چێبووینه‌، ئه‌و قه‌یران نه‌ژبه‌ر بیر و بۆچوونێن شاسوار یێن سیاسی نه‌، به‌لكو ل سه‌ر پرسێن گرێدایی ئه‌خلاقێ شاسواری نه‌، ب ڤێ ئه‌گه‌رێ په‌رله‌مانتارا ته‌ڤگه‌را نه‌وه‌ی نوێ «شادی نه‌وزاد» كو شاسوار گه‌فا به‌لاڤكرنا ڤیدیۆیێن وێ كربوو، ده‌ست ژ كار كێشا و ل په‌ی وێ، هه‌ژماره‌كا دی یا كادر و په‌رله‌مانتارێن ته‌ڤگه‌رێ ده‌ست ژ وێ ته‌ڤگه‌رێ به‌ردان، ل ڤێره‌ پرسه‌ك سه‌رهلدده‌ت ئه‌و ژی، شاسوارێ نه‌شێت نامووس و رومه‌تا كادرێن به‌رز یێن ته‌ڤگه‌را خوه‌ و مالباتا خوه‌ «سروه‌» ب پارێزیت دێ چه‌وا شێت شه‌ره‌فا گه‌لێ كورد پارێزیت؟

شاسوار و قۆناغا دوێ ژ خیانه‌تا 16ێ ئۆکتۆبەرێ

پاش بریاردان ل سەر ئەنجامدانا ریفراندۆما باشوورێ کوردستانێ، دەولەتێن داگیرکارێن کوردستانێ گەلەک دژاتی و پیلان ل دژی کوردستانێ هاتن ئەنجامدان، لێ بەلێ چ یەک ژ وان پیلانان سەرکەفتن نه‌ئینان، ل 16ێ ئۆکتۆبەرا سالا 2017 واتە ب تنێ 20 رۆژان پاش ریفراندۆمێ، دەولەتێن داگیرکار ب تایبەتی ئیران و ئیراق و ترکیێ، هەموو هەول دان کو ستاتۆیا باشوورێ کوردستانێ ل ژێر ناڤێن جودا ژناڤ ببن، لێ بەلێ سەرکەفتن د ڤێ یەکێ دا نه‌ئینان، ب تنێ ب رێکا هنده‌ك کرێ گرتیێن کورد کو پاش ب “گرۆپا کالفامان” هاتن ب ناڤ کرن 50٪ ژ خاکا باشوورێ کوردستانێ ب دوژمنان هاتە فرۆتن، یا راست دوژمنێن گەلێ کورد دخواستن ب هەڤکاری دگەل خیانەتکارێن کالفام د ناڤا باشوور دا ستاتۆیا هەرێما کوردستانێ ب تەمامی ژ ناڤ ببەن و هەرێما باشوور نەهێلن، لێ بەرخوەدانا پێشمەرگەیان ل مەحموودیێ و سحێلا و پردێ هەموو پیلانێن وان ژناڤ برن.

نها ژی دەولەتێن دوژمن دخوازن ب هێجەتا خرابییا رەوشا ئابووری یا باشوورێ کوردستانێ کو ئەڤ رەشا خراب ب سایا سەرێ وان دەولەتان ب خوە هاتیە چێکرن، قۆناغا دوێ ژ پیلانا 16ێ ئۆکتۆبەرێ ژ بۆ نه‌هێلانا ستاتۆیا باشوورێ کوردستانێ جێبه‌جێ بكه‌ن، ئەو ژی ب رێیا شاسوار عه‌بدولواحد سەرۆکێ ته‌ڤگه‌را نەوەی نوێ، بانگەوازا ڤی کەسی کو خوە ب ئۆپۆزسیۆن و خەمخۆرێ خه‌لكی دده‌ته‌ نیاسین، ب فیتا دەولەتێن دوژمن و خائینێن 16ێ ئۆکتۆبەرێ یە، تاکو ژ ئالییەکێ وان پرسگرێکێن د ناڤا یەنەکێ دا ژ بیرا خەلکی ببەن ژ ئالییەکێ دی رەوشا باشوور ئالۆز بکه‌ن تاکو رێگریێ ل پرۆژەیا چاکسازییا حکوومەتا هەرێما باشوورێ کوردستانێ بگرن.

پێگه‌ها داركا مازی د به‌شێ دوێ یێ ڤێ مژارێ دا دێ:

«هووركاتیێن كۆمبوونێن شاسوار عه‌بدولواحد و خویشكا وی سروه‌ عه‌بدولواحد دگه‌ل حكومه‌تا ئیراقێ و ده‌وله‌تا ئیرانێ و رێككه‌فتنێن وان یێن قرێژ به‌لاڤ كه‌ت».

ل به‌ندا مه‌ بن

پوستێن ھەمان بەش